AUGUSTUS
Die 1 augusti
S. ALFONSI MARIÆ DE’ LIGUORI, EPISCOPI ET ECCLESIÆ DOCTORIS
Memoria
De Communi pastorum: pro episcopis, et doctorum Ecclesiæ.
ORATIO
Deus, qui in Ecclésia tua nova semper instáuras exémpla virtútum, da nobis in zelo animárum beáti Alfónsi Maríæ epíscopi ita vestígiis adhærére, ut eius in cælis assequámur et prǽmia.
Die 2 augusti
S. EUSEBII VERCELLENSIS, EPISCOPI
De Communi pastorum: pro episcopis.
ORATIO
Fac nos, Dómine Deus, in asserénda Fílii tui divinitáte, sancti Eusébii epíscopi constántiam imitári, ut, fidem servántes quam ipse dócuit, eiúsdem Fílii tui vitæ partícipes esse mereámur.
Eodem die 2 augusti
S. PETRI IULIANI EYMARD, PRESBYTERI
De Communi pastorum, vel sanctorum: pro religiosis.
ORATIO
Deus, qui sanctum Petrum Iuliánum, erga sacra mystéria Córporis et Sánguinis Fílii tui dilectióne decorásti mirífica, concéde propítius, ut, quam ille ex hoc divíno percépit pinguédinem, eándem et nos percípere mereámur.
Die 4 augusti
S. IOANNIS MARIÆ VIANNEY, PRESBYTERI
Memoria
De Communi pastorum: pro presbyteris.
ORATIO
Omnípotens et miséricors Deus, qui sanctum Ioánnem Maríam presbýterum pastoráli stúdio mirábilem effecísti, da, quǽsumus, ut, eius exémplo et intercessióne, fratres in caritáte Christi tibi lucrémur, et cum eis ætérnam glóriam cónsequi valeámus.
Die 5 augusti
IN DEDICATIONE BASILICÆ S. MARIÆ
De Communi b. Mariæ V., præter sequentia:
Ad Laudes matutinas
Ad Benedictus, ant. Sancta Dei Génetrix María, Virgo perpétua, benedícta tu in muliéribus et benedíctus fructus ventris tui.
ORATIO
Famulórum tuórum, quǽsumus, Dómine, delíctis ignósce, ut, qui tibi placére de áctibus nostris non valémus, Genetrícis Fílii tui intercessióne salvémur.
Ad Vesperas
Ad Magnificat, ant. Sancta María, mater Dei, ora pro nobis peccatóribus, nunc et in hora mortis nostræ.
Die 6 augusti
IN TRANSFIGURATIONE DOMINI
Festum
(quando festum occurit die dominica)
Ad I Vesperas
HYMNUS O nata lux ut ad II Vesperas.
PSALMODIA
Ant. 1Assúmpsit Iesus discípulos suos, et ascéndit in montem, et transfigurátus est ante eos. Psalmus 112 (113)
Ant. 2Et ecce apparuérunt eis Móyses et Elías loquéntes cum Iesu. Psalmus 116 (117)
Ant. 3Dómine, bonum est nos hic esse; si vis, faciámus hic tria tabernácula: tibi unum, Móysi unum et Elíæ unum. Canticum
Cf. Ap 19, 1-2. 5-7LECTIO BREVIS
{r}Phil 3, 20-21{/r}
Noster municipátus in cælis est, unde étiam salvatórem exspectámus Dóminum Iesum Christum, qui transfigurábit corpus humilitátis nostræ confórme fíeri córpori glóriæ suæ secúndum operatiónem, qua possit étiam subícere sibi ómnia.
RESPONSORIUM BREVE
Gloriósus apparuísti in conspéctu Dómini, {*} Allelúia, allelúia.
Gloriósus apparuísti in conspéctu Dómini, {*} Allelúia, allelúia.
Proptérea decórem índuit te Dóminus. {*}
Allelúia, allelúia.
Glória Patri, et Fílio, et Spirítui Sancto.
Gloriósus apparuísti in conspéctu Dómini, {*} Allelúia, allelúia.
Ad Magnificat, ant. Christus Iesus splendor Patris et figúra substántiæ eius, portans ómnia verbo virtútis suæ, purgatiónem peccatórum fáciens, in monte excélso gloriósus apparére hódie dignátus est.
PRECES
Salvatórem nostrum, qui in monte ante discípulos mirabíliter transfigurátus est, fidénter deprecémur:
Deus noster, illúmina ténebras nostras.
Christe, qui transfigurátus revelásti discípulis tuis resurrectiónem ante passiónem, orámus te pro Ecclésia tua sancta laboránte in necessitátibus mundi,
ut in tribulatióne semper transfigurétur victóriæ tuæ gáudio.
Deus noster, illúmina ténebras nostras.
Christe, qui assumpsísti Petrum cum Iacóbo et Ioánne et duxísti eos in montem excélsum seórsum, orámus te pro Papa nostro N. et epíscopis,
ut pópulo tuo in spe resurrectiónis minístrent.
Deus noster, illúmina ténebras nostras.
Christe, qui in monte illuminásti fáciem tuam super Móysen et Elíam, orámus te pro Iudǽis, pópulo acquisitiónis antíquæ,
ut ad redemptiónis mereántur plenitúdinem perveníre.
Deus noster, illúmina ténebras nostras.
Christe, qui terræ illuxísti, cum glória Creatóris super te orta est, orámus te pro homínibus bonæ voluntátis,
ut ámbulent in lúmine tuo.
Deus noster, illúmina ténebras nostras.
Christe, qui reformábis corpus humilitátis nostræ configurátum córpori claritátis tuæ, orámus te pro frátribus nostris defúnctis,
ut intrent in glóriam tuam.
Deus noster, illúmina ténebras nostras.
Pater noster.ORATIO
Deus, qui fídei sacraménta in Unigéniti tui gloriósa Transfiguratióne patrum testimónio roborásti, et adoptiónem filiórum perféctam mirabíliter præsignásti, concéde nobis fámulis tuis, ut, ipsíus dilécti Fílii tui vocem audiéntes, eiúsdem coherédes éffici mereámur.
Ad Invitatorium
Ant. Summum Regem glóriæ, veníte, adorémus.
Ad Laudes matutinas
HYMNUS
Dulcis Iesu memória,
dans vera cordi gáudia,
sed super mel et ómnia
eius dulcis præséntia.
