JULIUS
Die 3 iulii
S. THOMÆ, APOSTOLI
Festum
De Communi Apostolorum, præter sequentia:
Ad Laudes matutinas
HYMNUS
Qui luce splendes órdinis
apostolórum máxima,
Thoma, benígnus áccipe
laudes tibi quas pángimus.
Te lúcidis in sédibus
amóre Christus cóllocat;
amóre promptus éxpetis
tu pro Magístro cómmori.
Te torquet et diléctio
narrántibus cum frátribus
vis certus esse, vísere,
palpáre Iesu vúlnera.
Quantóque cordis gáudio
ipsum misértum cónspicis,
Deúmque dicis crédulus,
fervór{i}e{/i} adórans péctoris!
Nobísque qui non vídimus
per te fides fit ácrior,
fit æstus et poténtior
quo Christ{i}i{/i} amórem quǽrimus.
Christo sit omnis glória,
qui te rogánte prǽbeat
nobis fid{i}e{/i} ambulántibus
ipsum vidére pérpetim. Amen.
Ant. 1Dicit Thomas: Dómine, nescímus quo vadis, et quómodo póssumus viam scire? Dicit ei Iesus: Ego sum via, véritas et vita.
Psalmi et canticum de dominica hebd. I.
Ant. 2 Thomas, qui dícitur Dídymus, non erat cum eis quando venit Iesus; dixérunt álii discípuli: Vídimus Dóminum, allelúia.
Ant. 3Mitte manum tuam et cognósce loca clavórum, et noli esse incrédulus sed fidélis, allelúia.
LECTIO BREVIS
{r}Eph 2, 19-22{/r}
Iam non estis extránei et ádvenæ, sed estis concíves sanctórum et doméstici Dei, superædificáti super fundaméntum apostolórum et prophetárum, ipso summo angulári lápide Christo Iesu, in quo omnis ædificátio compácta crescit in templum sanctum in Dómino, in quo et vos coædificámini in habitáculum Dei in Spíritu.
RESPONSORIUM BREVE
Constítues eos príncipes {*} Super omnem terram.
Constítues eos príncipes {*} Super omnem terram.
Mémores erunt nóminis tui, Dómine. {*}
Super omnem terram.
Glória Patri, et Fílio, et Spirítui Sancto.
Constítues eos príncipes {*} Super omnem terram.
Ad Benedictus, ant. Quia vidísti me, Thoma, credidísti; beáti qui non vidérunt et credidérunt, allelúia.
ORATIO
Da nobis, omnípotens Deus, beáti Thomæ apóstoli festivitáte gloriári, ut eius semper et patrocíniis sublevémur, et vitam credéntes habeámus in nómine eius, quem ipse Dóminum agnóvit, Iesum Christum Fílium tuum.
Ad Vesperas
LECTIO BREVIS
{r}Eph 4, 11-13{/r}
Christus dedit quosdam quidem apóstolos, quosdam autem prophétas, álios vero evangelístas, álios autem pastóres et doctóres ad instructiónem sanctórum in opus ministérii, in ædificatiónem córporis Christi, donec occurrámus omnes in unitátem fídei et agnitiónis Fílii Dei, in virum perféctum, in mensúram ætátis plenitúdinis Christi.
RESPONSORIUM BREVE
Annuntiáte inter gentes {*} Glóriam Dómini.
Annuntiáte inter gentes {*} Glóriam Dómini.
In ómnibus pópulis mirabília eius. {*}
Glóriam Dómini.
Glória Patri, et Fílio, et Spirítui Sancto.
Annuntiáte inter gentes {*} Glóriam Dómini.
Ad Magnificat, ant. Misi dígitos meos in fixúras clavórum et manus meas in latus eius, et dixi: Dóminus meus et Deus meus, allelúia.
ORATIO ut ad Laudes matutinas.
Die 4 iulii
S. ELISABETH LUSITANIÆ
De Communi sanctarum mulierum: pro iis qui opera misericordiæ exercuerunt.
