September

SEPTEMBER

Die 3 septembris

S. GREGORII MAGNI, PAPÆ ET ECCLESIÆ DOCTORIS

Memoria

Natus est Romæ circa annum 540. Cursum honorum ingressus, præfectus Urbis renuntiatus est. Vita monastica inita, diaconus ordinatus et munere legati Constantinopoli functus est. Anno 590, die 3 septembris, ad Petri cathedram evectus, verum pastorem se exhibuit in rebus gerendis, in pauperibus iuvandis, in fide propaganda vel firmanda. Multa étiam scripsit de re morali et theologica. Mortuus est anno 604, die 12 martii.

De Communi pastorum: pro papis, et doctorum Ecclesiæ, præter sequentia:

Ad Laudes matutinas

HYMNUS

Anglórum iam apóstolus,

nunc angelórum sócius,

ut tunc, Gregóri, géntibus,

succúrre iam credéntibus.

Tu largas opum cópias

omnémque mundi glóriam

spernis, ut inops ínopem

Iesum sequáris príncipem.

Te celsus Christus póntifex

suæ præfert Ecclésiæ;

sic Petri gradum pércipis,

cuius et normam séqueris.

Scriptúræ sacræ mýstica

mire solvis ænígmata,

excélsaque mystéria

te docet ipsa Véritas.

O póntifex egrégie,

lux et decus Ecclésiæ,

non sinas in perículis

quos tot mandátis ínstruis.

Sit Patri laus ingénito,

sit decus Unigénito,

sit utriúsque párili

maiéstas summa Flámini. Amen.

Ad Benedictus, ant. Pastor exímius Gregórius pastorális vitæ spécimen trádidit et régulam.

ORATIO

Deus, qui pópulis tuis indulgéntia cónsulis et amóre domináris, da spíritum sapiéntiæ, intercedénte beáto Gregório papa, quibus dedísti régimen disciplínæ, ut de proféctu sanctárum óvium fiant gáudia ætérna pastórum.

Ad Vesperas

HYMNUS Anglórum, ut ad Laudes matutinas.

Ad Magnificat, ant. Gregórius præsul implébat actu quidquid sermóne docébat, ut esset exémplum mýstica verba loquens.

Die 8 septembris

IN NATIVITATE BEATÆ MARIÆ VIRGINIS

Festum

Ad Invitatorium

Ant. Nativitátem Vírginis Maríæ celebrémus: Christum eius Fílium adorémus Dóminum.

Ad Laudes matutinas

HYMNUS

O sancta mundi dómina,

regína cæli ínclita,

o stella maris fúlgida,

virgo mater mirífica,

Appáre, dulcis fília,

nitésce iam, virgúncula,

florem latúra nóbilem,

Christum Deum et hóminem.

Natális tui ánnua

en cólimus sollémnia,

quo stirpe delectíssima

mundo fulsísti génita.

Per te sumus, terrígenæ

simúlque iam cælígenæ,

pacáti pace nóbili,

more non æstimábili.

Sit Trinitáti glória

per sæculórum sǽcula,

cuius vocáris múnere

mater beát{i}a{/i} Ecclésiæ. Amen.

Ant. 1Natívitas gloriósæ Vírginis Maríæ ex sémine Abrahæ, ortæ de tribu Iuda, clara ex stirpe David.

Psalmi et canticum de dominica hebd. I.

Ant. 2Quando nata est Virgo sacratíssima, tunc illuminátus est mundus; stirps beáta, radix sancta et benedíctus fructus eius.

Ant. 3Cum iucunditáte Nativitátem beátæ Maríæ celebrémus, ut ipsa pro nobis intercédat ad Dóminum Iesum Christum.

LECTIO BREVIS

{r}Is 11, 1-3{/r}

Et egrediétur virga de stirpe Iesse, et flos de radíce eius ascéndet; et requiéscet super eum spíritus Dómini: spíritus sapiéntiæ et intelléctus, spíritus consílii et fortitúdinis, spíritus sciéntiæ et timóris Dómini; et delíciæ eius in timóre Dómini.

RESPONSORIUM BREVE

Elégit eam Deus, {*} Et præelégit eam.

In tabernáculo suo habitáre facit eam. {*}

Et præelégit eam.

Glória Patri, et Fílio, et Spirítui Sancto.

Elégit eam Deus, {*} Et præelégit eam.

Ad Benedictus, ant. Natívitas tua, Dei Génetrix Virgo, gáudium annuntiávit univérso mundo: ex te enim ortus est sol iustítiæ, Christus Deus noster; qui solvens maledictiónem dedit benedictiónem, et confúndens mortem, donávit nobis vitam sempitérnam.

PRECES de Communi.

ORATIO

Fámulis tuis, quǽsumus, Dómine, cæléstis grátiæ munus impertíre, ut, quibus beátæ Vírginis partus éxstitit salútis exórdium, Nativitátis eius festívitas pacis tríbuat increméntum.

AD HORAM MEDIAM

PSALMODIA

Ant. 1 Natívitas est hódie sanctæ Maríæ Vírginis, cuius vita ínclita cunctas illústrat Ecclésias.

Ant. 2 Regáli ex progénie María exórta refúlget, cuius précibus nos adiuvári, mente et spíritu devotíssime póscimus.

Ant. 3 Corde et ánimo Christo canámus glóriam in hac sacra festivitáte præcélsæ Genetrícis Dei Maríæ.

AD TERTIAM

LECTIO BREVIS

{r}Cant 6, 10{/r}

Quæ est ista, quæ progréditur quasi auróra consúrgens, pulchra ut luna, elécta ut sol, terríbilis ut castrórum ácies ordináta?

Beáti qui áudiunt verbum Dei.

Et custódiunt illud.

AD SEXTAM

LECTIO BREVIS

{r}Iudt 13, 18. 19{/r}

Benedíctus Dóminus, Deus noster, qui creávit cælum et terram, qui diréxit te in vulnus cápitis príncipis inimicórum nostrórum. Quóniam non discédet laus tua a corde hóminum memorántium virtútis Dei usque in sempitérnum.

Beáta víscera Maríæ Vírginis.