Nil cánitur suávius,
audítur nil iucúndius,
nil cogitátur dúlcius
quam Iesus Dei Fílius.
Iesu, dulcédo córdium,
fons veri, lumen méntium,
excédis omne gáudium
et omne desidérium.
Quando cor nostrum vísitas,
tunc lucet ei véritas,
mundi viléscit vánitas
et intus fervet cáritas.
Da nobis largus véniam,
amóris tui cópiam;
da nobis per præséntiam
tuam vidére glóriam.
Laudes tibi nos pángimus,
diléctus es qui Fílius,
quem Patris atque Spíritus
splendor revélat ínclitus. Amen.
Ant. 1Hódie Dóminus Iesus Christus fácie ut sol in monte resplénduit, et vestiméntis tamquam nix cándidus enítuit.
Psalmi et canticum de dominica hebd. I.
Ant. 2Hódie, transfiguráto ac Patris voce testificáto Dómino, Móyses et Elías affuérunt spléndidi, excéssum eius quem completúrus erat loquéntes.
Ant. 3Lex per Móysen data est et prophetía per Elíam, qui in maiestáte visi sunt cum Dómino loquéntes, in monte fulgéntes.
LECTIO BREVIS
{r}Ap 21, 10. 23{/r}
Sústulit me ángelus in spíritu super montem magnum et altum et osténdit mihi civitátem sanctam Ierúsalem descendéntem de cælo a Deo. Et cívitas non eget sole neque luna, ut lúceant ei, nam cláritas Dei illuminávit eam, et lucérna eius est Agnus.
RESPONSORIUM BREVE
Glória et honóre coronásti eum, Dómine, {*} Allelúia, allelúia.
Glória et honóre coronásti eum, Dómine, {*} Allelúia, allelúia.
Et constituísti eum super ópera mánuum tuárum. {*}
Allelúia, allelúia.
Glória Patri, et Fílio, et Spirítui Sancto.
Glória et honóre coronásti eum, Dómine, {*} Allelúia, allelúia.
Ad Benedictus, ant. Ecce vox de nube dicens: Hic est Fílius meus diléctus, in quo mihi complácui; ipsum audíte, allelúia.
PRECES
Deum Patrem Dómini et Salvatóris nostri Iesu Christi, qui in monte ante discípulos mirabíliter transfigurátus est, fidénter deprecémur:
In lúmine tuo, Dómine, lumen videámus.
Pater clementíssime, qui Fílium tuum diléctum transfigurásti et in nube lúcida teípsum manifestásti,
fac ut verbum Christi fidéliter audiámus.
In lúmine tuo, Dómine, lumen videámus.
Deus, qui eléctos inebriásti ab ubertáte domus tuæ et torrénte voluptátis tuæ illos potásti,
concéde, ut in córpore Christi fontem vitæ nostræ inveniámus.
In lúmine tuo, Dómine, lumen videámus.
Deus, qui fecísti de ténebris lumen splendéscere et illuxísti in córdibus nostris ad contemplándam claritátem tuam in fácie Christi Iesu,
fove in nobis spíritum contemplatiónis Fílii tui dilécti.
In lúmine tuo, Dómine, lumen videámus.
Deus, qui nos vocásti vocatióne tua sancta, secúndum grátiam tuam nunc manifestátam per illuminatiónem salvatóris nostri Iesu Christi,
illústra per Evangélium inter hómines vitam incorruptíbilem.
In lúmine tuo, Dómine, lumen videámus.
Pater amantíssime, qui talem caritátem dedísti nobis ut fílii Dei nominémur et simus,
præsta, ut, cum apparúerit Christus, símiles ei fiámus.
In lúmine tuo, Dómine, lumen videámus.
Ad II Vesperas
HYMNUS
O nata lux de lúmine,
Iesu, redémptor sǽculi,
dignáre clemens súpplicum
laudes precésque súmere.
Præ sole vultu flámmeus,
ut nix amíctu cándidus,
in monte dignis téstibus
apparuísti cónditor.
Vates alúmnis ábditos
novis vetústos cónferens,
utrísque te divínitus
Deum dedísti crédere.
Te vox patérna cǽlitus
suum vocávit Fílium,
quem nos fidéli péctore
regem fatémur cǽlitum.
Qui carne quondam cóntegi
dignátus es pro pérditis,
nos membra confer éffici
tui beáti córporis.
Laudes tibi nos pángimus,
diléctus es qui Fílius,
quem Patris atque Spíritus
splendor revélat ínclitus. Amen.
PSALMODIA
Ant. 1Assúmpsit Iesus Petrum et Iacóbum et Ioánnem fratrem eius, et duxit eos in montem excélsum seórsum, et transfigurátus est ante eos. Psalmus 109 (110), 1-5. 7
Ant. 2Nubes lúcida obumbrávit eos; et ecce vox de nube, dicens: Hic est Fílius meus diléctus, in quo mihi complácui. Psalmus 120 (121)
Ant. 3Descendéntibus illis de monte, præcépit Iesus dicens: Némini dixéritis visiónem, donec Fílius hóminis a mórtuis resúrgat, allelúia. Canticum
Cf. 1 Tim 3, 16: De mysterio et gloria ChristiLECTIO BREVIS
{r}Rom 8, 16-17{/r}
Ipse Spíritus testimónium reddit una cum spíritu nostro quod sumus fílii Dei. Si autem fílii, et herédes: herédes quidem Dei, coherédes autem Christi; si tamen compátimur, ut et conglorificémur.
RESPONSORIUM BREVE
Magnificéntia et pulchritúdo in conspéctu eius. {*} Allelúia, allelúia.
Magnificéntia et pulchritúdo in conspéctu eius. {*} Allelúia, allelúia.
Decor et poténtia in sanctuário eius. {*}
Allelúia, allelúia.
Glória Patri, et Fílio, et Spirítui Sancto.
Magnificéntia et pulchritúdo in conspéctu eius. {*} Allelúia, allelúia.
Ad Magnificat, ant. Et audiéntes discípuli cecidérunt in fáciem suam et timuérunt valde; et accéssit Iesus et tétigit eos dixítque eis: Súrgite et nolíte timére, allelúia.
PRECES a MODLITBA ut ad I Vesperas.
AD HORAM MEDIAMPSALMODIA
Ant. predpoludním Ut testimónium habéret a lege et prophétis, in médio Móysi et Elíæ transfigurátus appáruit Iesus.
Ant. napoludnie Dóminus Deus salvátor noster illuminávit vitam et incorruptiónem per Evangélium.