ORATIO
Deus, auctor pacis et amátor caritátis, qui beátam Elísabeth mira dissidéntes componéndi grátia decorásti, da nobis, eius intercessióne, pacis ópera exercére, ut fílii Dei nominári possímus.
Die 5 iulii
S. ANTONII MARIÆ ZACCHARIA, PRESBYTERI
De Communi pastorum: pro presbyteris, vel sanctorum virorum: pro educatoribus, vel pro religiosis.
ORATIO
Da nobis, Dómine, ut supereminéntem Iesu Christi sciéntiam spíritu Pauli apóstoli prosequámur, qua beátus Antónius María erudítus verbum salútis in Ecclésia tua iúgiter prædicávit.
Die 6 iulii
S. MARIÆ GORETTI, VIRGINIS ET MARTYRIS
De Communi unius martyris, vel virginum.
ORATIO
Deus, innocéntiæ auctor et castitátis amátor, qui fámulæ tuæ Maríæ iuveníli ætáte martýrii grátiam contulísti, da nobis, quǽsumus, eius intercessióne, in tuis mandátis constántiam, qui dedísti certánti vírgini corónam.
Die 9 iulii
SS. AUGUSTINI ZHAO RONG, PRESBYTERI, ET SOCIORUM, MARTYRUM
ORATIO
Deus, qui per sanctórum mártyrum Augustíni et sociórum confessiónem Ecclésiam tuam mirábili dispensatióne roborásti, concéde ut pópulus tuus, missióni sibi créditæ fidélis, et increménta libertátis accípiat et veritátem coram mundo testificétur.
Die 11 iulii
S. BENEDICTI, ABBATIS
Memoria
De Communi sanctorum virorum: pro religiosis, præter sequentia:
Ad Laudes matutinas
HYMNUS
Légifer prudens, veneránde doctor,
qui nites celsis méritis per orbem,
dénuo comple, Benedícte, mundum
lúmine Christi.
Flóruit per te novus atque miro
géntium nexu sociátus ordo;
iúribus sacris tua vox subégit
dúlciter omnes.
Líberos Iesu paritérque servos
régula magna statuíst{i}i{/i} alúmnos,
quos amor fotus précibus revínxit
et labor unus.
Iamque fratérne, duce te, labórent,
mútuo certent pópuli favóre,
gáudeant pacis refovére semper
dona beátæ.
Cláritas Patri genitǽque Proli,
Flámini Sancto decus atque cultus,
grátia quorum tibi tanta laudis
glória lucet. Amen.
Ad Benedictus, ant. Fuit vir vitæ venerábilis, grátia Benedíctus et nómine.
ORATIO
Deus, qui beátum Benedíctum abbátem in schola divíni servítii præclárum constituísti magístrum, tríbue, quǽsumus, ut, amóri tuo nihil præponéntes, viam mandatórum tuórum dilatáto corde currámus.
Ad Vesperas
HYMNUS
Inter ætérnas súperum corónas,
quas sacro partas cólimus triúmpho,
émicas celsis méritis corúscus,
o Benedícte!
Sancta te compsit púerum senéctus,
nil sibi de te rápuit volúptas,
áruit mundi tibi flos, ad alta
mente leváto.
Hinc fuga lapsus pátriam, paréntes
déseris, fervens némorum colónus;
inde conscríbis documénta vitæ
pulchra beátæ.
Iam docens omnes pópulos subésse
légibus tandem placitísque Christi,
fac tuis cuncti précibus petámus
cǽlica semper.
Cláritas Patri genitǽque Proli,
Flámini Sancto decus atque cultus,
grátia quorum tibi tanta laudis
glória lucet. Amen.
Ad Magnificat, ant. Hic accépit benedictiónem a Dómino et misericórdiam a Deo salutári suo; quia hæc est generátio quæréntium Dóminum.
Die 13 iulii
S. HENRICI
De Communi sanctorum virorum.
ORATIO
Deus, qui beátum Henrícum, grátiæ tuæ ubertáte prævéntum, e terréni cura regíminis ad supérna mirabíliter erexísti, eius nobis intercessióne largíre, ut inter mundánas varietátes puris ad te méntibus festinémus.
