Officium lectionis
Deus, in adiutórium meum inténde.
Dómine, ad adiuvándum me festína.
Glória Patri. Sicut erat. Allelúia.
HYMNUS
Verbum supérnum pródiens,
a Patre lumen éxiens,
qui natus orbi súbvenis
cursu declívi témporis:
Illúmina nunc péctora
tuóque amóre cóncrema;
audíta per præcónia
sint pulsa tandem lúbrica.
Iudéxque cum post áderis
rimári facta péctoris,
reddens vicem pro ábditis
iustísque regnum pro bonis,
Non demum artémur malis
pro qualitáte críminis,
sed cum beátis cómpotes
simus perénnes cǽlites.
Sit, Christe, rex piíssime,
tibi Patríque glória
cum Spíritu Paráclito,
in sempitérna sǽcula. Amen.
PSALMODIA
Ant. 1 Meménto nostri, Dómine, vísita nos in salutári tuo.
Confitémini Dómino, quóniam bonus, *
quóniam in sǽculum misericórdia eius.
Quis loquétur poténtias Dómini, *
audítas fáciet omnes laudes eius?
Beáti, qui custódiunt iudícium *
et fáciunt iustítiam in omni témpore.
Meménto nostri, Dómine,
in beneplácito pópuli tui, *
vísita nos in salutári tuo,
ut videámus bona electórum tuórum, †
ut lætémur in lætítia gentis tuæ, *
ut gloriémur cum hereditáte tua.
Peccávimus cum pátribus nostris, *
iniúste égimus, iniquitátem fécimus.
Patres nostri in Ægýpto
non intellexérunt mirabília tua, †
non fuérunt mémores
multitúdinis misericordiárum tuárum *
et irritavérunt ascendéntes in mare,
mare Rubrum.
Et salvávit eos propter nomen suum, *
ut notam fáceret poténtiam suam.
Et incrépuit mare Rubrum et exsiccátum est, *
et dedúxit eos in abýssis sicut in desérto.
Et salvávit eos de manu odiéntis *
et redémit eos de manu inimíci.
Et opéruit aqua tribulántes eos: *
unus ex eis non remánsit.
Et credidérunt verbis eius *
et cantavérunt laudem eius.
Cito oblíti sunt óperum eius *
et non sustinuérunt consílium eius;
et concupiérunt concupiscéntiam in desérto *
et tentavérunt Deum in inaquóso.
Et dedit eis petitiónem ipsórum *
et misit saturitátem in ánimas eórum.
Et zeláti sunt Móysen in castris, *
Aaron sanctum Dómini.
Apérta est terra et deglutívit Dathan *
et opéruit super congregatiónem Abíram.
Et exársit ignis in synagóga eórum, *
flamma combússit peccatóres.
Ant. Meménto nostri, Dómine, vísita nos in salutári tuo.
Ant. 2 Cave nequándo obliviscáris pacti Dómini Dei tui.
Et fecérunt vítulum in Horeb *
et adoravérunt scúlptile;
et mutavérunt glóriam suam *
in similitúdinem tauri comedéntis fenum.
Oblíti sunt Deum, qui salvávit eos, *
qui fecit magnália in Ægýpto,
mirabília in terra Cham, *
terribília in mari Rubro.
Et dixit quia dispérderet eos, *
nisi affuísset Móyses eléctus eius:
stetit in confractióne in conspéctu eius, *
ut avérteret iram eius, ne destrúeret eos.
Et pro níhilo habuérunt
terram desiderábilem, *
non credidérunt verbo eius.
Et murmuravérunt in tabernáculis suis, *
non exaudiérunt vocem Dómini.
Et elevávit manum suam super eos, *
ut prostérneret eos in desérto
et ut deíceret semen eórum in natiónibus *
et dispérgeret eos in regiónibus.
Et adhæsérunt Baálphegor *
et comedérunt sacrifícia mortuórum;
et irritavérunt eum in adinventiónibus suis, *
et irrúpit in eos ruína.
Et stetit Phínees et fecit iudícium, *
et cessávit quassátio,
et reputátum est ei in iustítiam, *
in generatiónem et generatiónem
usque in sempitérnum.
Et irritavérunt eum ad aquas Meríba, *
et vexátus est Móyses propter eos,
quia exacerbavérunt spíritum eius, *
et témere locútus est in lábiis suis.
Ant. Cave nequándo obliviscáris pacti Dómini Dei tui.
Ant. 3 Salvos nos fac, Dómine, et cóngrega nos de natiónibus.
Non disperdidérunt gentes, *
quas dixit Dóminus illis.
Et commíxti sunt inter gentes *
et didicérunt ópera eórum.
Et serviérunt sculptílibus eórum, *
et factum est illis in scándalum.
Et immolavérunt fílios suos *
et fílias suas dæmóniis.