Quæ portavérunt ætérni Patris Fílium.

AD NONAM

LECTIO BREVIS

{r}Ap 21, 3{/r}

Ecce tabernáculum Dei cum homínibus! Et habitábit cum eis, et ipsi pópuli eius erunt, et ipse Deus cum eis erit eórum Deus.

Benedícta tu in muliéribus.

Et benedíctus fructus ventris tui.

Ad Vesperas

HYMNUS

Beáta Dei génetrix,

nitor humáni géneris,

per quam de servis líberi

lucísque sumus fílii;

María, virgo régia,

David stirpe progénita,

non tam patérna nóbilis

quam dignitáte súbolis,

Tu nos, avúlso véteri,

complánta novo gérmini;

per te sit genus hóminum

regále sacerdótium.

Tu nos culpárum néxibus

sacris absólve précibus;

tua proméntes mérita

ad cæli transfer prǽmia.

Sit Trinitáti glória,

o Virgo nobilíssima,

quæ te suórum múnerum

thesáurum dat magníficum. Amen.

Ant. 1De Iesse progénie procéssit Virgo María, in cuius thálamum introívit Spíritus Altíssimi.

Psalmi et canticum de Communi b. Mariæ V.

Ant. 2Natívitas est hódie sanctæ Maríæ Vírginis, cuius pulchritúdinem respéxit Deus et visitávit humilitátem.

Ant. 3Benedícta et venerábilis sancta María, Virgo Dei Génetrix, cuius Nativitátem celebrámus, ut intercéssio ipsíus sit pro nobis ad Dóminum.

LECTIO BREVIS

{r}Rom 9, 4-5{/r}

Sunt Israelítæ, quórum adóptio est filiórum et glória et testaménta et legislátio et cultus et promissiónes, quórum sunt patres, et ex quibus Christus secúndum carnem: qui est super ómnia Deus benedíctus in sǽcula. Amen.

RESPONSORIUM BREVE

Ave María, grátia plena; {*} Dóminus tecum.

Benedícta tu in muliéribus, et benedíctus fructus ventris tui. {*}

Dóminus tecum.

Glória Patri, et Fílio, et Spirítui Sancto.

Ave María, grátia plena; {*} Dóminus tecum.

Ad Magnificat, ant. Gloriósæ Vírginis Maríæ ortum digníssimum recolámus, cuius Dóminus humilitátem respéxit, quæ, Angelo nuntiánte, concépit Redemptórem mundi.

PRECES de Communi.

ORATIO ut ad Laudes matutinas.

Die 9 septembris

S. PETRI CLAVER, PRESBYTERI

Petrus Claver Verduni in Hispania natus est anno 1580; litteris et artibus studuit in Universitate Barcinonensi et deinde Societatem Iesu ingressus est. Missionariam vocationem exaudivit speciatim ope S. Alphonsi Rodríguez, ianitoris in Collegio Maioricensi. Sacerdotio initiatus in missione Columbiana, ibidem usque ad mortem apostolatum exercuit inter servos Nigritas, factus ex voto «Æthiopum semper servus». Viribus fractis, Carthagena in Columbia obiit die 8 septembris 1654.

De Communi pastorum: pro presbyteris, vel sanctorum virorum: pro iis qui opera misericordiæ exercuerunt.

ORATIO

Deus, qui beátum Petrum servórum servum effecísti eúmque mira in eis iuvándis caritáte et patiéntia roborásti, eius nobis intercessióne concéde, ut, quæ Iesu Christi sunt, quæréntes, próximos ópere et veritáte diligámus.

Die 12 septembris

SS. NOMINIS BEATÆ VIRGINIS MARIÆ

De commune B. Mariæ Virginis, præter sequentia:

ORATIO

Concéde, quǽsumus, omnípotens Deus, ut cunctis gloriósum beátæ Maríæ Vírginis nomen celebrántibus, misericórdiæ tuæ benefícia ipsa procúret.

Die 13 septembris

S. IOANNIS CHRYSOSTOMI, EPISCOPI ET ECCLESIÆ DOCTORIS

Memoria

Antiochiæ natus est circa annum 349; optime educatus, vitam asceticam cœpit, et sacerdotio initiatus, magno cum fructu munere prædicationis functus est. Episcopus Constantinopolitanus anno 397 electus, optimum se præbuit pastorem, mores cleri et fidelium ad amussim redigere satagens. Odio aulæ imperialis et invidorum obrutus, semel et bis exsulare coactus est; ærumnis confectus, mortuus est apud Comanam in Ponto, die 14 septembris anni 407. Multa dixit et scripsit ad doctrinam catholicam explicandam et vitam christianam recte informandam, ita ut nomine Chrysostomi appellari meruerit.

De Communi pastorum: pro episcopis, et doctorum Ecclesiæ.

Ad Laudes matutinas et Vesperas

HYMNUS

Laude te cives súperi corónant,

magne Ioánnes, sociúsque noster

iúngitur cantus, generóse præsul,

celse magíster.

Aureo profers veheménter ore

verba quæ dives facilísqu{i}e{/i} amóris

vena progígnit, fériunt vel acri

vúlnere noxas.

Ipse virtútum spéculum nitéscis

ac tuæ plebi méritis corúscas,

ómnibus, Pauli velut æmulátor,

ómnia factus.

Nemo te frangit, nihil imperántum

te domant iræ rutilǽqu{i}e{/i} honórem

óbtines palmæ venerándus exsul,

péctore martyr.

Nunc tuis valde précibus iuvémur,

ut Dei sedem céleres petámus,

dúlcibus tecum sonitúr{i}i{/i} amóris

vócibus hymnos. Amen.

ORATIO

Deus, in te sperántium fortitúdo, qui beátum Ioánnem Chrysóstomum epíscopum mira eloquéntia et tribulatiónis experiménto claréscere voluísti, da nobis, quǽsumus, ut, eius doctrínis erudíti, invíctæ patiéntiæ roborémur exémplo.

Die 14 septembris

IN EXALTATIONE SANCTÆ CRUCIS

Festum

(quando festum occurit die dominica)

Ad I Vesperas

HYMNUS Vexílla regis ut ad II Vesperas.