Die 14 iulii
S. CAMILLI DE LELLIS, PRESBYTERI
De Communi sanctorum virorum: pro iis qui opera misericordiæ exercuerunt.
ORATIO
Deus, qui sanctum Camíllum presbýterum caritátis in infírmos singulári grátia decorásti, eius méritis, spíritum nobis tuæ dilectiónis infúnde, ut, tibi in frátribus serviéntes, ad te, hora éxitus nostri, secúri transíre possímus.
Die 15 iulii
S. BONAVENTURÆ, EPISCOPI ET ECCLESIÆ DOCTORIS
Memoria
De Communi pastorum: pro episcopis, et doctorum Ecclesiæ.
ORATIO
Da, quǽsumus, omnípotens Deus, ut, beáti Bonaventúræ epíscopi natalícia celebrántes, et ipsíus proficiámus eruditióne præclára, et caritátis ardórem iúgiter æmulémur.
Die 16 iulii
BEATÆ MARIÆ VIRGINIS DE MONTE CARMELO
De Communi b. Mariæ V.
Ad Laudes matutinas
Ad Benedictus, ant. Quæsívi sapiéntiam palam in oratióne mea, et efflóruit tamquam præcox uva.
ORATIO
Adiuvet nos, quǽsumus, Dómine, gloriósæ Vírginis Maríæ intercéssio veneránda, ut, eius muníti præsídiis, ad montem, qui Christus est, perveníre valeámus.
Ad Vesperas
Ad Magnificat, ant. María audiébat verbum Dei et custodiébat illud, cónferens in corde suo.
Die 17 iulii
SS. ANDREÆ-ZŒRARDI ET BENEDICTI, EREMITARUM
Memoria
De Communi sanctorum virorum, præter sequentia:
ORATIO
Deus, cuius benígno afflátu sancti Andreas-Zœrardus et Benedíctus ducti sunt in antra solitúdinis, ut tibi oratióne, labóre et siléntio perféctius servírent; eórum intercessióne nobis quoque fer auxílium: inter mundi varietátes et turbines tuæ voci avide auscultáre et in ómnibus tuæ voluntáti obséqui mereámur.
Die 20 iulii
S. APOLLINARIS, EPISCOPI ET MARTYRIS
ORATIO
Dírige fidéles tuos, Dómine, in viam salútis ætérnæ, quam beátus Apollináris epíscopus doctrína et martýrio monstrávit, et fac nos, eódem intercedénte, sic in mandátis tuis perseveráre, ut cum ipso coronári mereámur.
Die 21 iulii
S. LAURENTII DE BRINDISI, PRESBYTERI ET ECCLESIÆ DOCTORIS
De Communi pastorum: pro presbyteris, et doctorum Ecclesiæ.
ORATIO
Deus, qui pro nóminis tui glória et animárum salúte beáto Lauréntio presbýtero spíritum consílii et fortitúdinis contulísti, da nobis, in eódem spíritu, et agénda cognóscere, et cógnita, eius intercessióne, perfícere.
Die 22 iulii
S. MARIÆ MAGDALENÆ
Memoria
De Communi sanctarum mulierum, præter sequentia:
Ad Laudes matutinas
HYMNUS
Auróra surgit lúcida
Christi triúmphos áfferens,
cum corpus eius vísere,
María, vis et úngere.
Anhéla curris; ángelus
at ecce lætus prǽdocet
mortis refráctis póstibus
redísse quem desíderas.
Sed te manet iucúndius
intáct{i}i{/i} amóris prǽmium,
cum, voce pulsans vílicum,
tuum Magístrum cónspicis.
Quæ cum dolénti Vírgine
hæsíst{i}i{/i} acérbo stípiti,
tu prima viv{i}i{/i} ab ínferis
es testis atque núntia.
O flos venúste Mágdalæ,
o Christ{i}i{/i} amóre sáucia,
tu caritátis ígnibus
fac nostra corda férveant.
Da, Christe, tantæ sérvulæ
dilectiónem pérsequi,
et nos tu in cæléstibus
tibi canámus glóriam. Amen.
