Antiphonæ finales ad B. M. V.

Ordinarium

INVITATORIUM | OFFICIUM LECTIONIS | LAUDES MATUTINÆ | VESPERÆ | COMPLETORIUM

ANTIPHONÆ FINALES DE B. MARIAM VIRGINEM

(Alma Redemptóris Mater | Ave, Regína cælórum | Salve, Regína, mater misericórdiæ | Sub tuum præsídium | Regína cæli, lætáre)

Alma Redemptóris Mater, quæ pérvia cæli porta manes,
    et stella maris, succúrre cadénti,
súrgere qui curat, pópulo; tu quæ genuísti,
    natúra miránte, tuum sanctum Genitórem,
Virgo prius ac postérius, Gabriélis ab ore
    sumens illud Ave, peccatórum miserére.

Ave, Regína cælórum,
ave, Dómina angelórum,
salve, radix, salve, porta,
ex qua mundo lux est orta.

Gaude, Virgo gloriósa,
super omnes speciósa;
vale, o valde decóra,
et pro nobis Christum exóra.

III Salve, Regína, mater misericórdiæ;
vita, dulcédo et spes nostra, salve.
Ad te clamámus, éxsules, filii Evæ.
Ad te suspirámus, geméntes et flentes
in hac lacrimárum valle.

Eia ergo, advocáta nostra,
    illos tuos misericórdes óculos
    ad nos convérte.
Et Iesum, benedíctum fructum ventris tui,
    nobis post hoc exsílium osténde.
O clemens, o pia, o dulcis Virgo María.

Sub tuum præsídium confúgimus,
sancta Dei Génetrix;
nostras deprecatiónes ne despícias in necessitátibus:
sed a perículis cunctis líbera nos semper,
Virgo gloriósa et benedícta.

Tempore paschali:

Regína cæli, lætare, allelúia,
quia quem meruísti portáre, allelúia,
resurréxit sicut dixit, allelúia;
ora pro nobis Deum, allelúia.