DECEMBER
Die 3 decembris
S. FRANCISCI XAVIER, PRESBYTERI
Memoria
De Communi pastorum: pro presbyteris.
Oratio
Deus, qui beáti Francísci prædicatióne multos tibi pópulos acquisísti, da ut fidélium ánimi eódem fídei zelo férveant, et ubérrima ubíque prole Ecclésia sancta lætétur.
Die 4 decembris
S. IOANNIS DAMASCENI, PRESBYTERI ET ECCLESIÆ DOCTORIS
De Communi doctorum Ecclesiæ.
Oratio
Præsta nobis, quǽsumus, Dómine, sancti Ioánnis presbýteri précibus adiuvári, ut vera fides, quam ille excellénter dócuit, sit semper lux et fortitúdo nostra.
Die 6 decembris
S. NICOLAI, EPISCOPI
De Cummoni pastorum: pro episcopis.
Oratio
Misericórdiam tuam, Dómine, súpplices implorámus, et, beáti Nicolái epíscopi interveniénte suffrágio, nos in ómnibus custódi perículis, ut via salútis nobis páteat expedíta.
Die 7 decembris
S. AMBROSII, EPISCOPI ET ECCLESIÆ DOCTORIS
Memoria
De Communi doctorum Ecclesiæ.
Ad Laudes Matutinas
HYMNUS
Fortem piúmque prǽsulem
canámus omnes, túrbidas
qui fluctuántis sǽculi
terris procéllas éxpulit.
Non sceptra concússus timet,
non imperántem féminam,
templóque, clausis póstibus,
arcet cruéntum cǽsarem.
Arcána sacræ páginæ
altus magíster éxplicat;
divína pandens dógmata,
mira nitet facúndia.
Fide ciénte spíritum,
præclára fundit cármina;
fide coǽquans mártyres,
depréndit artus mártyrum.
Iam nunc furéntem tártari
lupum flagéllo súbmove;
sciéntiæ nos lúmine
fove, tuére iúgiter.
Sit Trinitáti glória,
quam, te rogánte próspere,
hymnis in aula cǽlica
laudémus usqu{i}e{/i} in sǽculum. Amen.
Oratio
Deus, qui beátum Ambrósium epíscopum cathólicæ fídei doctórem et apostólicæ fortitúdinis exémplum effecísti, éxcita in Ecclésia tua viros secúndum cor tuum, qui eam fórtiter et sapiénter gubérnent.
Die 8 decembris
IN CONCEPTIONE IMMACULATA BEATÆ MARIÆ VIRGINIS
Sollemnitas
Ad I Vesperas
HYMNUS
Præclára custos vírginum
Deíque mater ínnuba,
cæléstis aulæ iánua,
spes nostra, cæli gáudium;
Inter rubéta lílium,
colúmba formosíssima,
e stirpe virga gérminans
nostro medélam vúlneri;
Turris dracón{i}i{/i} impérvia,
amíca stella náufragis,
defénde nos a fráudibus
tuáque luce dírige.
Erróris umbras díscute,
syrtes dolósas ámove,
fluctus tot inter, déviis
tutam reclúde sémitam.
Quæ labe nostr{i}æ{/i} oríginis
intácta splendes única,
serpéntis artes ǽmuli
elúde vindex ínclita.
Patri sit et Paráclito
tuóque Nato glória,
qui sanctitátis únicæ
te munerárunt grátia. Amen.
Ant. 1Inimicítias ponam inter te et mulíerem, et semen tuum et semen illíus.
Psalmi et canticum de Communi B. Mariæ V.
Ant. 2Induit me Dóminus vestiméntis salútis, et induménto iustítiæ circúmdedit me.
Ant. 3Ave, María, grátia plena; Dóminus tecum.
LECTIO BREVIS
{r}Rom 8, 29a. 30a{/r}
Quos Deus præscívit, et prædestinávit confórmes fíeri imáginis Fílii eius. Quos autem prædestinávit, hos et vocávit; et quos vocávit, hos et iustificávit.
RESPONSORIUM BREVE
Exaltábo te, Dómine, {*} Quóniam suscepísti me.
Exaltábo te, Dómine, {*} Quóniam suscepísti me.
Nec delectásti inimícos meos super me. {*}
Quóniam suscepísti me.
Glória Patri, et Fílio, et Spirítui Sancto.
Exaltábo te, Dómine, {*} Quóniam suscepísti me.