Ant. 1Una sábbati, María Magdaléne venit mane, cum adhuc ténebræ essent, ad monuméntum.
Psalmi et canticum de dominica hebd. I.
Ant. 2Ardens est cor meum: desídero vidére Dóminum meum; quæro, et non invénio ubi posuérunt eum, allelúia.
Ant. 3Dum fleret María, inclinávit se et prospéxit in monuméntum; et vidit duos ángelos in albis sedéntes, allelúia.
RESPONSORIUM BREVE
María, noli iam flere, {*} Surréxit Dóminus a mórtuis.
María, noli iam flere, {*} Surréxit Dóminus a mórtuis.
Vade ad fratres meos, et dic eis: {*}
Surréxit Dóminus a mórtuis.
Glória Patri, et Fílio, et Spirítui Sancto.
María, noli iam flere, {*} Surréxit Dóminus a mórtuis.
LECTIO BREVIS
{r}Rom 12, 1-2{/r}
Obsecro vos, fratres, per misericórdiam Dei, ut exhibeátis córpora vestra hóstiam vivéntem, sanctam, Deo placéntem, rationábile obséquium vestrum; et nolíte conformári huic sǽculo, sed transformámini renovatióne mentis, ut probétis quid sit volúntas Dei, quid bonum et bene placens et perféctum.
Ad Benedictus, ant. Surgens Iesus mane prima sábbati, appáruit primo Maríæ Magdalénæ, de qua eiécerat septem dæmónia.
ORATIO
Deus, cuius Unigénitus Maríæ Magdalénæ ante omnes gáudium nuntiándum paschále commísit, præsta, quǽsumus, ut, eius intercessióne et exémplo, Christum vivéntem prædicémus, et in glória tua regnántem videámus.
Ad Vesperas
HYMNUS
Mágdalæ sidus, múlier beáta,
te pio cultu venerámur omnes,
quam sibi Christus sociávit arcti
fœ́der{i}e{/i} amóris.
Cum tib{i}i{/i} illíus pátefit potéstas
dǽmonum vires ábigens treménda,
tu fide gaudes potióre necti
grata medénti.
Hæret hinc urgens tibi caritátis
vis ut insístas pédibus Magístri,
férvidis illum comitáta semper
sédula curis.
Tuque complóras Dóminum, crucíque
ímpetu flagrans pietátis astas;
membra tu terges studiós{i}a{/i} et ungis
danda sepúlcro.
Quos amor Christi péperit, triúmphis
nos fac adiúngi sócios per ævum,
atque Dilécto simul affluénter
pángere laudes. Amen.
Ant. 1Dicit Iesus Maríæ: Múlier, quid ploras? quem quæris?
Ant. 2Tulérunt Dóminum meum, et néscio ubi posuérunt eum.
Ant. 3Dicit Iesus: María. Convérsa illa dicit ei: Rabbóni, quod dícitur: Magíster.
RESPONSORIUM BREVE
María, noli iam flere, {*} Surréxit Dóminus a mórtuis.
María, noli iam flere, {*} Surréxit Dóminus a mórtuis.
Vade ad fratres meos, et dic eis: {*}
Surréxit Dóminus a mórtuis.
Glória Patri, et Fílio, et Spirítui Sancto.
María, noli iam flere, {*} Surréxit Dóminus a mórtuis.
LECTIO BREVIS
{r}Rom 8, 28-30{/r}
Scimus quóniam diligéntibus Deum ómnia cooperántur in bonum, his, qui secúndum propósitum vocáti sunt. Nam, quos præscívit, et prædestinávit confórmes fíeri imáginis Fílii eius, ut sit ipse primogénitus in multis frátribus; quos autem prædestinávit, hos et vocávit; et quos vocávit, hos et iustificávit; quos autem iustificávit, illos et glorificávit.
Ad Magnificat, ant. Venit María, núntians discípulis quia vidit Dóminum, allelúia.
Oratio, ut ad Laudes matutinas.
Die 23 iulii
S. BRIGITÆ, RELIGIOSÆ
De Communi sanctarum mulierum: pro religiosis.