PSALMODIA

Ant. 1Crucifíxus surréxit a mórtuis et redémit nos, allelúia. Psalmus 146 (147 A)

Ant. 2In médio civitátis sanctæ Ierúsalem lignum vitæ, et fólia ligni ad sanitátem géntium, allelúia. Psalmus 147 (147 B)

Ant. 3Nos autem gloriári opórtet in cruce Dómini nostri Iesu Christi. Canticum

Phil 2, 6-11

LECTIO BREVIS

{r}1 Cor 1, 23-24{/r}

Prædicámus Christum crucifíxum, Iudǽis quidem scándalum, géntibus autem stultítiam; ipsis autem vocátis, Iudǽis atque Græcis, Christum Dei virtútem et Dei sapiéntiam.

RESPONSORIUM BREVE

Hoc signum erit in cælo, {*} Cum Dóminus vénerit.

Leváte cápita vestra: appropínquat redémptio vestra. {*}

Cum Dóminus vénerit.

Glória Patri, et Fílio, et Spirítui Sancto.

Hoc signum erit in cælo, {*} Cum Dóminus vénerit.

Ad Magnificat, ant. Oportébat pati Christum et resúrgere a mórtuis, et ita intráre in glóriam suam.

PRECES

Redemptórem nostrum, qui per crucem suam nos redémit, fidénter deprecémur:

Per crucem exálta nos ad regnum tuum.

Christe, qui teípsum exinanísti, formam servi accípiens, in similitúdinem hóminum factus,

præsta ut membra Ecclésiæ imiténtur humilitátem tuam.

Per crucem exálta nos ad regnum tuum.

Christe, qui humiliásti teípsum, factus obœ́diens usque ad mortem, mortem autem crucis,

da servis tuis obœdiéntiam et patiéntiam.

Per crucem exálta nos ad regnum tuum.

Christe, qui exaltátus es a Deo et accepísti nomen super omne nomen,

concéde fidélibus tuis perseverántiam usque ad finem.

Per crucem exálta nos ad regnum tuum.

Christe, cuius in nómine omne genu flectétur cæléstium, terréstrium et infernórum,

infúnde caritátem homínibus, ut te adórent in pace.

Per crucem exálta nos ad regnum tuum.

Christe, quem omnis lingua confitébitur Dóminum in glóriam Dei Patris,

áccipe fratres nostros defúnctos in regnum beatitúdinis perpétuæ.

Per crucem exálta nos ad regnum tuum.

Pater noster.

ORATIO

Deus, qui Unigénitum tuum crucem subíre voluísti, ut salvum fáceret genus humánum, præsta, quǽsumus, ut, cuius mystérium in terra cognóvimus, eius redemptiónis prǽmia in cælo cónsequi mereámur.

Ad Invitatorium

Ant. Christum regem pro nobis in cruce exaltátum, veníte, adorémus.

Ad Laudes matutinas

HYMNUS

Signum crucis mirábile

totum per orbem prǽnitet,

in qua pepéndit ínnocens

Christus, redémptor ómnium.

Hæc arbor est sublímior

cedris, habet quas Líbanus,

quæ poma nescit nóxia,

sed ferre vitæ prǽmia.

Te, Christe, rex piíssime,

huius crucis signáculo

horis, moméntis ómnibus

muníre nos non ábnuas,

Ut ore tibi cónsono

et corde devotíssimo

possímus omni témpore

laudes reférre débitas.

Patri, tibi, Paráclito

sit æqua, Iesu, glória,

qui nos crucis victória

concédis usque pérfrui. Amen.

Ant. 1Crucem sanctam súbiit, qui inférnum confrégit; accínctus est poténtia, surréxit die tértia.

Psalmi et canticum de dominica hebd. I.

Ant. 2Crux benedícta nitet, Dóminus qua carne pepéndit atque cruóre suo vúlnera nostra lavit.

Ant. 3Crux alma fulget, per quam salus réddita est mundo: crux vincit, crux regnat, crux repéllit omne crimen, allelúia.

LECTIO BREVIS

{r}Hebr 2, 9-10{/r}

Vidémus Iesum propter passiónem mortis glória et honóre coronátum, ut grátia Dei pro ómnibus gustáverit mortem. Decébat enim eum, propter quem ómnia et per quem ómnia, qui multos fílios in glóriam addúxit, auctórem salútis eórum per passiónes consummáre.

RESPONSORIUM BREVE

Adorámus te, Christe, {*} Et benedícimus tibi.

Quia per crucem tuam redemísti mundum. {*}

Et benedícimus tibi.

Glória Patri, et Fílio, et Spirítui Sancto.

Adorámus te, Christe, {*} Et benedícimus tibi.

Ad Benedictus, ant. Crucem tuam adorámus, Dómine, et sanctam resurrectiónem tuam laudámus et glorificámus: ecce enim propter lignum venit gáudium in univérso mundo.

PRECES

Redemptórem nostrum, qui per crucem suam nos redémit, fidénter deprecémur:

Per crucem tuam salva nos, Dómine.

Fili Dei, qui per signum serpéntis ǽnei sanásti pópulum Israel,

prótege nos hódie a morsu peccáti.

Per crucem tuam salva nos, Dómine.

Fili hóminis, qui exaltátus es in cruce sicut a Móyse serpens in desérto,

exálta nos ad gáudia regni tui.

Per crucem tuam salva nos, Dómine.

Fili unigénite Patris, qui datus es mundo, ut omnis qui credit in te, non péreat,

concéde vitam ætérnam quæréntibus fáciem tuam.

Per crucem tuam salva nos, Dómine.

Fili dilécte Patris, qui non missus es in mundum ut iúdices mundum, sed ut per te salvétur mundus,

da fidem propínquis nostris, ne péreant.

Per crucem tuam salva nos, Dómine.

Fili ætérne Patris, qui ignem venísti míttere in terram et voluísti ut accendátur,

præsta, ut faciámus veritátem et veniámus ad lucem.

Per crucem tuam salva nos, Dómine.