Ad Magnificat, ant. Beátam me dicent omnes generatiónes, quia fecit mihi magna qui potens est, allelúia.
PRECES
Deum Patrem omnipoténtem magnis láudibus extollámus, qui Maríam, matrem Fílii sui, ab ómnibus generatiónibus celebrári vóluit, et ab eo súpplices petámus:
Plena grátia intercédat pro nobis.
Deus, mirabílium patrátor, qui Immaculátam Vírginem Maríam, córpore et ánima, cæléstis glóriæ Christi fecísti consórtem,
filiórum tuórum corda ad eándem glóriam dírige.
Plena grátia intercédat pro nobis.
Qui Maríam dedísti nobis matrem, ipsa intercedénte, concéde medélam lánguidis, solámen mæréntibus, véniam peccatóribus,
et ómnibus salútem et pacem.
Plena grátia intercédat pro nobis.
Qui Maríam matrem misericórdiæ constituísti,
versántibus in perículis concéde, ut matérnam eius dilectiónem experiántur.
Plena grátia intercédat pro nobis.
Qui Maríam, in domo Iesu et Ioseph, matrem famílias esse voluísti,
fac ut, ipsíus intercessióne, omnes matres in famíliis caritátem fóveant et sanctitátem.
Plena grátia intercédat pro nobis.
Qui Maríam cæli coronásti regínam,
fac ut defúncti in regno tuo cum sanctórum ágmine gáudeant in ætérnum.
Plena grátia intercédat pro nobis.
Pater noster.Oratio
Deus, qui per immaculátam Vírginis Conceptiónem dignum Fílio tuo habitáculum præparásti, quǽsumus, ut, qui ex morte eiúsdem Fílii tui prævísa, eam ab omni labe præservásti, nos quoque mundos, eius intercessióne, ad te perveníre concédas.
Ad Invitatorium
Ant. Immaculátam Conceptiónem Vírginis Maríæ celebrémus: Christum, eius Fílium, adorémus Dóminum.
Ad Laudes Matutinas
HYMNUS
In plausu grati cárminis
adsit nova lætítia,
dum Dei matris Vírginis
sumit vita princípia.
María, mundi glória,
lucis ætérnæ fília,
te præservávit Fílius
ab omni labe pénitus.
Originális mácula
cuncta respérsit sǽcula;
sola post Natum vítiis
numquam contácta díceris.
Caput serpéntis cállidi
tuo pede contéritur;
fastus gigántis pérfidi
David funda devíncitur.
Colúmba mitis, húmilis,
fers, carens felle críminis,
signum Dei cleméntiæ,
ramum viréntis grátiæ.
Patri sit et Paráclito
tuóque Nato glória,
qui sanctitátis únicæ
te munerárunt grátia. Amen.
Ant. 1O quam casta Mater, quæ nullam novit máculam, Deum portáre méruit!
Psalmi et canticum de dominica hebd. I.
Ant. 2Benedícta es tu, Virgo María, a Dómino Deo excélso, præ ómnibus muliéribus super terram.
Ant. 3Trahe nos, Virgo immaculáta, post te currémus in odórem unguentórum tuórum.
LECTIO BREVIS
{r}Is 43, 1{/r}
Et nunc hæc dicit Dóminus qui creávit te, Iacob, et formávit te, Israel: «Noli timére, quia redémi te et vocávi te nómine tuo; meus es tu».
RESPONSORIUM BREVE
Deus omnípotens {*} Præcínxit me virtúte.
Deus omnípotens {*} Præcínxit me virtúte.
Et pósuit immaculátam viam meam. {*}
Præcínxit me virtúte.
Glória Patri, et Fílio, et Spirítui Sancto.
Deus omnípotens {*} Præcínxit me virtúte.
Ad Benedictus, ant. Ait Dóminus Deus ad serpéntem: Inimicítias ponam inter te et mulíerem, et semen tuum et semen illíus; ipsa cónteret caput tuum, allelúia.
PRECES
Dum Salvatórem nostrum celebrámus, qui ex María Vírgine nasci dignátus est, exorémus, dicéntes:
Intercédat pro nobis mater tua, Dómine.
O Sol iustítiæ, quem immaculáta Virgo ut lucens auróra præcéssit,
tríbue ut in lúmine visitatiónis tuæ semper ambulémus.
Intercédat pro nobis mater tua, Dómine.