ORATIO
Dómine Deus noster, qui beátæ Birgíttæ, Fílii tui passiónem meditánti, secréta cæléstia revelásti, da nobis fámulis tuis in revelatióne glóriæ tuæ gaudére lætántes.
Die 24 iulii
S. SARBELII MAKHLÜF, PRESBYTERI
Memoria ad libitum
De Communi pastorum: pro presbyteris, vel sanctorum virorum: pro religiosis.
Deus, qui sanctum Sarbélium, presbýterum, ad singulárem pugnam erémi vocásti et omni génere pietátis imbuísti, concéde nobis, quǽsumus, ut imitatóres domínicæ passiónis effécti regno eius mereámur esse consórtes.
Die 25 iulii
S. IACOBI, APOSTOLI
Festum
De Communi Apostolorum, præter sequentia:
Ad Laudes matutinas
HYMNUS
Te nostra lætis láudibus,
Iacóbe, tollunt cántica,
quem Christus art{i}e{/i} ex rétium
ad tanta vexit cúlmina.
Ipso vocánte, cóncitus
cum fratre linquis ómnia,
ipsíus et fis nóminis
verbíque præco férvidus.
Testis poténtis déxteræ
præclárus alta cónspicis,
in monte celsam glóriam,
tristes in hort{i}o{/i} angústias.
Qui promptus exstas, póscitur
cum passiónis póculum,
tu primus ex apóstolis
pro Christ{i}i{/i} amóre plécteris.
Iesu fidélis ássecla
satórque lucis cǽlicæ,
mentes fide claréscere,
da spe fovéri péctora.
Christi sequi da sédulos
præcépta nos in sǽculo,
hymnos ut olim glóriæ
fundámus illi pérpetim. Amen.
Ant. 1Procédens Iesus vidit Iacóbum Zebedǽi et Ioánnem fratrem eius, et vocávit eos.
Psalmi et canticum de dominica hebd. I.
Ant. 2Illi autem statim, relíctis rétibus et patre, secúti sunt eum.
Ant. 3Cálicem quem ego bibo, bibétis, et baptísmo quo ego baptízor, baptizabímini.
LECTIO BREVIS
{r}Eph 2, 19-22{/r}
Iam non estis extránei et ádvenæ, sed estis concíves sanctórum et doméstici Dei, superædificáti super fundaméntum apostolórum et prophetárum, ipso summo angulári lápide Christo Iesu, in quo omnis ædificátio compácta crescit in templum sanctum in Dómino, in quo et vos coædificámini in habitáculum Dei in Spíritu.
Ad Benedictus, ant. Assúmpsit Iesus Petrum et Iacóbum et Ioánnem fratrem eius, et duxit eos in montem excélsum seórsum, et transfigurátus est ante eos.
ORATIO
Omnípotens sempitérne Deus, qui Apostolórum tuórum primítias beáti Iacóbi sánguine dedicásti, da, quǽsumus, Ecclésiæ tuæ ipsíus confessióne firmári, et iúgiter patrocíniis confovéri.
Ad Vesperas
Ant. 1Assúmpsit Iesus Petrum et Iacóbum et Ioánnem secum, et cœpit pavére et tædére.
Ant. 2Tunc ait illis: Vigiláte et oráte, ut non intrétis in tentatiónem.
Ant. 3Misit Heródes rex manus, ut afflígeret quosdam de Ecclésia. Occídit autem Iacóbum fratrem Ioánnis gládio.
Ad Magnificat, ant. Quicúmque volúerit fíeri maior, erit vester miníster; et quicúmque volúerit in vobis primus esse, erit ómnium servus.
ORATIO ut ad Laudes matutinas.
Die 26 iulii
SS. IOACHIM ET ANNÆ, PARENTUM BEATÆ MARIÆ VIRGINIS
Memoria
De Communi sanctorum virorum, præter sequentia:
Ad Laudes matutinas
HYMNUS
Nocti succédit lúcifer,
quem mox auróra séquitur,
solis ortum prænúntians
mundum lustrántis lúmine.
Christus sol est iustítiæ,
auróra Mater grátiæ,
quam, Anna, præis rútilans
legis propéllens ténebras.