Ant. popoludní Audiéntes discípuli Patris vocem, cecidérunt in fácies suas et timuérunt valde.
AD TERTIAMLECTIO BREVIS
{r}Ex 19, 9{/r}
Cumque rettulísset Móyses verba pópuli ad Dóminum ait ei Dóminus: «Ecce ego véniam ad te in calígine nubis, ut áudiat me pópulus loquéntem ad te et tibi quoque credat in perpétuum».
Speciósus forma es præ fíliis hóminum.
Diffúsa est grátia in lábiis tuis.
AD SEXTAMLECTIO BREVIS
{r}Ex 33, 9. 11{/r}
Ingrésso Móyse tabernáculum, descendébat colúmna nubis et stabat ad óstium; loquebatúrque cum Móyse. Loquebátur autem Dóminus ad Móysen fácie ad fáciem, sicut solet loqui homo ad amícum suum.
Respícite ad Dóminum, et illuminámini.
Et fácies vestræ non confundéntur.
AD NONAMLECTIO BREVIS
{r}2 Cor 3, 18{/r}
Nos omnes reveláta fácie glóriam Dómini speculántes, in eándem imáginem transformámur a claritáte in claritátem tamquam a Dómini Spíritu.
Dómine, apud te est fons vitæ
Et in lúmine tuo vidébimus lumen.
Die 7 augusti
SS. XYSTI II, PAPÆ, ET SOCIORUM, MARTYRUM
De Communi plurimorum martyrum.
ORATIO
Quǽsumus, omnípotens Deus, ut nos, virtúte Spíritus Sancti, et ad credéndum dóciles et ad confiténdum fortes effícias, qui beáto Xysto eiúsque sóciis, propter verbum tuum et testimónium Iesu, ánimas suas pónere tribuísti.
Eodem die 7 augusti
S. CAIETANI, PRESBYTERI
De Communi pastorum, vel sanctorum: pro religiosis.
ORATIO
Deus, qui beáto Caietáno presbýtero apostólicam vivéndi formam imitári tribuísti, eius nobis exémplo et intercessióne concéde in te semper confídere, et regnum tuum indesinénter quǽrere.
Die 8 augusti
S. DOMINICI, PRESBYTERI
Memoria
De Communi pastorum: pro presbyteris, vel sanctorum virorum: pro religiosis, præter sequentia:
Ad Laudes matutinas et Vesperas
HYMNUS
Novus athléta Dómini
collaudétur Domínicus,
qui rem confórmat nómini,
vir factus evangélicus.
Consérvans sine mácula
virginitátis lílium,
ardébat quasi fácula
pro zelo pereúntium.
Mundum calcans sub pédibus
accínxit cor ad prœ́lia,
nudus occúrrens hóstibus,
Christi suffúltus grátia.
Pugnat verbo, miráculis,
missis per orbem frátribus,
crebros adiúngens sédulis
fletus oratiónibus.
Sit trino De{i}o{/i} et símplici
laus, honor, decus, glória,
qui nos prece Domínici
ducat ad cæli gáudia. Amen.
ORATIO
Adiuvet Ecclésiam tuam, Dómine, beátus Domínicus méritis et doctrínis, atque pro nobis efficiátur piíssimus intervéntor, qui tuæ veritátis éxstitit prædicátor exímius.
Die 9 augusti
S. TERESIÆ BENEDICTÆ ET CRUCE, VIRGINIS ET MARTYRIS
Festum
De Communi martyrum vel sanctarum mulierum: pro religiosis.
Deus patrum nostrórum, qui beátam Terésiam Benedíctam mártyrem ad cognitiónem Fílii tui crucifíxi eiúsque imitatiónem usque ad mortem perduxísti, ipsa intercedénte concéde, ut omnes hómines Christum Salvatórem agnóscant et per eum ad perpétuam tui visiónem advéniant.
Die 10 augusti
S. LAURENTII, DIACONI ET MARTYRIS
Festum
De Communi unius martyris, præter sequentia:
Ad Laudes matutinas
HYMNUS
In mártyris Lauréntii
non incruénto prœ́lio,
armáta pugnávit Fides
própr{i}i{/i}i cruóris pródiga.
Hic primus e septem viris
qui stant ad aram próximi,
levíta sublímis gradu
et céteris præstántior.
Hic dímicans fortíssimus
non ense præcínxit latus,
hostíle sed ferrum retro
torquens in auctórem tulit.
Sic, sancte Laurénti, tuam
nos passiónem quǽrimus;
quod quisque supplex póstulat,
fert impetrátum próspere,
Dum cæl{i}i{/i} inenarrábili
alléctus urbi múniceps,
ætérn{i}æ{/i} in arce cúriæ
gestas corónam cívicam.
Honor Patri cum Fílio
et Spíritu Paráclito,
qui nos tuis suffrágiis
ditent perénni láurea. Amen.
Ant. 1Adhǽsit ánima mea post te, quia caro mea igne cremáta est pro te, Deus meus.
Psalmi et canticum de dominica hebd. I.
Ant. 2Misit Dóminus ángelum suum et liberávit me de médio ignis, et non sum æstuátus.
Ant. 3Beátus Lauréntius orábat dicens: Grátias tibi ago, Dómine, quia iánuas tuas íngredi mérui.
LECTIO BREVIS
{r}2 Cor 1, 3-5{/r}
Benedíctus Deus et Pater Dómini nostri Iesu Christi, Pater misericordiárum et Deus totíus consolatiónis, qui consolátur nos in omni tribulatióne nostra, ut possímus et ipsi consolári eos, qui in omni pressúra sunt, per exhortatiónem, qua exhortámur et ipsi a Deo; quóniam, sicut abúndant passiónes Christi in nobis, ita per Christum abúndat et consolátio nostra.
RESPONSORIUM BREVE
Fortitúdo mea {*} Et laus mea Dóminus.
Fortitúdo mea {*} Et laus mea Dóminus.
Et factus est mihi in salútem. {*}
Et laus mea Dóminus.
Glória Patri, et Fílio, et Spirítui Sancto.
Fortitúdo mea {*} Et laus mea Dóminus.
Ad Benedictus, ant. Puer meus, noli timére, quia ego sum tecum; si transíeris per ignem, flamma non nocébit tibi, et odor ignis non erit in te.
ORATIO
Deus, cuius caritátis ardóre beátus Lauréntius servítio cláruit fidélis et martýrio gloriósus, fac nos amáre quod amávit, et ópere exercére quod dócuit.