Salvátor mundi, qui redemptiónis tuæ virtúte ab omni peccáti labe matrem tuam præservásti,
serva nos mundos a peccáto.
Intercédat pro nobis mater tua, Dómine.
Redémptor noster qui immaculátam Vírginem Maríam thálamum puríssimum habitatiónis tuæ et Spíritus Sancti fecísti sacrárium,
nos templum tui Spíritus fac perénne.
Intercédat pro nobis mater tua, Dómine.
Rex regum, qui matrem tuam, córpore et ánima tecum voluísti in cælum assúmptam,
fac ut quæ sursum sunt semper cogitémus.
Intercédat pro nobis mater tua, Dómine.
Ad II Vesperas
HYMNUS, ut ad I Vesperas
Ant. 1Tota pulchra es, María, et mácula originális non est in te.
Psalmi et canticum de Communi B. Mariæ V.
Ant. 2 Tu glória Ierúsalem, tu lætítia Israel, tu honorificéntia pópuli nostri.
Ant. 3 Vestiméntum tuum cándidum quasi nix, et fácies tua sicut sol.
LECTIO BREVIS
{r}Rom 5, 20-21{/r}
Ubi abundávit peccátum, superabundávit grátia, ut sicut regnávit peccátum in morte, ita et grátia regnet per iustítiam in vitam ætérnam per Iesum Christum Dóminum nostrum.
RESPONSORIUM BREVE
In hoc cognóvi {*} Quóniam voluísti me.
In hoc cognóvi {*} Quóniam voluísti me.
Quóniam non gaudébit inimícus meus super me. {*}
Quóniam voluísti me.
Glória Patri, et Fílio, et Spirítui Sancto.
In hoc cognóvi {*} Quóniam voluísti me.
Ad Magnificat, ant. Ave, María, grátia plena; Dóminus tecum; benedícta tu in muliéribus, et benedíctus fructus ventris tui, allelúia.
PROSBY, ut ad I Vesperas.
Ad Horam mediamPSALMODIA
Ant. 1 Vivit Dóminus, quóniam adimplévit in me misericórdiam suam.
Ant. 2 Complácuit Dómino in te, et gaudébit super te Deus tuus.
Ant. 3 Deus creávit me in iustítia, et apprehéndit manum meam, et servávit me.
Ad TertiamLECTIO BREVIS
{r}Epf 1, 4{/r}
Elégit nos Deus in Christo ante mundi constitutiónem, ut essémus sancti et immaculáti in conspéctu eius in caritáte.
RESPONSORIUM BREVE
Immaculáta Concéptio est hódie sanctæ Maríæ Vírginis.
Quæ serpéntis caput virgíneo pede contrívit.
Ad SextamLECTIO BREVIS
{r}Epf 1, 11-12a{/r}
In Christo nos sorte vocáti sumus, prædestináti secúndum propósitum eius, qui operátur ómnia secúndum consílium voluntátis suæ, ut simus in laudem glóriæ eius.
RESPONSORIUM BREVE
Cor meum et caro mea.
Exsultavérunt in Deum vivum.
Ad NonamLECTIO BREVIS
Cf. {r}Epf 5, 25-27{/r}
Christus diléxit ecclésiam et seípsum trádidit pro ea, ut illam sanctificáret, ut exhibéret ipse sibi gloriósam ecclésiam non habéntem máculam aut rugam aut áliquid eiúsmodi, sed ut sit sancta et immaculáta.
RESPONSORIUM BREVE
Immaculáta Concéptio tua, Dei Génetrix Virgo.
Gáudium annuntiávit univérso mundo.
Die 9 decembris
S. IOANNIS DIDACI CUAUHTLATOATZIN
De Communi sanctorum virorum.
Oratio
Deus, qui per beátum Ioánnem Dídacum, sanctíssimæ Vírginis Maríæ dilectiónem erga pópulum tuum ostendísti: eius nobis intercessióne concéde, ut, Matris nostræ mónitis Guadalúpæ datis obsequéntes, voluntátem tuam iúgiter adimplére valeámus.
Die 10 decembris
B. MARIÆ VIRGINIS DE LORETO
De Communi b. Mariæ Virginis.
ORATIO
Deus, qui promíssa Pátribus adímplens beátam Vírginem Maríam elegísti, ut matrem fíeret Salvatóris, concéde nobis illíus exémpla sectári, cuius humílitas tibi plácuit, et obœdiéntia nobis prófuit.