Et effudérunt sánguinem innocéntem, †
sánguinem filiórum suórum et filiárum suárum, *
quas sacrificavérunt sculptílibus Chánaan.
Et infécta est terra in sanguínibus, †
et contamináti sunt in opéribus suis *
et fornicáti sunt in adinventiónibus suis.
Et exársit ira Dóminus in pópulum suum *
et abominátus est hereditátem suam
et trádidit eos in manus géntium, *
et domináti sunt eórum, qui odérunt eos.
Et tribulavérunt eos inimíci eórum, *
et humiliáti sunt sub mánibus eórum.
Sæpe liberávit eos; †
ipsi autem exacerbavérunt eum in consílio suo *
et corruérunt in iniquitátibus suis.
Et vidit tribulatiónem eórum, *
cum audívit clamórem eórum.
Et memor fuit testaménti sui *
et pænítuit eum
secúndum multitúdinem misericórdiæ suæ.
Et dedit eos in miseratiónes *
in conspéctu ómnium,
qui captívos dúxerant eos.
Salvos nos fac, Dómine Deus noster, *
et cóngrega nos de natiónibus,
ut confiteámur nómini sancto tuo *
et gloriémur in laude tua.
Benedíctus Dóminus Deus Israel †
a sǽculo et usque in sǽculum. *
Et dicet omnis pópulus: « Fiat, fiat ».
Ant. Salvos nos fac, Dómine, et cóngrega nos de natiónibus.
Annúntiat Dóminus verbum suum Iacob.
Iustítias et iudícia sua Israel.
LECTIO PRIOR
De libro Isaíæ prophétæ
29, 1-8
Iudicium Dei in Ierusalem
Væ Ariel, Ariel, cívitas,
quam circúmdedit David!
Addite annum ad annum,
sollemnitátes evolvántur;
et circumvallábo Ariel,
et erit mæror et mæstítia,
et erit mihi quasi Ariel.
Et circúmdabo te quasi sphæram
et iáciam contra te ággerem
et muniménta ponam in obsidiónem tuam.
Humiliáberis, de terra loquéris,
et de púlvere vix audiétur elóquium tuum,
et erit quasi pythónis de terra vox tua
et de humo elóquium tuum mussitábit.
Et erit sicut pulvis ténuis
multitúdo superbórum tuórum,
et sicut pálea volans
multitúdo fórtium.
Erítque repénte conféstim,
a Dómino exercítuum visitáberis
in tonítruo et commotióne terræ,
magno fragóre, túrbine et tempestáte
et flamma ignis devorántis.
Et erit sicut sómnium visiónis noctúrnæ
multitúdo ómnium géntium,
quæ dímicant contra Ariel,
et omnes, qui pugnant contra eam
et contra muniménta eius et oppressóres eius.
Et sicut sómniat esúriens, et ecce cómedit,
cum autem fúerit expergefáctus, vácua est ánima eius,
et sicut sómniat sítiens, et ecce bibit,
et postquam fúerit expergefáctus, lassus adhuc sitit,
et ánima eius vácua est,
sic erit multitúdo ómnium géntium
dimicántium contra montem Sion.
RESPONSORIUM
Is 54, 4; 29, 5. 6. 7
Ierúsalem, noli timére, quia non confundéris, * Quando a Dómino exercítuum visitáberis.
Et erit sicut sómnium visiónis noctúrnæ multitúdo ómnium géntium, quæ dímicant contra te. * Quando.
LECTIO ALTERA
Ex trádita relátione, quæ « Nican Mopohua » nuncupátur
(sæc. XVI, ex archivo Archidiœcesis Mexicopolitanæ)
Numquid hic non adsum ego Mater tua?
Anno 1531, post dies áliquot mensis decémbris, cum esset quidam indus pauper et affábilis, cui nomen Ioánnes Dídacus, ut fertur, ex Cuauhtitlan, cuius cura, quoad spirituálem administratiónem, ad religiósos in Tlatilolco residéntes pertinébat, die sábbato, valde mane, Tlatilolco rem divínam ille adíbat. Ut autem ad collem Tepeyac dictum advénit, iam illucescébat. Cantum ergo supra collem audívit. Ut vero cantus cessávit, nec iam fuit ámplius áditus, vocátum se audívit e superióre parte collis: « Dilécte, Ioánnes Dídace », dictum est ei. Statim illuc ausus est ascéndere, unde se vocári cognóvit.