Ad Vesperas
HYMNUS
Mártyris Christi cólimus triúmphum,
dona qui mundi peritúra spernit,
fert opem nudis, aliménta, nummos
tradit egénis.
Igne torquétur, stábili tenóre
cordis accénsus súperat mináces
ígnium flammas in amóre vitæ
semper opímæ.
Spíritum sumpsit chorus angelórum,
íntulit cælo bene laureándum,
ut scelus laxet hóminum, precándo
omnipoténtem.
Súpplici voto rogitámus ergo
ómnibus, martyr, véniam precéris,
cordis ardóres, fídei tenácem
usque vigórem.
Glóriam Patri resonémus omnes,
eius et Nato modulémur apte,
cum quibus regnat simul et creátor
Spíritus almus. Amen.
Ant. 1Lauréntius ingréssus est martyr, et conféssus est nomen Dómini Iesu Christi.
Psalmi et canticum de Communi.
Ant. 2Beátus Lauréntius clamávit dicens: Gáudeo plane, quia hóstia Christi éffici mérui.
Ant. 3Grátias ago, Dómine Iesu Christe, quia iánuas tuas íngredi mérui.
LECTIO BREVIS
{r}1 Petr 4, 13-14{/r}
Caríssimi, quemádmodum communicátis Christi passiónibus, gaudéte, ut et in revelatióne glóriæ eius gaudeátis exsultántes. Si exprobrámini in nómine Christi, beáti, quóniam Spíritus glóriæ et Dei super vos requiéscit.
RESPONSORIUM BREVE
Probásti nos, Deus, {*} Et eduxísti nos in refrigérium.
Probásti nos, Deus, {*} Et eduxísti nos in refrigérium.
Igne nos examinásti, sicut examinátur argéntum. {*}
Et eduxísti nos in refrigérium.
Glória Patri, et Fílio, et Spirítui Sancto.
Probásti nos, Deus, {*} Et eduxísti nos in refrigérium.
Ad Magnificat, ant. Beátus Lauréntius dixit: Mea nox obscúrum non habet, sed ómnia in luce claréscunt.
ORATIO ut ad Laudes matutinas.
AD HORAM MEDIAM
Die 11 augusti
S. CLARÆ, VIRGINIS
Memoria
De Communi virginum, vel sanctarum mulierum: pro religiosis.
ORATIO
Deus, qui beátam Claram ad paupertátis amórem misericórditer adduxísti, eius nobis intercessióne concéde, ut, in paupertáte spíritus Christum sequéntes, ad tui contemplatiónem in cælésti regno perveníre mereámur.
Die 12 augusti
S. IOANNÆ FRANCISCÆ DE CHANTAL, RELIGIOSÆ
Divione (Dijon) in Gallia, anno 1572 nata est; nobili viro de Chantal nuptui tradita, sex habuit filios quos pie educavit. Viro vita functo, sub moderatione sancti Francisci de Sales viam perfectionis alacriter percurrit atque opera caritatis in pauperes præsertim et ægrotos exercuit. Instituto a Visitatione initium dedit, quod et sapienter direxit. Mortua est anno 1641.
De Communi sanctarum mulierum: pro religiosis.
ORATIO
Deus, qui beátam Ioánnam Francíscam per várias vitæ sémitas præcláris méritis illustrásti, ipsíus nobis intercessióne concéde, ut, in vocatióne nostra fidéliter ambulántes, lucis exémpla iúgiter ostendámus.
Die 13 augusti
SS. PONTIANI, PAPÆ ET HIPPOLYTI, PRESBYTERI, MARTYRUM
De Communi plurimorum martyrum, vel pastorum.
ORATIO
Patiéntia pretiósa iustórum tuæ nobis, Dómine, quǽsumus, afféctum dilectiónis accúmulet, et in córdibus nostris sacræ fídei semper exérceat firmitátem.
Die 14 augusti
S. MAXIMILIANI MARIÆ KOLBE, PRESBYTERI ET MARTYRIS
Memoria
De Communi unius martyris, vel pastorum: pro presbyteris, præter sequentia:
Ad Laudes matutinas
Ad Benedictus, ant. Magnificábitur Christus in córpore meo, sive per vitam sive per mortem. Mihi enim vívere Christus est et mori lucrum.
ORATIO
Deus, qui sanctum Maximiliánum Maríam, presbýterum et mártyrem, amóre Vírginis Immaculátæ succénsum, animárum zelo et próximi dilectióne replevísti, concéde propítius, ut, eo intercedénte, pro tua glória in servítio hóminum strénue laborántes, usque ad mortem Fílio tuo conformári valeámus.
Die 15 augusti
IN ASSUMPTIONE BEATÆ MARIÆ VIRGINIS
Sollemnitas
Ad I Vesperas
HYMNUS
Gáudium mundi, nova stella cæli,
prócreans solem, páriens paréntem,
da manum lapsis, fer opem cadúcis,
virgo María.
Te Deo factam liquet esse scalam
qua tenens summa petit Altus ima;
nos ad excélsi remeáre cæli
cúlmina dona.
Te beatórum chorus angelórum,
te prophetárum et apostolórum
ordo prælátam sibi cernit unam
post Deitátem.
Laus sit excélsæ Tríadi perénnis,
quæ tibi, Virgo, tríbuit corónam,
atque regínam statuítque nostram
próvida matrem. Amen.
Ant. 1Ascéndit Christus super cælos, et præparávit suæ castíssimæ Matri immortalitátis locum, allelúia.
Psalmi et canticum de Communi b. Mariæ V.
Ant. 2Paradísi porta per Evam cunctis clausa est et per Maríam Vírginem íterum patefácta est, allelúia.
Ant. 3Exaltáta est Virgo María super omnes cælos; veníte, omnes: magnificémus Christum regem, cuius regnum est ómnium sæculórum.
LECTIO BREVIS
{r}Rom 8, 30{/r}
Quos Deus prædestinávit, hos et vocávit; et quos vocávit, hos et iustificávit; quos autem iustificávit, illos et glorificávit.
RESPONSORIUM BREVE
Assúmpta est María in cælum, {*} Gaudent ángeli.
Assúmpta est María in cælum, {*} Gaudent ángeli.
Laudántes benedícunt Dóminum. {*}
Gaudent ángeli.
Glória Patri, et Fílio, et Spirítui Sancto.
Assúmpta est María in cælum, {*} Gaudent ángeli.