Ad II Vesperas

HYMNUS

Vexílla regis pródeunt,

fulget crucis mystérium,

quo carne carnis cónditor

suspénsus est patíbulo;

Quo, vulnerátus ínsuper

mucróne diro lánceæ,

ut nos laváret crímine,

manávit und{i}a{/i} et sánguine.

Arbor decór{i}a{/i} et fúlgida,

ornáta regis púrpura,

elécta digno stípite

tam sancta membra tángere!

Beáta, cuius brácchiis

sæcli pepéndit prétium;

statéra fact{i}a{/i} est córporis

prædam tulítque tártari.

Salv{i}e{/i}, ara, salve, víctima,

de passiónis glória,

qua Vita mortem pértulit

et morte vitam réddidit!

O crux, ave, spes única!

in hac triúmphi glória

piis adáuge grátiam

reísque dele crímina.

Te, fons salútis, Trínitas,

colláudet omnis spíritus;

quos per crucis mystérium

salvas, fove per sǽcula. Amen.

PSALMODIA

Ant. 1 O magnum pietátis opus! Mors mórtua tunc est, quando hoc in ligno mórtua vita fuit. Psalmus 110, 1-5. 7

Ant. 2 Tuam crucem adorámus, Dómine, tuam gloriósam recólimus passiónem; miserére nostri, qui passus es pro nobis. Psalmus 116, 10-19

Ant. 3 Adorámus te, Christe, et benedícimus tibi, quia per crucem tuam redemísti mundum. Canticum

Ap 4, 11; 5, 9. 10. 12

LECTIO BREVIS

{r}1 Cor 1, 23-24{/r}

Prædicámus Christum crucifíxum, Iudǽis quidem scándalum, géntibus autem stultítiam; ipsis autem vocátis, Iudǽis atque Græcis, Christum Dei virtútem et Dei sapiéntiam.

RESPONSORIUM BREVE

O crux gloriósa, {*} In te triumphávit Rex angelórum.

Et cruóre suo vúlnera nostra lavit. {*}

In te triumphávit Rex angelórum.

Glória Patri, et Fílio, et Spirítui Sancto.

O crux gloriósa, {*} In te triumphávit Rex angelórum.

Ad Magnificat, ant. O crucis victória et admirábile signum, in cælésti cúria fac nos captáre triúmphum.

PRECES ut ad I Vesperas.

AD HORAM MEDIAM

PSALMODIA

Ant. 1 Salva nos, Christe salvátor, per virtútem crucis; qui salvásti Petrum in mari, miserére nobis.

Ant. 2 Salvátor mundi, salva nos; qui per crucem et sánguinem tuum redemísti nos, auxiliáre nobis, te deprecámur, Deus noster.

Ant. 3 Per tuam crucem salva nos, Christe redémptor, qui mortem nostram moriéndo destruxísti et vitam resurgéndo reparásti.

AD TERTIAM

LECTIO BREVIS

{r}Hebr 5, 7{/r}

Christus in diébus carnis suæ, preces supplicationésque ad eum, qui possit salvum illum a morte fácere, cum clamóre válido et lácrimis ófferens et exaudítus pro sua reveréntia; et quidem cum esset Fílius, dídicit ex his, quæ passus est, obœdiéntiam et, consummátus, factus est ómnibus obœdiéntibus sibi auctor salútis ætérnæ.

Adorámus te, Christe, et benedícimus tibi.

Quia per crucem tuam redemísti mundum.

AD SEXTAM

LECTIO BREVIS

{r}Eph 1, 7-8{/r}

In Christo habémus redemptiónem per sánguinem eius, remissiónem peccatórum, secúndum divítias grátiæ eius, qua superabundávit in nobis.

Omnis terra adóret te et psallat tibi.

Psalmum dicat nómini tuo, Dómine.

AD NONAM

LECTIO BREVIS

{r}1 Petr 1, 18-19{/r}

Non corruptibílibus argénto vel auro redémpti estis de vana vestra conversatióne a pátribus trádita, sed pretióso sánguine quasi Agni incontamináti et immaculáti Christi.

Hoc signum crucis erit in cælo.

Cum Dóminus ad iudicándum vénerit.

Die 15 septembris

BEATÆ MARIÆ VIRGINIS PERDOLENTIS

Sollemnitas

ORATIO

Deus, qui Fílio tuo in cruce exaltáto compatiéntem Matrem astáre voluísti, da Ecclésiæ tuæ, ut, Christi passiónis cum ipsa consors effécta, eiúsdem resurrectiónis párticeps esse mereátur.

Ad Invitatorium

Ant. Salvatórem mundi, qui passióni suæ Matrem sociávit, veníte, adorémus.

Ad Laudes matutinas

HYMNUS

Eia, mater, fons amóris,

me sentíre vim dolóris

fac, ut tecum lúgeam.

Fac ut árdeat cor meum

in amándo Christum Deum,

ut sibi compláceam.

Sancta mater, istud agas,

Crucifíxi fige plagas

cordi meo válide.

Tui Nati vulneráti,

tam dignáti pro me pati

pœnas mecum dívide.

Fac me vere tecum flere,

Crucifíxo condolére,

donec ego víxero.

Iuxta crucem tecum stare

ac me tibi sociáre

in planctu desídero.

Quando corpus moriétur,

fac ut ánimæ donétur

paradísi glória. Amen.

Ant. 1Adhǽsit ánima mea post te, Dómine Iesu.

Psalmi et canticum de dominica hebd. I.

Ant. 2Communicántes Christi passiónibus, gaudeámus.

Ant. 3Complácuit Deus per sánguinem Christi reconciliáre ómnia in ipsum.

LECTIO BREVIS

{r}Col 1, 24-25{/r}

Nunc gáudeo in passiónibus pro vobis et adímpleo ea, quæ desunt passiónum Christi, in carne mea pro córpore eius, quod est ecclésia, cuius factus sum ego miníster secúndum dispensatiónem Dei, quæ data est mihi in vos, ut ímpleam verbum Dei.

RESPONSORIUM BREVE

Per te salútem hauriámus, {*} Virgo María.

Ex vulnéribus Christi. {*}

Virgo María.