Ut autem supra collem advénit, dóminam vidit stantem, quæ illum, ut ipse adíret, vocávit. Cum ante illam pervénit, valde mirátus est quantum esset décora: vestis eius sicut sol effulgébat. Illico voluntátem suam illi Virgo declarávit. Ait illi: « Scito, dilectíssime fili, Sanctam Maríam me esse, perféctam semper Vírginem, Matrem veríssimi Dei, vitæ Auctóris, qui ómnia creávit et sústinet, Dómini cæli et terræ. Magnópere volo, ardénter desídero, ut isto in loco templum meum ædificétur, ubi eum osténdam, eum maniféstans laudábo, meum amórem ac pietátem, auxílium et defensiónem impértiam, quóniam revéra ego clemens Mater vestra sum, et tua et ómnium qui hac in terra in unum consistétis et aliórum quorumcúmque qui díligunt me, qui me quærunt, qui devóte et confidénter me invocáverint. Ibi lácrimas ac mostítiam eórum exáudiam, in angústiis benefáciam et in omni tribulatióne remédium áfferam. Ut autem meum desidérium adimpleátur, Mexicópolim adi in palátium epíscopi. Te a me missum dices illi, ut ipsum scire fácias quómodo mihi domum hic volo ædificári, templum hic in valle mihi érigi ».
Ut pervénit intra civitátem, statim domum adívit epíscopi, cui nomen Ioánnes de Zumarrága, Ordinis Sancti Francísci. Ut autem antístes Ioánnem Dídacum audívit, quasi non omníno credens, illis respóndit: « Fili, íterum vénies et adhuc áudiam te. Ego autem mihi cogitábo quid fácere opórteat de tua voluntáte et desidério ».
Altera die, vidit ergo Regínam de colle descendéntem unde ipsum aspiciébat. Quæ venit óbviam illi prope collem, eum detínuit dixítque: « Audi, dilécte fili: Nullátenus tímeas neque corde dóleas, nec áliquid fácias tui avúnculi infirmitátem aut quámlibet angústiam. Numquid hic non adsum ego Mater tua? Numquid non sub umbra et protectióne mea tu es constitútus? Numquid ego non sum fons tua vitæ et felicitátis? Numquid tu non in meo grémio, in bráchiis meis subsístis? Numquid áliud quodcúmque tibi necésse est? Nihil dóleas, nec turbéris. Ascénde, inquit, dilécte fili, supra collem atque in eo loco, ubi me vidísti et tibi locúta sum, flores ibi divérsas vidébis. Accipe et cóllige illas atque inde descéndens affer illas coram me ».
Descéndit ergo Ioánnes atque Cæli Regínæ détulit, quas collégerat flores. Illa autem, ut eos vidit, suis venerabílibus mánibus illos accépit rursúmque in Ioánnis pallíolo collocávit dixítque illi: « Fili dilectíssime, hi flores signum, quod déferes ad epíscopum, sunt. Eh, tu meus núntius es, cuius fidelitáti hæc commítto. Te rigoróse præcípio: cáveas ne pallíolum tuum, nisi coram epíscopo, éxplices et, quæ defers, illi osténdas. Narrábis quoque quómodo, ut collem ascénderes et inde flores accípere, tibi præcépi et quidquid vidísti et admirátus es, ut credat et agat de templo erigéndo quod volo ».
Ut ergo hæc præcépit Cæli Regína, iter arrípuit Mexicópolim versus. Lætus ibat, quia ómnia próspere fient. Ingréssus autem Ioánnes, coram epíscopo se prostrávit atque illi narrávit quæcúmque víderat et ad quid ad ipsum missus erat. Dixit illi: « Dómine, mihi quæ præcepísti adimplévi. Dictúrus adívi Dóminam meam, Cæli Regínam, Sanctam Maríam Dei Genitrícem, te signum pétere ad mihi credéndum atque ut templum ibi éxstruas ubi ipsa Virgo desíderat. Dixi ergo illi me signum áliquod eius voluntátis ad te afférre promisísse. Audívit ergo quæ tu expéteres: benígne tulit te signum pétere ad impléndam voluntátem eius atque hódie, valde mane, me rursus ad te veníre præcépit ».
Occúrrit ergo univérsa cívitas: venerábilem imáginem vidébant, mirabántur, ut opus divínum eam mirábant, deprecabántur. Et die illa dixit avúnculus Ioánnis Dídaci necnon quæ sit Vírginis advocátio et quod eius imágo nuncupétur Sanctæ Maríæ semper Vírginis de Guadalúpe.
RESPONSORIUM
Cf. Ap 12, 1
Signum magnum appáruit in cælo: múlier amícta sole, et luna sub pédibus eius; * Et in cápite eius coróna stellárum duódecim.
Gaudent ángeli, exsúltent archángeli in Vírgine María. * Et in cápite eius coróna stellárum duódecim.
ORATIO
Orémus.
Deus, Pater misericordiárum, qui sub sanctíssimæ Matris Fílii tui singulári patrocínio plebem tuam constituísti, tríbue cunctis, qui beátam Vírginem Guadalupénsem ínvocant, ut, alacrióri fide, populórum progressiónem in viis iustítiæ quǽreant et pacis. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
Amen.
Text © LIBRERIA EDITRICE VATICANA.
© 1999-2026 J. Vidéky