Die 11 decembris
S. DAMASI I, PAPÆ
De Communi pastorum: pro papis.
Oratio
Præsta, quǽsumus, Dómine, ut mártyrum tuórum iúgiter mérita celebrémus, quorum éxstitit beátus Dámasus papa cultor et amátor.
Die 12 decembris
BEATÆ MARIÆ VIRGINIS DE GUADALUPE
De Communi Beatæ Mariæ Virginis.
Oratio
Deus, Pater misericordiárum, qui sub sanctíssimæ Matris Fílii tui singulári patrocínio plebem tuam constituísti, tríbue cunctis, qui beátam Vírginem Guadalupénsem ínvocant, ut, alacrióri fide, populórum progressiónem in viis iustítiæ quǽreant et pacis.
Die 13 decembris
S. LUCIÆ, VIRGINIS ET MARTYRIS
Memoria
De Communi martyrum, vel virginum.
Ad Laudes Matutinas
Ad Benedictus, ant. Ego húmilis ancílla nihil áliud egi, nisi Deo vivo sacrificávi; iam enim, quia nihil supérerat, meípsam óffero.
Oratio
Intercéssio nos, quǽsumus, Dómine, sanctæ Lúciæ vírginis et mártyris gloriósa confóveat, ut eius natalícia et temporáliter frequentémus, et conspiciámus ætérna.
Ad Vesperas
Ad Magnificat, ant. In tua patiéntia possedísti ánimam tuam, Lúcia, sponsa Christi: odísti quæ in mundo sunt, et corúscas cum ángelis; sánguine próprio inimícum vicísti.
Die 14 decembris
S. IOANNIS A CRUCE, PRESBYTERI ET ECCLESIÆ DOCTORIS
Memoria
De Communi doctorum Ecclesiæ
Oratio
Deus, qui sanctum Ioánnem presbýterum perféctæ sui abnegatiónis et crucis amatórem exímium effecísti, concéde ut, eius imitatióni iúgiter inhæréntes, ad contemplatiónem glóriæ tuæ perveniámus ætérnam.
Die 21 decembris
S. PETRI CANISII, PRESBYTERI ET ECCLESIÆ DOCTORIS
Pro commemoratione
Ad Laudes Matutinas
Ant. Qui docti fúerint, fulgébunt quasi splendor firmaménti, et qui ad iustítiam erúdiunt multos, quasi stellæ in perpétuas æternitátes.
Oratio
Deus, qui ad tuéndam cathólicam fidem virtúte et doctrína beátum Petrum presbýterum roborásti, eius intercessióne concéde, ut, qui veritátem quærunt, te Deum gaudénter invéniant, et in tua confessióne pópulus credéntium persevéret.
Ad Vesperas
Ant. O doctor óptime, Ecclésiæ sanctæ lumen, beáte Petre, divínæ legis amátor, deprecáre pro nobis Fílium Dei.
Die 23 decembris
S. IOANNIS DE KĘTY, PRESBYTERI
Pro commemoratione
Ad Laudes Matutinas
Ant. In hoc cognóscent omnes quia mei estis discípuli, si dilectiónem habuéritis ad ínvicem.
Oratio
Da, quǽsumus, omnípotens Deus, ut, exémplo sancti Ioánnis presbýteri, in sanctórum sciéntia procedámus, atque, misericórdiam ómnibus exhibéntes, apud te indulgéntiam consequámur.
Ad Vesperas
Ant.: Amen dico vobis: Quod uni ex his mínimis meis fecístis, mihi fecístis. Veníte, benedícti Patris mei, possidéte parátum vobis regnum ab inítio mundi.
Die 26 decembris
S. STEPHANI, PROTOMARTYRIS
Festum
Ad Invitatorium
Ant. Christum natum, qui beátum coronávit Stéphanum, veníte, adorémus.
Ad Laudes Matutinas
HYMNUS
Christus est vita véniens in orbem,
qui ferens vulnus removénsque mortem,
ad Patris dextram repeténdo, regnat
sede supérna.
Hunc sequens primus Stéphanus miníster
sortis illátæ títul{i}o{/i} est decórus,
quam dedit spirans Dómini benígnus
Spíritus illi.
Sáxeo nimbo lapidátus instat,
sústinet mortis rábiem profánam,
hóstibus quærit véniam misértus
péctore grato.