Glória Patri, et Fílio, et Spirítui Sancto.

Per te salútem hauriámus, {*} Virgo María.

Ad Benedictus, ant. Gaude, pérdolens Mater, quæ post tantos agónes glória cælésti redimíta ássides Nato, universórum regína.

PRECES de Communi

Ad Vesperas

HYMNUS

Virgo vírginum præclára,

mihi iam non sis amára;

fac me tecum plángere.

Fac ut portem Christi mortem,

passiónis fac me sortem

et plagas recólere.

Fac me plagis vulnerári,

cruce hac inebriári ,

et cruóre Fílii.

Flammis urar ne succénsus,

per te, Virgo, sim defénsus

in die iudícii.

Fac me cruce custodíri,

morte Christi præmuníri,

confovéri grátia.

Quando corpus moriétur,

fac ut ánimæ donétur

paradísi glória. Amen.

Ant. 1Christus est pax nostra, qui per crucem pacificávit nos cum Deo.

Psalmi et canticum de Communi b. Mariæ V.

Ant. 2Accedámus ad civitátem Dei vivéntis et testaménti novi mediatórem Iesum.

Ant. 3In Christo habémus redemptiónem per sánguinem eius.

LECTIO BREVIS

{r}2 Tim 2, 10-12a{/r}

Omnia sustíneo propter eléctos, ut et ipsi salútem consequántur, quæ est in Christo Iesu cum glória ætérna. Fidélis sermo: Nam si commórtui sumus, et convivémus; si sustinémus, et conregnábimus.

RESPONSORIUM BREVE

Stabat sancta María, cæli regína et mundi Dómina {*} Iuxta crucem Dómini.

Felix est illa, quæ sine morte méruit palmam martýrii. {*}

Iuxta crucem Dómini.

Glória Patri, et Fílio, et Spirítui Sancto.

Stabat sancta María, cæli regína et mundi Dómina {*} Iuxta crucem Dómini.

Ad Magnificat, ant. Cum vidísset Iesus matrem stantem iuxta crucem et discípulum quem diligébat, dicit matri suæ: Múlier, ecce fílius tuus. Deínde dicit discípulo: Ecce mater tua.

PRECES de Communi

Die 16 septembris

SS. CORNELII, PAPÆ, ET CYPRIANI, EPISCOPI, MARTYRUM

Memoria

Cornelius ordinatus est episcopus Ecclesiæ Romanæ anno 251; contra schismaticos Novatianos pugnavit et a Cypriano adiutus auctoritatem suam potuit confirmare. Ab imperatore Gallo in exsilium pulsus, apud Centumcellas (Civitavecchia) mortuus est anno 253. Eius corpus, Romam translatum, in cœmeterio Callisti sepultum est.

Cyprianus natus est Carthagine circiter annum 210 ex familia ethnica. Ad fidem conversus et sacerdotio initiatus, episcopus civitatis ordinatus est anno 249. Temporibus calamitosis Ecclesiam optime rexit operibus et scriptis. In persecutione Valeriani prius exsilio mulctatus, deinde anno 258 die 14 mensis septembris martyr occubuit.

De Communi plurimorum martyrum, vel pastorum.

Ad Laudes matutinas

Ad Benedictus, ant. Pretiósa mors, quæ emit immortalitátem prétio sui sánguinis!

ORATIO

Deus, qui pópulo tuo beátos Cornélium et Cypriánum sédulos pastóres et invíctos mártyres præstitísti, concéde, ut, eórum intercessióne, fide et constántia roborémur, et pro Ecclésiæ unitáte óperam tribuámus impénse.

Ad Vesperas

Ad Magnificat, ant. O beátam Ecclésiam nostram, quam gloriósus mártyrum Christi sanguis illústrat!

Die 17 septembris

S. ROBERTI BELLARMINO, EPISCOPI ET ECCLESIÆ DOCTORIS

Natus est anno 1542 in urbe Montis Politiani (Montepulciano) in Tuscia. Societatem Iesu ingressus Romæ et sacerdotio insignitus, præclaras habuit disputationes ad fidem catholicam tuendam, et theologiam docuit in Collegio Romano. Inter cardinales electus et episcopus Capuanus nominatus, apud Romanas Congregationes multas quæstiones illis temporibus propositas enodavit. Mortuus est Romæ anno 1621.

De Communi pastorum: pro episcopis, et doctorum Ecclesiæ.

ORATIO

Deus, qui, ad tuæ fidem Ecclésiæ vindicándam, beátum Robértum epíscopum mira eruditióne et virtúte decorásti, eius intercessióne concéde, ut pópulus tuus eiúsdem fídei semper integritáte lætétur.

Eodem die 17 septembris

S. HILDEGARDIS BINGENSIS, VIRGINIS ET ECCLESIÆ DOCTORIS

Bermeshernii, in Germania, anno 1098 orta est, et anno 1115 apud abbatiam Benedictinam Montis Sancti Disibodi, religiosam professionem nuncupavit. Anno circiter 1150 rnonasteriurn Montis Sancti Ruperti, prope Bingium, fundavit et uti abbatissa rexit. Scientiis naturalibus et arte musica perita, ita in plurimis scriptis revelationem, quam mystica contemplatione experta erat, clero et populo pie exposuit, opera pænitentiæ prædicavit et errores contra doctrinam confutavit, ut etiam principes et Romani Pontifices consiliurn eius sollicite exquirerent. Morbo affecta, obiit anno 1179.

De Cornrnuni virginurn: pro una virgine, vel sanctarurn rnulierurn: pro religiosis.

ORATIO

Deus, fons vitæ, qui sanctam Hildegárdem, vírginem, prophético spíritu imbuísti, fac nos, quǽsumus, eius exémplo et intercessióne, vias tuas scire et in huius sǽculi calígine lucis tuæ claritátem cognóscere.

Die 19 septembris

S. IANUARII, EPISCOPI ET MARTYRIS

Episcopus Beneventanus, in persecutione Diocletiani martyrium subiit Puteolis, apud Sulphurariam, unde eius corpus Neapolim translatum est, ubi potissimum colitur.