Ad Magnificat, ant. Beátam me dicent omnes generatiónes, quia fecit mihi magna qui potens est, allelúia.
PRECES
Deum Patrem omnipoténtem magnis láudibus extollámus, qui Maríam matrem Fílii sui ab ómnibus generatiónibus celebrári vóluit, et ab eo súpplices petámus:
Plenam grátia intuére, et exáudi nos.
Deus, mirabílium patrátor, qui immaculátam Vírginem Maríam córpore et ánima cæléstis glóriæ Christi fecísti consórtem,
filiórum tuórum corda ad eándem glóriam dírige.
Plenam grátia intuére, et exáudi nos.
Qui Maríam dedísti nobis matrem, ipsa intercedénte, concéde medélam lánguidis, solámen mæréntibus, véniam peccatóribus,
et ómnibus salútem et pacem.
Plenam grátia intuére, et exáudi nos.
Qui Maríam plenam grátia fecísti,
lætam grátiæ tuæ cópiam ómnibus concéde.
Plenam grátia intuére, et exáudi nos.
Ecclésia tua sit cor unum et ánima una in caritáte,
et fidéles persevérent unánimes in oratióne cum María, matre Iesu.
Plenam grátia intuére, et exáudi nos.
Qui Maríam cæli coronásti regínam,
fac ut defúncti in regno tuo cum sanctórum ágmine gáudeant in ætérnum.
Plenam grátia intuére, et exáudi nos.
Pater noster.ORATIO
Deus, qui beátam Vírginem Maríam, eius humilitátem respíciens, ad hanc grátiam evexísti, ut Unigénitus tuus ex ipsa secúndum carnem nascerétur, et hodiérna die superexcellénti glória coronásti, eius nobis précibus concéde, ut, redemptiónis tuæ mystério salváti, a te exaltári mereámur.
Ad Invitatorium
Ant. Veníte adorémus Regem regum, cuius hódie ad æthéreum Virgo Mater assúmpta est cælum.
Ad Laudes matutinas
HYMNUS
Solis, o Virgo, rádiis amícta,
bis caput senis redimíta stellis,
luna c{i}u{/i}i præbet pédibus scabéllum,
ínclita fulges.
Mortis, inférni domitríxque culpæ,
ássides Christo studiósa nostri,
teque regínam célebrat poténtem
terra polúsque.
Asseclas diæ fídei tuére;
díssitos adduc ad ovíle sacrum;
quas diu gentes tegit umbra mortis
úndique coge.
Sóntibus mitis véniam precáre,
ádiuva flentes, ínopes et ægros,
spes mica cunctis per acútæ vitæ
certa salútis.
Laus sit excélsæ Tríadi perénnis,
quæ tibi, Virgo, tríbuit corónam,
atque regínam statuítque nostram
próvida matrem. Amen.
Ant. 1Beáta es, María, quia per te mundi salus advénit; iam gloriósa gaudes ante Dóminum.
Psalmi et canticum de dominica hebd. I.
Ant. 2Exaltáta est Virgo María super choros angelórum; gáudeant omnes fidéles et benedícant Dóminum.
Ant. 3Nomen tuum ita magnificávit Dóminus, ut non recédat laus tua de ore hóminum.
LECTIO BREVIS
Cf. {r}Is 61, 10{/r}
Gaudens gaudébo in Dómino, et exsultábit ánima mea in Deo meo, quia índuit me vestiméntis salútis et induménto iustítiæ circúmdedit me, quasi sponsam ornátam monílibus suis.
RESPONSORIUM BREVE
Hódie María Virgo {*} Ad cælos ascéndit.
Hódie María Virgo {*} Ad cælos ascéndit.
Et in ætérnum cum Christo triúmphat. {*}
Ad cælos ascéndit.
Glória Patri, et Fílio, et Spirítui Sancto.
Hódie María Virgo {*} Ad cælos ascéndit.
Ad Benedictus, ant. Pulchra est et decóra fília Ierúsalem, quæ ascéndit sicut auróra consúrgens.
PRECES
Salvatórem nostrum celebrántes, qui ex María Vírgine nasci dignátus est, exorémus dicéntes:
Plenam grátia intuére, et exáudi nos.
Verbum ætérnum, quod Maríam habitatiónis tuæ arcam incorruptíbilem elegísti,
líbera nos a corruptióne peccáti.
Plenam grátia intuére, et exáudi nos.
Redémptor noster, qui Vírginem Maríam thálamum puríssimum habitatiónis tuæ et Spíritus Sancti fecísti sacrárium,
nos templum tui Spíritus fac perénne.
Plenam grátia intuére, et exáudi nos.
Rex regum, qui matrem tuam córpore et ánima tecum voluísti in cælum assúmptam,
fac ut quæ sursum sunt semper cogitémus.
Plenam grátia intuére, et exáudi nos.
Dómine cæli et terræ, qui Maríam regínam a dextris tuis astáre fecísti,
tríbue nos eiúsdem glóriæ meréri consórtium.
Plenam grátia intuére, et exáudi nos.
Pater noster.ORATIO
Deus, qui beátam Vírginem Maríam, eius humilitátem respíciens, ad hanc grátiam evexísti, ut Unigénitus tuus ex ipsa secúndum carnem nascerétur, et hodiérna die superexcellénti glória coronásti, eius nobis précibus concéde, ut, redemptiónis tuæ mystério salváti, a te exaltári mereámur.
AD HORAM MEDIAMPSALMODIA
Ant. 1 Quasi cedrus exaltáta es in Líbano, et quasi cypréssus in monte Sion, sancta Dei Génetrix.
Ant. 2 Cæli regínam, María, te iure fatémur, ex cuius thálamo procéssit iustítiæ sol.
Ant. 3 Exaltáta est sancta Dei Génetrix super choros angelórum ad cæléstia regna.
AD TERTIAMLECTIO BREVIS
{r}Iudt 13, 17b-18b{/r}
Et obstúpuit omnis pópulus valde et inclinántes se adoravérunt Deum et dixérunt unánimes: Benedíctus es, Deus noster, qui ad níhilum redegísti inimícos pópuli tui in hodiérna die. Et dixit ad eam Ozias: Benedícta tu es, fília, a Deo excélso præ ómnibus muliéribus, quæ sunt super terram.
Assúmpta est María in cælum, gaudent ángeli.
Laudántes benedícunt Dóminum.