Anna, radix ubérrima,
arbor tu salutífera,
virgam prodúcens flóridam
quæ Christum nobis áttulit.
O matris Christi génetrix
tuque parens sanctíssime,
natæ favénte mérito,
nobis rogáte véniam.
Iesu, tibi sit glória,
qui natus es de Vírgine,
cum Patr{i}e{/i} et almo Spíritu,
in sempitérna sǽcula. Amen.
LECTIO BREVIS
{r}Is 55, 3{/r}
Inclináte aurem vestram et veníte ad me; audíte, ut vivat ánima vestra, et fériam vobíscum pactum sempitérnum, misericórdias David fidéles.
RESPONSORIUM BREVE
Per víscera misericórdiæ suæ, {*} Visitávit nos Dóminus.
Per víscera misericórdiæ suæ, {*} Visitávit nos Dóminus.
Ex sémine David edúxit salvatórem Iesum. {*}
Visitávit nos Dóminus.
Glória Patri, et Fílio, et Spirítui Sancto.
Per víscera misericórdiæ suæ, {*} Visitávit nos Dóminus.
Ad Benedictus, ant. Benedíctus Dóminus Deus Israel, quia eréxit cornu salútis nobis in domo David púeri sui.
ORATIO
Dómine, Deus patrum nostrórum, qui beátis Ióachim et Annæ hanc grátiam contulísti, ut ex eis incarnáti Fílii tui Mater nascerétur, utriúsque précibus concéde, ut salútem tuo promíssam pópulo consequámur.
Ad Vesperas
HYMNUS
Dum tuas festo, pater o colénde,
cántico laudes habet hæc coróna,
vocis ac mentis, Ióachim, benígne
áccipe munus.
Longa te regum séries avórum
Abrahæ prolem tulit atque David;
clárior mundi dómina corúscas
prole María.
Sic tuum germen benedíct{i}a{/i} ab Anna
éditum, patrum repetíta vota
implet, et mæsto próperat reférre
gáudia mundo.
Laus tibi, Prolis Pater increátæ;
laus tibi, summi Súboles Paréntis;
summa laus, compar, tibi sit per omne,
Spíritus, ævum. Amen.
LECTIO BREVIS
{r}Rom 9, 4-5{/r}
Sunt Israelítæ, quorum adóptio est filiórum et glória et testaménta et legislátio et cultus et promissiónes, quorum sunt patres, et ex quibus Christus secúndum carnem: qui est super ómnia Deus benedíctus in sǽcula. Amen.
RESPONSORIUM BREVE
Suscépit Israel púerum suum, {*} Recordátus misericórdiæ suæ.
Suscépit Israel púerum suum, {*} Recordátus misericórdiæ suæ.
Sicut locútus est ad patres nostros. {*}
Recordátus misericórdiæ suæ.
Glória Patri, et Fílio, et Spirítui Sancto.
Suscépit Israel púerum suum, {*} Recordátus misericórdiæ suæ.
Ad Magnificat, ant. Inclita stirps Iesse virgam prodúxit amœ́nam, de qua procéssit flos miro plenus odóre.
ORATIO ut ad Laudes matutinas.
Die 27 iulii
S. GORASDI ET SOCIORUM
Memoria
De Communi sanctorum virorum.
ORATIO
Omnípotens et miséricors Deus qui sanctum Gorasdum, Methódii discípulum, eiusque sócios instituísti ad opus apostólicum sanctórum Fratrum ultérius prosequéndum; eórum nobis intercessióne concéde, ut Christi evangélium nos quoque cum fidúcia annuntiémus firmámque teneámus Ecclésiæ unitátem.
Die 29 iulii
SS. MARTHÆ, MARIÆ ET LAZARI
Memoria
De Communi sanctorum.
Ad Laudes matutinas
HYMNUS
Quas tibi laudes ferimúsque vota,
nos tuis possint méritis iuváre,
Martha, quam mire sibi corde iungit
Christo amíco.
Te frequens visit Dóminus tuáque
in domo degit plácida quiéte
ac tuis verbis studiísque lætans
teque minístra.