De Communi unius martyris, vel pastorum: pro episcopis.

ORATIO

Deus, qui nos concédis beáti Ianuárii mártyris memóriam venerári, da nobis in ætérna beatitúdine de eius societáte gaudére.

Die 20 septembris

SS. ANDREÆ KIM TAEGǑN, PRESBYTERI ET PAULI CHǑNG HASANG, ET SOCIORUM, MARTYRUM

Memoria

Ineunte sæculo XVII, quorundam laicorum industria, primum fides christiana ingressa est in Coream. Fortis ac fervens communitas absque pastoribus, fere tantum a laicis ducta fotaque fuit usque ad annum 1836, quo vertente primi missionarii ex Gallia venientes furtim in regionem intraverunt. Ex hac communitate, in persecutionibus annorum 1839, 1846 et 1866, exorti sunt 103 sancti martyres, inter quos eminent primus presbyter et ardens pastor animarum Andreas Kim Taegǒn et insignis apostolus laicus Paulus Chǒng Hasang; ceteri vero sunt prævalenter laici, viri ac mulieres, matrimonio iuncti vel non, senes, iuvenes et pueri, qui supplicio affecti pretioso martyrum sanguine copiosa Coreanæ Ecclesiæ primordia consecrarunt.

De Communi plurimorum martyrum.

ORATIO

Deus, ómnium géntium creátor et salus, qui in Coreána regióne ad cathólicam fidem pópulum adoptiónis mirabíliter vocásti atque sanctórum mártyrum Andréæ, Páuli ac sociórum gloriósa confessióne créscere fecísti, eórum exémplo et intercessióne concéde, ut nos quoque in mandátis tuis usque ad mortem perseveráre valeámus.

Die 21 septembris

S. MATTHÆI, APOSTOLI ET EVANGELISTÆ

Festum

Capharnaum natus, munus exactoris vectigalium exercebat cum a Iesu vocatus est. Evangelium conscripsit lingua hebraica et in Oriente prædicasse fertur.

De Communi Apostolorum, præter sequentia:

Ad Laudes matutinas

HYMNUS

Præclára qua tu glória,

Levi beáte, cíngeris,

laus est Dei cleméntiæ,

spes nostr{i}a{/i} ad indulgéntiam.

Telóneo quand{i}o{/i} ássidens

nummis inhǽres ánxius,

Matthǽe, Christus ádvocans

opes tibi quas prǽparat!

Iam cordis ardens ímpetu

curris, Magístrum súscipis,

sermóne factus ínclito

princeps in urbe cǽlica.

Tu verba vitæ cólligens

Davídque facta Fílii,

per scripta linquis áurea

cæléste mundo pábulum.

Christum per orbem núntians

conféssus atque sánguine,

dilectiónis vívidæ

suprém{i}o{/i} honóras pígnore.

O martyr atqu{i}e{/i} apóstole,

evangelísta nóbilis,

tecum fac omn{i}e{/i} in sǽculum

Christo canámus glóriam. Amen.

Ad Benedictus, ant. Vidit Iesus hóminem sedéntem in telóneo, Matthǽum nómine; et ait illi: Séquere me. Et surgens secútus est eum.

ORATIO

Deus, qui ineffábili misericórdia beátum Matthǽum ex publicáno Apóstolum es dignátus elígere, da nobis, eius exémplo et intercessióne suffúltis, ut, te sequéntes, tibi fírmiter adhærére mereámur.

Ad Vesperas

Ad Magnificat, ant. Misericórdiam volo, et non sacrifícium, dicit Dóminus; non enim veni vocáre iustos, sed peccatóres.

Die 23 septembris

S. PII DE PIETRELCINA, PRESBYTERI

Memoria

In vico Pietrelcina apud Beneventum in Italia ortus est anno 1887 et, Ordinem Fratrum Minorum Capuccinorum ingressus ac sacerdotio auctus, præsertim in conventu oppiduli Sancti Ioannis Rotundi in Apulia summa cum pastorali deditione ministerium præbuit, fidelium spirituali moderatione pænitentium reconciliatione et providenti erga infirmos pauperesque cura, populo Dei inserviens in oratione et humilitate. Christo crucifixo plene configuratus, die 23 septembris 1968 peregrinationem terrenam complevit.

ORATIO

Omnípotens sempitérne Deus, qui sanctum Pium, presbýterum, crucis Filii tui singulári grátia partícipem esse donásti, et per eius ministérium misericórdiæ tuæ mirabília renovásti, concéde nobis, ut, eius intercessióne, passiónibus Christi iúgiter sociáti ad resurrectiónis glóriam felíciter perducámur.

Die 26 septembris

SS. COSMÆ ET DAMIANI, MARTYRUM

Ex antiquioribus litterarum memoriis constat eorum sepulcrum Cyrrhi in Syria fuisse, ubi et basilica in eorum honorem exstructa erat. Exinde eorum cultus Romam pervenit, et in totam Ecclésiam diffusus est.

De Communi plurimorum martyrum.

ORATIO

Magníficet te, Dómine, sanctórum tuórum Cosmæ et Damiáni veneránda memória, quia et illis glóriam sempitérnam, et opem nobis ineffábili providéntia contulísti.

Die 27 septembris

S. VINCENTII DE PAUL, PRESBYTERI

Memoria

Natus est in Aquitania anno 1581. Studiorum curriculum emensus et sacerdotio insignitus, Lutetiæ Parisiorum parochi munere functus est. Ad clerum sancte formandum et pauperes sublevandos Congregationem Missionis instituit, et cooperante sancta Ludovica de Marillac étiam Congregationem Puellarum Caritatis. Mortuus est Lutetiæ Parisiorum anno 1660.

De Communi pastorum: pro presbyteris, vel sanctorum virorum: pro iis qui opera misericordiæ exercuerunt, præter sequentia:

Ad Laudes matutinas

Ad Benedictus, ant. Erat Vincéntius consolátor mæréntium, insígnis defénsor pupillórum, ac viduárum munerátor.

ORATIO

Deus, qui ad salútem páuperum et cleri institutiónem beátum Vincéntium presbýterum virtútibus apostólicis imbuísti, præsta, quǽsumus, ut, eódem spíritu fervéntes, et amémus quod amávit, et quod dócuit operémur.