AD SEXTAMLECTIO BREVIS
{r}Ap 12, 1{/r}
Signum magnum appáruit in cælo: múlier amícta sole, et luna sub pédibus eius, et super caput eius coróna stellárum duódecim.
Exaltáta est sancta Dei Génetrix.
Super choros angelórum ad cæléstia regna.
AD NONAMLECTIO BREVIS
{r}2 Cor 5, 1{/r}
Scimus quóniam si terréstris domus nostra huius tabernáculi dissolvátur, ædificatiónem ex Deo habémus domum non manufáctam, ætérnam in cælis.
María Virgo assúmpta est ad æthéreum thálamum.
In quo Rex regum stelláto sedet sólio.
Ad II Vesperas
HYMNUS Gáudium mundi ut ad I Vesperas.
Ant. 1Assúmpta est María in cælum, gaudent ángeli, laudántes benedícunt Dóminum.
Psalmi et canticum de Communi b. Mariæ V.
Ant. 2María Virgo assúmpta est ad æthéreum thálamum, in quo Rex regum stelláto sedet sólio.
Ant. 3Benedícta fília tu a Dómino, quia per te fructum vitæ communicávimus.
LECTIO BREVIS
{r}1 Cor 15, 22-23{/r}
Sicut in Adam omnes moriúntur, ita et in Christo omnes vivificabúntur. Unusquísque autem in suo órdine: primítiæ Christus; deínde hi, qui sunt Christi.
RESPONSORIUM BREVE
María Virgo exaltáta est {*} Super choros angelórum.
María Virgo exaltáta est {*} Super choros angelórum.
Benedíctus Dóminus, qui exaltávit eam. {*}
Super choros angelórum.
Glória Patri, et Fílio, et Spirítui Sancto.
María Virgo exaltáta est {*} Super choros angelórum.
Ad Magnificat, ant. Hódie María Virgo cælos ascéndit; gaudéte, quia cum Christo regnat in ætérnum.
PRECES ut ad I Vesperas.
ORATIO ut ad Laudes matutinas.
Die 16 augusti
S. STEPHANI HUNGARIÆ
De Communi sanctorum virorum.
ORATIO
Concéde, quǽsumus, Ecclésiæ tuæ, omnípotens Deus, ut beátum Stéphanum, quem regnántem in terris propagatórem hábuit, propugnatórem habére mereátur gloriósum in cælis.
Die 19 augusti
S. IOANNIS EUDES, PRESBYTERI
De Communi pastorum, vel sanctorum: pro religiosis.
ORATIO
Deus, qui beátum Ioánnem presbýterum ad annuntiándum investigábiles Christi divítias mirabíliter elegísti, da nobis, eius exémplis et mónitis, ut in tua sciéntia crescéntes, secúndum Evangélii lumen fidéliter conversémur.
Die 20 augusti
S. BERNARDI, ABBATIS ET ECCLESIÆ DOCTORIS
Memoria
De Communi doctorum Ecclesiæ, vel sanctorum virorum: pro religiosis, præter sequentia:
Ad Laudes matutinas
HYMNUS Bernardut ad Vesperas.
Ad Benedictus, ant. Beátus Bernárdus, cuius ánima sempitérni Verbi mirífice fuit illustráta splendóribus, in univérsa Ecclésia fídei et doctrínæ lúmine radiávit.
ORATIO
Deus, qui beátum Bernárdum abbátem, zelo domus tuæ succénsum, in Ecclésia tua lucére simul et ardére fecísti, eius nobis intercessióne concéde, ut, eódem spíritu fervéntes, tamquam fílii lucis iúgiter ambulémus.
Ad Vesperas
HYMNUS
Bernárde, gemma cǽlitum,
laudes, tibi quas pángimus,
in nostra verte gáudia
salútis atque múnera.
Te Christus ussit íntimo
dilectiónis vúlnere
Sponsǽque fecit próvidus
scutum, colúmnam, lámpada.
Almus dedit te Spíritus
os veritátis prófluum
et angelórum pábuli
arcána mella próferens.
Amóris æstu cándidi
te Virgo Mater ímbuit,
quam nemo te facúndius
vel prædicávit áltius.
Te quæsiérunt árbitrum
reges, magístri, prǽsules,
cultórque solitúdinis
fama replésti sǽculum.
Sit Trinitáti glória,
quæ se vidéndam lárgiens,
tecum benígna gáudio
nos det perénni pérfrui. Amen.
Ad Magnificat, ant. Bernárdus, doctor mellífluus, amícus Sponsi, Vírginis Matris præco miríficus, in Claraválle pastor effúlsit claríssimus.
Die 21 augusti
S. PII X, PAPÆ
Memoria
De Communi pastorum: pro papis.
ORATIO
Deus, qui, ad tuéndam cathólicam fidem et univérsa in Christo instauránda, sanctum Pium papam cælésti sapiéntia et apostólica fortitúdine replevísti, concéde propítius, ut, eius institúta et exémpla sectántes, prǽmia consequámur ætérna.
Die 22 augusti
BEATÆ MARIÆ VIRGINIS REGINÆ
Memoria
De Communi b. Mariæ V., præter sequentia:
Ad Invitatorium
Ant. Christum regem, qui suam coronávit Matrem, veníte, adorémus.
Ad Laudes matutinas
HYMNUS
O quam glorífica luce corúscas,
stirpis Davídicæ régia proles,
sublímis résidens, virgo María,
supra cælígenas ǽtheris omnes.
Tu, cum virgíneo mater honóre,
cælórum Dómino péctoris aulam
sacris viscéribus casta parásti;
natus hinc Deus est córpore Christus:
Quem cunctus vénerans orbis adórat,
c{i}u{/i}i nunc rite genu fléctitur omne,
a quo te pétimus subveniénte
abiéctis ténebris gáudia lucis.
Hoc largíre, Pater lúminis omnis,
Natum per próprium, Flámine Sancto,
qui tecum nítida vivit in æthra
regnans ac móderans sǽcula cuncta. Amen.
Ad Benedictus, ant. Regína mundi digníssima, María virgo perpétua, tu genuísti Christum Dóminum, salvatórem ómnium.
ORATIO
Deus, qui Fílii tui Genetrícem, nostram constituísti matrem atque regínam, concéde propítius, ut, ipsíus intercessióne suffúlti, tuórum in regno cælésti consequámur glóriam filiórum.
Ad Vesperas
HYMNUS
Mole graváti críminum
ad te, regína cǽlitum,
confugiéntes, póscimus
nostris ut adsis précibus.