Quǽsumus flentes, benedícte prime
martyr et civis sociáte iustis:
cǽlitus, claræ regiónis heres,
mitte favóres.
Glóriæ laudes Tríadi beátæ
mártyrum læti cómites canámus,
quæ dedit primas Stéphan{i}o{/i} ex agóne
ferre corónas. Amen.
Ant. 1 Adhǽsit ánima mea post te, quia caro mea lapidáta est pro te, Deus meus.
Psalmi et canticum de dominica hebd. I.
Ant. 2 Stéphanus vidit cælos apértos, vidit et introívit: beátus homo, cui cæli patébant.
Ant. 3 Ecce vídeo cælos apértos, et Iesum stantem a dextris virtútis Dei.
LECTIO BREVIS
{r}Act 6, 2b-5a{/r}
Non est æquum nos derelinquéntes verbum Dei ministráre mensis; consideráte vero, fratres, viros ex vobis boni testimónii septem plenos Spíritu et sapiéntia, quos constituémus super hoc opus; nos vero oratióni et ministério verbi instántes érimus. Et plácuit sermo coram omni multitúdine.
RESPONSORIUM BREVE
Fortitúdo mea {*} Et laus mea Dóminus.
Fortitúdo mea {*} Et laus mea Dóminus.
Et factus est mihi in salútem. {*}
Et laus mea Dóminus.
Glória Patri, et Fílio, et Spirítui Sancto.
Fortitúdo mea {*} Et laus mea Dóminus.
Ad Benedictus, ant. Patefáctæ sunt iánuæ cæli beáto Stéphano, qui in número mártyrum primus est coronátus.
Oratio
Da nobis, quǽsumus, Dómine, imitári quod cólimus, ut discámus et inimícos dilígere, quia eius natalícia celebrámus, qui novit étiam pro persecutóribus exoráre.
Ad Horam mediam Ad TertiamLECTIO BREVIS
{r}1 Petr 5, 10-11{/r}
Deus omnis grátiæ, qui vocávit vos in ætérnam suam glóriam in Christo Iesu, módicum passos ipse perfíciet, confirmábit, solidábit, fundábit. Ipsi impérium in sǽcula sæculórum. Amen.
RESPONSORIUM BREVE
Stola iucunditátis índuit eum Dóminus.
Et corónam pulchritúdinis pósuit super caput eius.
Ad SextamLECTIO BREVIS
{r}Iac 1, 12{/r}
Beátus vir, qui suffert tentatiónem, quia, cum probátus fúerit, accípiet corónam vitæ, quam repromísit Deus diligéntibus se.
RESPONSORIUM BREVE
In Deo sperávi.
Non timébo quid fáciat mihi homo.
POPOLUDNÍLECTIO BREVIS
{r}Sap 3, 1-2a. 3b{/r}
Iustórum ánimæ in manu Dei sunt, et non tanget illos torméntum mortis. Visi sunt óculis insipiéntium mori; illi autem sunt in pace.
RESPONSORIUM BREVE
Veniéntes vénient cum exsultatióne.
Portántes manípulos suos.
Ad Vesperas
Omnia de octava Nativitatis Domini, ut die 26 decembris.
Sicubi festum S. Stephani ut sollemnitas celebratur: hymnus, antiphonæ, lectio brevis et responsorium de Laudibus matutinis; psalmi, canticum et preces de Communi martyrum.
Die 27 decembris
S. IOANNIS, APOSTOLI ET EVANGELISTÆ
Festum
Ad Invitatorium
Ant. Regem Apostolórum Dóminum, veníte, adorémus.
Ad Laudes Matutinas
HYMNUS
Cohors beáta Séraphim
quem Christus arcte díligit
laudet, chorúsque cánticis
noster resúltet ǽmulis.
Hic discit, almus édocet
hic unde Verbum pródeat,
sinúmque matris ímpleat,
sinum Patris non déserens.
Felix Ioánnes, déligit
et te Magíster próvidus,
ut clara Thabor lúmina
hortíque cernas tǽdia.
Tu, raptus in sublímia,
arcána cæli cónspicis,
Agni sed et mystéria
Ecclesiǽque pércipis.
O digne fili Vírgine,
succéssor alti nóminis,
nos adde Matri fílios,
nos conde Christ{i}i{/i} in péctore.
Verbo sit ingens glória,
caro quod est et créditur,
cum Patr{i}e{/i} et almo Spíritu
in sempitérna sǽcula. Amen.