Ad Vesperas

Ad Magnificat, ant. Quod uni ex mínimis meis fecístis, mihi fecístis, dicit Dóminus.

Die 28 septembris

S. VENCESLAI, MARTYRIS

Natus in Bohemia circa annum 907, christiane educatus ab amita, regimen ducatus suscepit anno fere 925. Multas difficultates sustinuit in subditis regendis et in fide informandis. A fratre Boleslao proditus, occisus fuit a sicariis anno 935. Inter martyres statim habitus, ut præcipuus patronus Bohemiæ colitur.

De Communi pastorum: pro presbyteris, vel sanctorum virorum: pro iis qui opera misericordiæ exercuerunt, præter sequentia:

ORATIO

Deus, qui beátum mártyrem Vencesláum cælésti regno terrénum postpónere docuísti, eius précibus concéde, ut, nosmetípsos abnegántes, tibi toto corde adhærére valeámus.

Eodem die 28 septembris

S. LAURENTII RUIZ ET SOCIORUM, MARTYRUM

Sæculo XVII vertente (annis 1633-1637) sedecim martyres, scilicet Laurentius Ruiz eiusque socii, Ordinis Sancti Dominici sodales vel ad ipsum consociati, diversi quidem natione, tempore et condicione, fidem christianam per ínsulas Philippinas, Formosam et ínsulas Iaponicas disseminarunt, pro Christi amore in urbe Nagasakiensi in Iaponia sanguinem suum fundentes semen futuræ christianitatis copiosum sparserunt.

De Communi plurimorum martyrum.

ORATIO

Beatórum mártyrum tuórum Lauréntii et sociórum, quǽsumus, Dómine Deus, patiéntiam in servítio tui et próximi nobis concéde, quia in regno tuo sunt beáti, qui persecutiónem patiúntur propter iustítiam.

Die 29 septembris

SS. MICHAELIS, GABRIELIS ET RAPHAELIS, ARCHANGELORUM

Festum

Ad Invitatorium

Ant. In conspéctu angelórum, veníte, adorémus Dóminum.

Ad Laudes matutinas

HYMNUS

Tibi, Christe, splendor Patris,

vita, virtus córdium,

in conspéctu angelórum

votis, voce psállimus;

alternántes concrepándo

melos damus vócibus.

Collaudámus venerántes

ínclitos archángelos,

sed præcípue primátem

cæléstis exércitus,

Michaélem in virtúte

conteréntem Sátanam.

Quo custóde procul pelle,

rex Christe piíssime,

omne nefas inimíci;

mundos cord{i}e{/i} et córpore

paradíso redde tuo

nos sola cleméntia.

Glóriam Patri melódis

personémus vócibus,

glóriam Christo canámus,

glóriam Paráclito,

qui Deus trinus et unus

exstat ante sǽcula. Amen.

Ant. 1Laudémus Dóminum, quem laudant ángeli, quem chérubim et séraphim «Sanctus, sanctus, sanctus» proclámant.

Psalmi et canticum de dominica hebd. I.

Ant. 2Angeli Dómini, Dóminum benedícite in ætérnum.

Ant. 3Te sanctum Dóminum in excélsis laudant omnes ángeli, uno ore dicéntes: Te decet hymnus, Deus.

LECTIO BREVIS

{r}Gen 28, 12-13a{/r}

Vidit Iacob in sómnio scalam stantem super terram et cacúmen illíus tangens cælum, ángelos quoque Dei ascendéntes et descendéntes per eam et Dóminum inníxum scalæ dicéntem sibi: Ego sum Dóminus Deus Abraham patris tui et Deus Isaac.

RESPONSORIUM BREVE

Stetit ángelus {*} Iuxta aram templi.

Habens turíbulum áureum in manu sua. {*}

Iuxta aram templi.

Glória Patri, et Fílio, et Spirítui Sancto.

Stetit ángelus {*} Iuxta aram templi.

Ad Benedictus, ant. Amen amen dico vobis: Vidébitis cælum apértum, et ángelos Dei ascendéntes et descendéntes super Fílium hóminis.

PRECES

Fratres caríssimi, confiteámur Dómino, cui astat multitúdo angelórum psalléntium in unum, et acclamémus gaudéntes:

Benedícite Dómino, omnes ángeli eius.

Deus, qui ángelis tuis mandásti ut custódiant nos in ómnibus viis nostris,

deduc nos hódie sine offensióne per sémitas tuas.

Benedícite Dómino, omnes ángeli eius.

Pater, cuius fáciem in cælis semper vident ángeli nostri,

fac nos sine intermissióne quǽrere fáciem tuam.

Benedícite Dómino, omnes ángeli eius.

Deus, cuius fílii erunt sicut ángeli in cælo,

da nobis castitátem cordis et córporis.

Benedícite Dómino, omnes ángeli eius.

Deus, in adiutórium pópuli tui mitte Michaélem príncipem magnum,

ut eum deféndat in prœ́lio contra Sátanam et ángelos eius.

Benedícite Dómino, omnes ángeli eius.

Pater noster.

ORATIO

Deus, qui miro órdine angelórum ministéria hominúmque dispénsas, concéde propítius, ut, a quibus tibi ministrántibus in cælo semper assístitur, ab his in terra vita nostra muniátur.

AD HORAM MEDIAM

PSALMODIA

Ant. 1 Ecce Míchael, unus de princípibus primis, venit in adiutórium meum.

Ant. 2 Ecce Gábriel, quem víderam in visióne, cito volans tétigit me et dócuit me.

Ant. 3 Missus est Ráphael ángelus ad Tobíam et Saram, ut curáret eos.

AD TERTIAM

LECTIO BREVIS

{r}Dan 12, 1{/r}

In témpore illo consúrget Míchael, princeps magnus, qui stat pro fíliis pópuli tui, et erit tempus angústiæ, quale non fuit ab eo, quo gentes esse cœpérunt, usque ad tempus illud. Et in témpore illo salvábitur pópulus tuus, omnis, qui invéntus fúerit scriptus in libro.