Ætérnæ vitæ iánua,
aurem nobis accómmoda,
per quam spes vitæ rédiit,
quam Eva peccans ábstulit.
Tu princeps, mater Príncipis,
vitam depósce fámulis,
et pæniténdi spátia
nobis indúlgens ímpetra.
Oránte te, sanctíssima,
sanctórum orant ágmina;
tuis, regína, précibus
conciliétur Dóminus.
Regnátrix mater ómnium,
vota comple fidélium,
ac vitam nos post frágilem
ad veram perduc réquiem.
Sit laus Patri cum Fílio
et Spíritu Paráclito,
qui te præ cunctis cǽlica
exornavérunt glória. Amen.
Ad Magnificat, ant. Beáta es, Virgo María, quia credidísti quæ dicta sunt tibi a Dómino: cum Christo regnas in ætérnum.
ORATIO ut ad Laudes matutinas.
Post Completorium, convenienter dicitur ant. Ave, Regína cælórum.
Die 23 augusti
S. ROSÆ DE LIMA, VIRGINIS
De Communi virginum, vel sanctarum mulierum: pro religiosis.
ORATIO
Deus, qui beátam Rosam, tuo amóre succénsam, mundum relínquere et tibi soli in austeritáte pæniténtiæ vacáre fecísti, da nobis, eius intercessióne, ut, vias vitæ sectántes in terris, torrénte deliciárum tuárum perfruámur in cælis.
Die 24 augusti
S. BARTHOLOMÆI, APOSTOLI
Festum
De Communi Apostolorum, præter sequentia:
Ad Laudes matutinas
HYMNUS
Relúcens inter príncipes
imménsæ Dei cúriæ,
Bartholomǽe, láudibus
nostrísqu{i}e{/i} inténde précibus.
In te convértit Dóminus
dilectiónis óculos,
quem pur{i}a{/i} insígnem cónspicit
sinceritáte péctoris.
Prophétæ quem cecínerant,
quem longa clamant témpora,
Messías en mirífice
tibi lætánti próditur.
Teque sibi conglútinat
sequélæ talis fœ́dere,
qua petat crucis áspera,
cæli sedes retríbuat.
Christi, qui sæclis ímperat,
amícus et apóstolus,
Magístro vivis, hómines
Magístri vita réfoves.
Sit ipsi laus et glória,
qui, te iuvánte méritis,
ætérnis nos in pátria
frui concédat gáudiis. Amen.
ORATIO
Róbora in nobis, Dómine, fidem, qua Fílio tuo beátus Bartholomǽus apóstolus sincéro ánimo adhǽsit, et præsta, ut, ipso deprecánte, Ecclésia tua cunctis géntibus salútis fiat sacraméntum.
Die 25 augusti
S. LUDOVICI
De Communi sanctorum virorum.
ORATIO
Deus, qui beátum Ludovícum e terréni regíminis cura ad cæléstis regni glóriam transtulísti, eius, quǽsumus, intercessióne concéde, ut, per múnera temporália quæ gérimus, regnum tuum quærámus ætérnum.
Eodem die 25 augusti
S. IOSEPH DE CALASANZ, PRESBYTERI
De Communi sanctorum virorum: pro educatoribus, vel pastorum: pro presbyteris.
ORATIO
Deus, qui beátum Ioseph presbýterum tanta caritáte et patiéntia decorásti, ut púeris erudiéndis omníque virtúte exornándis constánter incúmberet, concéde, quǽsumus, ut, quem sapiéntiæ præceptórem cólimus, veritátis cooperatórem iúgiter imitémur.
Die 27 augusti
S. MONICÆ
Memoria
De Communi sanctarum mulierum.
Ad Laudes matutinas
Ad Benedictus, ant. Exaudísti eam, Dómine, nec despexísti lácrimas eius, cum profluéntes rigárent terram in omni loco oratiónis eius.
ORATIO
Deus, mæréntium consolátor, qui beátæ Mónicæ pias lácrimas in conversióne fílii sui Augustíni misericórditer suscepísti, da nobis, utriúsque intervéntu, peccáta nostra deploráre, et grátiæ tuæ indulgéntiam inveníre.
Ad Vesperas
Ad Magnificat, ant. Mónica in Christo vivificáta, étiam nondum a carne resolúta, sic vixit ut laudarétur nomen Dei in fide moribúsque eius.
Die 28 augusti
S. AUGUSTINI, EPISCOPI ET ECCLESIÆ DOCTORIS
Memoria
De Communi pastorum: pro episcopis, et doctorum Ecclesiæ, præter sequentia:
Ad Laudes matutinas
HYMNUS
Fulget in cælis célebris sacérdos,
stella doctórum rútilat corúsca,
lumen intáctum fídei per orbis
clímata spargens.
Cive tam claro, Sion o supérna,
læta dic laudes Dómino salútis,
qui modis miris sibi vinxit ipsum
lúmine complens.
Hic fidem sacram vigil usque firmat,
arm{i}a{/i} et errórum súbigit poténter,
sórdidos mores lavat et repéllit
dógmate claro.
Qui, gregis Christi speculátor almus,
énites clero monachísque forma,
tu Dei nobis fáciem benígnam
fac prece semper.
Laus, honor, virtus Triádi beátæ,
cuius in terris studuíst{i}i{/i} amánter
alta scrutári nitidáqu{i}e{/i} in astris
luce potíris. Amen.
Ad Benedictus, ant. Tu éxcitas, Dómine, ut laudáre te deléctet, quia fecísti nos ad te; et inquiétum est cor nostrum donec requiéscat in te.
ORATIO
Innova, quǽsumus, Dómine, in Ecclésia tua spíritum quo beátum Augustínum epíscopum imbuísti, ut, eódem nos repléti, te solum veræ fontem sapiéntiæ sitiámus, et supérni amóris quærámus auctórem.
Ad Vesperas
HYMNUS Fulget ut ad Laudes matutinas.
Ad Magnificat, ant. Sero te amávi, pulchritúdo tam antíqua et tam nova, sero te amávi. Vocásti et clamásti et rupísti surditátem meam.
Die 29 augusti
IN PASSIONE S. IOANNIS BAPTISTÆ
Memoria
Ad Invitatorium
Ant. Agnum Dei, quem in passióne Ioánnes præcéssit, veníte, adorémus.