Tu prior fratrem quéreris perísse,
cumque María lacrimáta multum,
áspicis vitæ súbita Magístri
voce redíre.
Quæ fide prompta stábilem fatéris
spem resurgéndi, Dómino probánte,
ímpetra nobis cúpid{i}e{/i} in perénne
pérgere regnum.
Laus Deo Patri, Genitóque virtus,
Flámini Sancto párilis potéstas,
glóriam quorum pétimus per ævum
cérnere tecum. Amen.
Ad Benedictus, ant. Elevántis sursum óculis, voce magna Iesus clamávit: Lázare, veni foras!
ORATIO
Deus, cuius Fílius de sepúlcro ad vitam Lázarum revocávit, et in domo Marthæ dignátus est hospitári, da nobis, quǽsumus, ut ipsi in frátribus nostris fidéliter ministrántes, cum María verbi eius meditatóne pasci mereámur.
Ad Vesperas
HYMNUS
Te gratulántes pángimus,
Martha, cum tuis frátribus,
quæ meruísti sǽpius
Christum domi recípere.
Tantum libénter hóspitem
curis ornábas sédulis,
in plúrima sollícita
amóris dulci stímulo.
Pascis dum læta Dóminum,
María atque Lázarus
possunt ab illo grátiæ
vitǽque cibum súmere.
Captúro mortis trámitem
dante sorór{i}e{/i} arómata,
extrémi tu servítii
vigil donásti múnera.
Iesu felíces hóspites,
corda nostra accéndite,
ut illi gratæ iúgiter
sint sedes amicítiæ.
Sit Trinitáti glória,
quæ nos in domum cǽlicam
admítti tandem tríbuat
tecúmque laudes cánere. Amen.
Ad Magnificat, ant. Diligébat Iesus Martham et sorórem eius Maríam et Lázarum fratrem eius.
Oratio, ut ad Laudes matutinas.
Die 30 iulii
S. PETRI CHRYSOLOGI, EPISCOPI ET ECCLESIÆ DOCTORIS
De Communi pastorum: pro episcopis, et doctorum Ecclesiæ.
ORATIO
Deus, qui beátum Petrum Chrysólogum epíscopum Verbi tui incarnáti præcónem egrégium effecísti, eius nobis intercessióne concéde, ut tuæ salútis mystéria et iúgiter scrutémur in corde, et fidéliter significémus in ópere.
Die 31 iulii
S. IGNATII DE LOYOLA, PRESBYTERI
Memoria
De Communi pastorum: pro presbyteris, vel sanctorum virorum: pro religiosis.
Ad Laudes matutinas
HYMNUS
Magnæ cohórtis príncipem
Ignátium laus cóncinat,
clarum loquélis, áctibus
ducem ciéntem mílites.
Regi suprémo cǽlitum
amóre vinctus único,
eius fovénda glória
nil cénsuit iucúndius.
Hinc se suósque dévovet,
urgéntis instar ágminis,
ut iura Christi víndicet,
erróris umbras díssipet.
Sancto monénte Spíritu,
certam salútis sémitam
scrutátor altus sǽculis
doctórque prudens dénotat.
Suis alúmnis díssita
missis in orbis lítora,
Ecclésiam quot éxpetit
frondére lætam géntibus!
Sit Trinitáti glória,
quæ nos det huius mílitis
exémpla fortes pérsequi
in Christ{i}i{/i} honórem pérpetim. Amen.
Ad Benedictus, ant. Utinam possim cognóscere Christum et virtútem resurrectiónis eius et societátem passiónum illíus!
ORATIO
Deus, qui, ad maiórem tui nóminis glóriam propagándam, beátum Ignátium in Ecclésia tua suscitásti, concéde, ut, eius auxílio et imitatióne certántes in terris, coronári cum ipso mereámur in cælis.
Ad Vesperas
HYMNUS Magnæ cohórtis ut ad Laudes matutinas.
Ad Magnificat, ant. Quid prodest hómini si mundum univérsum lucrétur, ánimæ vero suæ detriméntum patiátur?