Invitatorium locum suum habet initio totius cursus orationis cotidianæ; scilicet præponitur aut Officio lectionis, aut Laudibus matutinis, prout ab alterutra actione liturgica dies incipit.
Aperi, Dómine, os meum ad benedicéndum nomen sanctum tuum; munda cor meum ab ómnibus vanis, pervérsis et aliénis cogitatiónibus; intelléctum illúmina, afféctum inflámma, ut digne, atténte ac devóte hoc Offícium recitáre váleam, et exaudíri mérear ante conspéctum divínæ maiestátis tuæ. Per Christum Dóminum nostrum. Amen.
Dómine, lábia mea apéries.
Et os meum annuntiábit laudem tuam.
Postea dicitur psalmus 95 (94) cum sua antiphona, more responsoriali. Antiphona statim proponitur ac repetitur, iterumque resumitur post unamquamque stropham.
In recitatione a solo antiphona dici potest tantum initio psalmi, nec necesse est eam repetere post unamquamque stropham.
Tempore per annum antiphona ad Invitatorium invenitur in psalterio.
Tempore Adventus, Nativitatis, Quadragesimæ et paschali antiphona invenitur in Proprio de Tempore.
Antiphona ad Invitatorium in sollemnitatibus et festis, invenitur in Proprio vel in Communi.
In memoriis Sanctorum, antiphona, nisi adsit propria, sumitur ad libitum aut e Communi aut e feria.
Psalmo 95 (94) substitui potest psalmus 100 (99) vel 67 (66) vel 24 (23), qui, si occurrit in Officio, eius loco dicitur psalmus 95.
Psalmus cum sua antiphona, pro opportunitate, omitti potest quando Invitatorium Laudibus matutinis præponendum est.
Text © LIBRERIA EDITRICE VATICANA.