Ad Laudes matutinas
HYMNUS
O nimis felix meritíque celsi,
nésciens labem nívei pudóris,
prǽpotens martyr eremíque cultor,
máxime vatum.
Nunc potens nostri méritis opímis
péctoris duros lápides repélle,
ásperum planans iter, et refléxos
dírige calles,
Ut pius mundi sator et redémptor,
méntibus pulsa mácula polítis,
rite dignétur véniens sacrátos
pónere gressus.
Láudibus cives célebrant supérni
te, Deus simplex paritérque trine;
súpplices ac nos véniam precámur:
parce redémptis. Amen.
Ant. 1Misit Dóminus manum suam, et tétigit os meum, et prophétam in géntibus dedit me.
Psalmi et canticum de dominica hebd. I.
Ant. 2 Metuébat Heródes Ioánnem, sciens eum virum iustum et sanctum, et custodiébat eum.
Ant. 3Heródes libénter Ioánnem audiébat, et audíto eo multa faciébat.
LECTIO BREVIS
{r}Is 49, 1b-2{/r}
Dóminus ab útero vocávit me, de ventre matris meæ recordátus est nóminis mei; et pósuit os meum quasi gládium acútum, in umbra manus suæ protéxit me et pósuit me sicut sagíttam eléctam, in pháretra sua abscóndit me.
RESPONSORIUM BREVE
Vos misístis ad Ioánnem, {*} Et testimónium perhíbuit veritáti.
Vos misístis ad Ioánnem, {*} Et testimónium perhíbuit veritáti.
Ille erat lucérna ardens et lucens. {*}
Et testimónium perhíbuit veritáti.
Glória Patri, et Fílio, et Spirítui Sancto.
Vos misístis ad Ioánnem, {*} Et testimónium perhíbuit veritáti.
Ad Benedictus, ant. Amícus sponsi, qui stat et audit eum, gáudio gaudet propter vocem sponsi: hoc ergo gáudium meum implétum est.
PRECES
Christum, qui Ioánnem præcursórem ante fáciem suam misit, ut viam Dómini paráret, fidénter deprecémur:
Vísita nos, Oriens ex alto.
Tu, qui Ioánnem exsultáre fecísti in sinu Elísabeth,
de tuo advéntu in hunc mundum fac nos semper gaudére.
Vísita nos, Oriens ex alto.
Tu, qui Baptístæ ore et vita viam pæniténtiæ nobis indicásti,
convérte corda nostra ad mandáta regni tui.
Vísita nos, Oriens ex alto.
Tu, qui ore hóminis te prædicári voluísti,
mitte in orbem totum Evangélii tui præcónes.
Vísita nos, Oriens ex alto.
Tu, qui in Iordáne a Ioánne baptizári voluísti, ut omnis iustítia implerétur,
fac nos iustítiæ regni tui adlaboráre.
Vísita nos, Oriens ex alto.
Pater noster.ORATIO
Deus, qui beátum Ioánnem Baptístam et nascéntis et moriéntis Fílii tui Præcursórem esse voluísti, concéde, ut, sicut ille veritátis et iustítiæ martyr occúbuit, ita et nos pro tuæ confessióne doctrínæ strénue certémus.
Ad Vesperas
HYMNUS
Præcéssor almus grátiæ
et veritátis ángelus,
lucérna Christ{i}i{/i} et pérpetis
evangelísta lúminis,
Prophetíæ præcónia,
quæ voce, vit{i}a{/i} et áctibus
cantáverat, hæc ástruit
mortis sacræ signáculo.
Nam nascitúrum sǽculis,
nascéndo quem prævénerat,
sed et datórem próprii
monstráverat baptísmatis,
Huiúsce mort{i}em{/i} innóxiam,
qua vita mund{i}o{/i} est réddita,
signat sui præságio
baptísta martyr sánguinis.
Præsta, Pater piíssime,
sequi Ioánnis sémitas,
metámus ut pleníssime
ætérna Christi múnera. Amen.
Ant. 1Ne tímeas a fácie eórum, quia ego tecum sum, dicit Dóminus.
Psalmi et canticum de Communi unius martyris.
Ant. 2Misso Heródes spiculatóre, præcépit amputári caput Ioánnis in cárcere.
Ant. 3Ioánnis discípuli venérunt, et tulérunt corpus eius, et posuérunt illud in monuménto.
LECTIO BREVIS
{r}Act 13, 23-25{/r}
Deus ex sémine David secúndum promissiónem edúxit Israel salvatórem Iesum, prædicánte Ioánne ante advéntum eius baptísmum pæniténtiæ omni pópulo Israel. Cum impléret autem Ioánnes cursum suum, dicébat: Quid me arbitrámini esse? Non sum ego; sed ecce venit post me, cuius non sum dignus calceaménta pedum sólvere.
RESPONSORIUM BREVE
Amícus sponsi gaudet {*} Propter vocem sponsi.
Amícus sponsi gaudet {*} Propter vocem sponsi.
Hoc gáudium meum implétum est. {*}
Propter vocem sponsi.
Glória Patri, et Fílio, et Spirítui Sancto.
Amícus sponsi gaudet {*} Propter vocem sponsi.
Ad Magnificat, ant. Non sum ego Christus, sed missus sum ante illum. Opórtet illum créscere, me autem mínui.
PRECES
Deum, qui elégit Ioánnem Baptístam ut regnum Christi ventúrum homínibus annuntiáret, lætánter deprecémur:
Dírige, Dómine, pedes nostros in viam pacis.
Tu, qui Ioánnem a ventre matris eius vocásti ad præparándas vias Fílii tui,
voca nos ad Dóminum ita sequéndum, sicut eum ipse præcéssit.
Dírige, Dómine, pedes nostros in viam pacis.
Sicut dedísti Baptístæ Agnum Dei agnóscere, fac ut ipsum Ecclésia tua demónstret,
et hómines huius témporis agnóscant.
Dírige, Dómine, pedes nostros in viam pacis.
Tu, qui disposuísti prophétam tuum mínui et Christum créscere,
doce nos erga álios húmiles esse, ut manifestéris.
Dírige, Dómine, pedes nostros in viam pacis.
Tu, qui per martýrium Ioánnis iustítiam vindicáre voluísti,
fac nos veritátem tuam indeficiénter testificári.
Dírige, Dómine, pedes nostros in viam pacis.
Meménto ómnium, qui ex hoc sǽculo transiérunt,
illos constítue in regióne lucis et pacis.
Dírige, Dómine, pedes nostros in viam pacis.