Ant. 1 Ioánnes, apóstolus et evangelísta, virgo est eléctus a Dómino, atque inter céteros magis diléctus.
Psalmi et canticum de dominica hebd. I.
Ant. 2 Iste est Ioánnes, cui Christus in cruce Matrem Vírginem vírgini commendávit.
Ant. 3 Dixit discípulus, quem diligébat Iesus: Dóminus est, allelúia.
LECTIO BREVIS
{r}Act 4, 19-20{/r}
Petrus et Ioánnes respondéntes dixérunt ad eos: «Si iustum est in conspéctu Dei vos pótius audíre quam Deum, iudicáte; non enim póssumus nos, quæ vídimus et audívimus, non loqui».
Ad Benedictus, ant. Verbum caro factum est, et habitávit in nobis, et vídimus glóriam eius, allelúia.
PRECES
Superædificáti, fratres, super fundaméntum Apostolórum, orémus Patrem omnipoténtem pro pópulo sancto eius, dicéntes:
Recordáre Ecclésiæ tuæ, Dómine.
Pater, qui voluísti Fílium tuum, a mórtuis suscitátum, prius Apóstolis fíeri maniféstum,
præsta, ut eius testes simus usque ad últimum terræ.
Recordáre Ecclésiæ tuæ, Dómine.
Pater, qui Fílium tuum misísti in mundum evangelizáre paupéribus,
da, ut omni creatúræ Evangélium prædicétur.
Recordáre Ecclésiæ tuæ, Dómine.
Pater, qui tuum misísti Fílium semináre semen verbi,
concéde ut, verbum seminántes cum labóre, fruges metámus in gáudio.
Recordáre Ecclésiæ tuæ, Dómine.
Pater, qui Fílium tuum misísti reconciliáre tibi mundum per sánguinem suum,
tríbue, ut ad reconciliatiónem omnes cooperémur.
Recordáre Ecclésiæ tuæ, Dómine.
Pater noster.Oratio
Deus, qui per beátum apóstolum Ioánnem Verbi tui nobis arcána reserásti, præsta, quǽsumus, ut quod ille nostris áuribus excellénter infúdit, intellegéntiæ competéntis eruditióne capiámus.
Ad Vesperas
Omnia de octava Nativitatis Domini, ut die 27 decembris.
Sicubi festum S. Ioannis ut sollemnitas celebratur: hymnus, antiphonæ, lectio brevis et responsorium de Laudibus matutinis; psalmi, canticum et preces de Communi Apostolorum.
Die 28 decembris
SS. INNOCENTIUM, MARTYRUM
Festum
Ad Invitatorium
Ant. Christum natum, qui Innocéntes coronávit mártyres, veníte, adorémus.
Ad Laudes Matutinas
HYMNUS
Audit tyránnus ánxius
adésse regum príncipem,
qui nomen Israel regat
ten{i}e{/i}átque David régiam.
Exclámat amens núntio:
«Succéssor instat, péllimur;
satélles, i, ferrum rape,
perfúnde cunas sánguine!».
Quo próficit tantum nefas?
Quid crimen Heródem iuvat?
Unus tot inter fúnera
impúne Christus tóllitur.
Salvéte, flores mártyrum,
quos lucis ips{i}o{/i} in límine
Christ{i}i{/i} insecútor sústulit
ceu turbo nascéntes rosas.
Vos prima Christi víctima,
grex immolatórum tener,
aram sub ipsum símplices
palm{i}a{/i} et corónis lúditis.
Iesu, tibi sit glória,
qui natus es de Vírgine,
cum Patr{i}e{/i} et almo Spíritu,
in sempitérna sǽcula. Amen.
Ant. 1 Ambulábunt mecum in albis, quia digni sunt, dicit Dóminus.
Psalmi et canticum de dominica hebd. I.
Ant. 2 Dicunt infántes Dómino laudem; occísi prǽdicant quod vivi non póterant.
Ant. 3 Ex ore infántium et lacténtium perfecísti laudem propter inimícos tuos.
LECTIO BREVIS
{r}Ier 31, 15{/r}
Vox in Rama audíta est lamentatiónis, luctus et fletus Rachel plorántis fílios suos et noléntis consolári super eis, quia non sunt.
RESPONSORIUM BREVE
Sancti et iusti {*} In perpétuum vivent.
Sancti et iusti {*} In perpétuum vivent.
