{v}1{/v}Confitémini Dómino et invocáte nomen eius,{x}

annuntiáte inter gentes ópera eius.

{v}2{/v}Cantáte ei et psállite ei,{x}

meditámini in ómnibus mirabílibus eius.

{v}3{/v}Laudámini in nómine sancto eius,{x}

lætétur cor quæréntium Dóminum.

{v}4{/v}Quǽrite Dóminum et poténtiam eius,{x}

quǽrite fáciem eius semper.

{v}5{/v}Mementóte mirabílium eius, quæ fecit,{x}

prodígia eius et iudícia oris eius:

{v}6{/v}semen Abraham, servi eius,{x}

fílii Iacob, elécti eius.

{v}7{/v}Ipse Dóminus Deus noster;{x}

in univérsa terra iudícia eius.

{v}8{/v}Memor fuit in sǽculum testaménti sui,{x}

verbi, quod mandávit in mille generatiónes,

{v}9{/v}quod dispósuit cum Abraham,{x}

et iuraménti sui ad Isaac.

{v}10{/v}Et státuit illud Iacob in præcéptum{x}

et Israel in testaméntum ætérnum

{v}11{/v}dicens: «Tibi dabo terram Chánaan{x}

funículum hereditátis vestræ».

{v}12{/v}Cum essent número brevi,{x}

paucíssimi et peregríni in ea

{v}13{/v}et pertransírent de gente in gentem{x}

et de regno ad pópulum álterum,

{v}14{/v}non permísit hóminem nocére eis{x}

et corrípuit pro eis reges:

{v}15{/v}«Nolíte tángere christos meos{x}

et in prophétis meis nolíte malignári».

{v}16{/v}Et vocávit famem super terram{x}

et omne báculum panis contrívit.

{v}17{/v}Misit ante eos virum,{x}

in servum venúmdatus est Ioseph.

{v}18{/v}Strinxérunt in compédibus pedes eius,{x}

in ferrum intrávit collum eius,

{v}19{/v}donec veníret verbum eius,{x}

elóquium Dómini purgáret eum.

{v}20{/v}Misit rex et solvit eum,{x}

princeps populórum, et dimísit eum;

{v}21{/v}constítuit eum dóminum domus suæ{x}

et príncipem omnis possessiónis suæ,

{v}22{/v}ut erudíret príncipes eius sicut semetípsum{x}

et senes eius prudéntiam docéret.

{v}23{/v}Et intrávit Israel in Ægýptum,{x}

et Iacob peregrínus fuit in terra Cham.

{v}24{/v}Et auxit pópulum suum veheménter{x}

et confortávit eum super inimícos eius.

{v}25{/v}Convértit cor eórum, ut odírent pópulum eius{x}

et dolum fácerent in servos eius.

{v}26{/v}Misit Móysen servum suum,{x}

Aaron, quem elégit.

{v}27{/v}Pósuit in eis verba signórum suórum{x}

et prodigiórum in terra Cham.

{v}28{/v}Misit ténebras et obscurávit,{x}

et restitérunt sermónibus eius.

{v}29{/v}Convértit aquas eórum in sánguinem{x}

et occídit pisces eórum.

{v}30{/v}Edidit terra eórum ranas{x}

in penetrálibus regum ipsórum.

{v}31{/v}Dixit, et venit cœnomýia{x}

et scínifes in ómnibus fínibus eórum.

{v}32{/v}Pósuit plúvias eórum grándinem,{x}

ignem comburéntem in terra ipsórum.

{v}33{/v}Et percússit víneas eórum et ficúlneas eórum{x}

et contrívit lignum fínium eórum.

{v}34{/v}Dixit, et venit locústa{x}

et bruchus, cuius non erat númerus,

{v}35{/v}et comédit omne fenum in terra eórum{x}

et comédit fructum terræ eórum.

{v}36{/v}Et percússit omne primogénitum in terra eórum,{x}

primítias omnis róboris eórum.

{v}37{/v}Et edúxit eos cum argénto et auro;{x}

et non erat in tríbubus eórum infírmus.

{v}38{/v}Lætáta est Ægýptus in profectióne eórum,{x}

quia incúbuit timor eórum super eos.

{v}39{/v}Expándit nubem in protectiónem{x}

et ignem, ut lucéret eis per noctem.

{v}40{/v}Petiérunt, et venit cotúrnix,{x}

et pane cæli saturávit eos.

{v}41{/v}Dirúpit petram, et fluxérunt aquæ,{x}

abiérunt in sicco flúmina.

{v}42{/v}Quóniam memor fuit verbi sancti sui{x}

ad Abraham púerum suum.

{v}43{/v}Et edúxit pópulum suum in exsultatióne,{x}

eléctos suos in lætítia.

{v}44{/v}Et dedit illis regiónes géntium,{x}

et labóres populórum possedérunt,

{v}45{/v}ut custódiant iustificatiónes eius{x}

et leges eius servent.

HTML © Juraj Vidéky