Mittet Dóminus ángelos suos cum tuba et voce magna.

Et congregábunt eléctos eius a quáttuor ventis.

AD SEXTAM

LECTIO BREVIS

{r}Dan 9, 22-23{/r}

Gábriel ángelus locútus est mihi dixítque: Dániel, nunc egréssus sum, ut docérem te et intellégeres. Ab exórdio precum tuárum egréssus est sermo; ego autem veni, ut indicárem, quia vir desideriórum es tu; ergo animadvérte sermónem et intéllege visiónem.

Benedícite Dómino, omnes virtútes eius.

Minístri eius, qui fácitis voluntátem eius.

AD NONAM

LECTIO BREVIS

{r}Tob 12, 15a. 18a. 20{/r}

Ego sum Ráphael, unus ex septem ángelis sanctis, qui assístimus et ingrédimur ante claritátem Dómini. Cum essem vobíscum, non mea grátia eram vobíscum, sed voluntáte Dei. Ipsi benedícite ómnibus diébus, decantáte ei. Ecce ego ascéndo ad eum, qui me misit. Scríbite ómnia hæc, quæ contigérunt vobis.

Angelis suis Deus mandávit de te.

Ut custódiant te in ómnibus viis tuis.

Ad Vesperas

HYMNUS

Angelum pacis Míchael ad istam,

Christe, demítti rogitámus aulam,

cuncta quo crebro veniénte crescant

próspera nobis.

Angelus fortis Gábriel, ut hostem

pellat antíquum, vólitet supérne,

sǽpius templum cúpiens favéndo

vísere nostrum.

Angelum nobis médicum salútis

mitte de cælis Ráphael, ut omnes

sanet ægrótos paritérque nostros

dírigat actus.

Christe, sanctórum decus angelórum,

adsit illórum chorus usque nobis,

ut simul tandem Tríadi per ævum

cármina demus. Amen.

PSALMODIA

Ant. 1Eleváta est magnificéntia tua super cælos, Rex angelórum. Psalmus 8

Ant. 2 In conspéctu angelórum psallam tibi, Deus meus. Psalmus 137 (138)

Ant. 3 Vidi in médio throni Agnum stantem tamquam occísum, et audívi vocem angelórum multórum in circúitu throni. Canticum

Cf. Col 1, 12-20

LECTIO BREVIS

{r}Ap 1, 4b-5. 6b{/r}

Grátia vobis et pax ab eo, qui est et qui erat et qui ventúrus est, et a septem spirítibus, qui in conspéctu throni eius sunt, et ab Iesu Christo, qui est testis fidélis, primogénitus mortuórum et princeps regum terræ. Ei qui díligit nos et solvit nos a peccátis nostris in sánguine suo, glória et impérium.

RESPONSORIUM BREVE

Ascéndit fumus arómatum {*} In conspéctu Dómini.

De manu ángeli. {*}

In conspéctu Dómini.

Glória Patri, et Fílio, et Spirítui Sancto.

Ascéndit fumus arómatum {*} In conspéctu Dómini.

Ad Magnificat, ant. Gábriel ángelus locútus est Maríæ dicens: Ecce concípies in útero et páries fílium, et vocábis nomen eius Iesum.

PRECES

Dóminum deprecémur ut cum ángelis, qui fáciunt voluntátem eius, ad audiéndam vocem sermónum ipsíus promptióres reddámur. Ideóque orémus dicéntes:

Te rogámus, audi nos.

Ut per manus angelórum sicut fumus arómatum,

oratiónes nostræ coram te ascéndant.

Te rogámus, audi nos.

Ut per manus ángeli tui, in sublíme altáre tuum,

oblatiónes nostræ deferántur.

Te rogámus, audi nos.

Ut cum multitúdine cæléstis milítiæ glóriam in altíssimis Deo,

et in terra pacem homínibus annuntiáre valeámus.

Te rogámus, audi nos.

Ut in fine vitæ nostræ nos ángeli suscípiant

et ad pátriam paradísi perdúcant.

Te rogámus, audi nos.

Ut sígnifer sanctus Míchael ánimas fidélium defunctórum

in lucem sanctam repræséntet.

Te rogámus, audi nos.

Die 30 septembris

S. HIERONYMI, PRESBYTERI ET ECCLESIÆ DOCTORIS

Memoria

Stridone, in Dalmatia, natus est circa annum 340; Romæ litteris studuit ibique baptizatus est. Vitam asceticam amplexus, in Orientem perrexit et presbyter ordinatus est. Romam reversus, a secretis fuit Damasi papæ, ibique cœpit vertere sacros Libros in linguam latinam et vitam monasticam promovit. Bethlehem constitutus, mirum in modum Ecclesiæ necessitatibus particeps fuit. Multa conscripsit opera, præsertim commentaria in sacram Scripturam. Mortuus est Bethlehem anno 420.

De Communi doctorum Ecclesiæ, præter sequentia:

Ad Laudes matutinas et Vesperas

HYMNUS

Festíva cánimus laude Hierónymum,

qui nobis rádiat sidus ut éminens

doctrínæ méritis ac simul áctibus

vitæ fortis et ásperæ.

Hic verbum fídei sánctaque dógmata

scrutándo stúduit pándere lúcide,

aut hostes, véhemens ut leo, cóncitus

acri voce reféllere.

Insúdans álacer prata viréntia

Scriptúræ cóluit cǽlitus éditæ;

ex his et lócuples dúlcia prótulit

cunctis pábula grátiæ.

Desérti cúpiens grata siléntia,

ad cunas Dómini pérvigil ástitit,

ut carnem crúcians se daret íntime

Patri munus et hóstiam.

Tanti nos, pétimus te, Deus óptime,

doctóris précibus dírige, cónfove,

ut lætas líceat nos tib{i}i{/i} in ómnia

laudes pángere sǽcula. Amen.

ORATIO

Deus, qui beáto Hierónymo presbýtero suávem et vivum Scriptúræ sacræ afféctum tribuísti, da, ut pópulus tuus verbo tuo ubérius alátur, et in eo fontem vitæ invéniat.