Et apud Dóminum est merces eórum. {*}
In perpétuum vivent.
Glória Patri, et Fílio, et Spirítui Sancto.
Sancti et iusti {*} In perpétuum vivent.
Ad Benedictus, ant. Innocéntes pro Christo infántes occísi sunt, ab iníquo rege lacténtes interfécti sunt: ipsum sequúntur Agnum sine mácula, et dicunt semper: Glória tibi, Dómine.
PRECES
Glóriam Christi celebrémus, qui non armatórum manu, sed candidáta ácie parvulórum vicit tyránnum, atque clamémus:
Te mártyrum candidátus laudat exércitus.
Christe, cui párvuli Innocéntes non loquéla, sed sánguine testimónium reddidérunt,
da nos et verbis et opéribus te coram homínibus confitéri.
Te mártyrum candidátus laudat exércitus.
Qui nondum ad pugnam idóneos, victóriæ dignos iam palma fecísti,
tantis nos prǽditos victóriæ subsídiis, succúmbere ne síveris.
Te mártyrum candidátus laudat exércitus.
Qui sánguine tuo stolas lavísti Innocéntium,
ab omni nos emúnda iniquitáte.
Te mártyrum candidátus laudat exércitus.
Qui mártyres infántes regni tui primítias ad cælum præmisísti,
nos aula convívii ætérni extórres fíeri ne permíttas.
Te mártyrum candidátus laudat exércitus.
Qui in infántia tua persecutiónem et exsílium cognovísti,
serva infántes, qui inópia aut bello vel calamitátibus periclitántur.
Te mártyrum candidátus laudat exércitus.
Pater noster.Oratio
Deus, cuius hodiérna die præcónium Innocéntes mártyres non loquéndo, sed moriéndo conféssi sunt, da, quǽsumus, ut fidem tuam, quam lingua nostra lóquitur, étiam móribus vita fateátur.
Ad horam mediam Ad TertiamLECTIO BREVIS
Cf. {r}Lam 1, 16{/r}
Ego plorans, et óculus meus dedúcens aquas; facti sunt fílii mei desoláti, quóniam inváluit inimícus.
RESPONSORIUM BREVE
Stola iucunditátis índuit eos Dóminus.
Et corónam pulchritúdinis pósuit super cápita eórum.
Ad SextamLECTIO BREVIS
Cf. {r}Lam 2, 11{/r}
Defecérunt præ lácrimis óculi mei, efferbuérunt víscera mea; cum defíceret párvulus et lactens in platéis óppidi.
RESPONSORIUM BREVE
Iusti autem in perpétuum vivent.
Et apud Dóminum est merces eórum.
Ad NonamLECTIO BREVIS
{r}Ier 31, 16a. 17a{/r}
Quiéscat vox tua a plorátu, et óculi tui a lácrimis, quia est merces óperi tuo. Et est spes novíssimis tuis, ait Dóminus.
RESPONSORIUM BREVE
Exsultábunt sancti in glória.
Lætabúntur in cubílibus suis.
Ad Vesperas
Omnia de octava Nativitatis Domini, ut die 28 decembris.
Sicubi festum SS. Innocentium ut sollemnitas celebratur: hymnus, antiphonæ, lectio brevis et responsorium de Laudibus matutinis; psalmi, canticum et preces de Communi martyrum.
Die 29 decembris
S. THOMÆ BECKET, EPISCOPI ET MARTYRIS
Pro commemoratione
Ad Laudes Matutinas
Ant. Qui odit ánimam suam in hoc mundo, in vitam ætérnam custódit eam.
Oratio
Deus, qui beáto Thomæ mártyri pro iustítia magno ánimo vitam profúndere tribuísti, da nobis, eius intercessióne, nostram pro Christo vitam in hoc sǽculo abnegáre, ut eam in cælo inveníre possímus.
Ad Vesperas
Ant. In cæléstibus regnis sanctórum habitátio est, et in ætérnum réquies eórum.
Die 31 decembris
S. SILVESTRI I, PAPÆ
Pro commemoratione
Ad Laudes Matutinas
Ant. Non vos estis qui loquímini, sed Spíritus Patris vestri, qui lóquitur in vobis.
Oratio
Auxiliáre, Dómine, pópulo tuo, beáti Silvéstri papæ intercessióne suffúlto, ut, præséntem vitam sub tua gubernatióne transcúrrens, mereátur felíciter inveníre perpétuam.