TEMPUS QUADRAGESIMÆ

Ab initio Officii feriæ IV Cinerum usque ad Vigiliam paschalem omittitur Allelúia

I. USQUE AD SABBATUM HEBDOMADÆ QUINTÆ

In Officiis de Tempore, ab initio Officii feriæ IV Cinerum usque ad Horam mediam sabbati hebdomadæ V Quadragesimæ inclusive:

Ad Vesperas

HYMNUS

In Officio dominicali:

In Officio feriali:

AD HORAM MEDIAM

HYMNUS

PSALMODIA

Ant. ad Tertiam Advenérunt nobis dies pæniténtiæ ad rediménda peccáta, ad salvándas ánimas.

Ant. ad Sextam Vivo ego, dicit Dóminus; nolo mortem peccatóris, sed ut magis convertátur et vivat.

Ant. ad Nonam Per arma iustítiæ virtútis Dei, commendémus nosmetípsos in multa patiéntia.

Cor mundum crea in me, Deus.

Et spíritum firmum ínnova in viscéribus meis.

Avérte fáciem tuam a peccátis meis.

Et omnes iniquitátes meas dele.

Sacrifícium Deo spíritus contribulátus.

Cor contrítum et humiliátum, Deus, non despícies.

LECTIO BREVIS

{r}1 Th 4, 1. 7{/r}

Fratres, rogámus vos et obsecrámus in Dómino Iesu, ut — quemádmodum accepístis a nobis quómodo vos opórteat ambuláre et placére Deo, sicut et ambulátis — ut abundétis magis. Non enim vocávit nos Deus in immundítia sed in sanctificatióne.

LECTIO BREVIS

{r}Is 30, 15. 18{/r}

Hæc dixit Dóminus Deus, Sanctus Israel: «In conversióne et quiéte salvi éritis; in siléntio et in spe erit fortitúdo vestra». Proptérea exspéctat Dóminus, ut misereátur vestri, et ídeo exaltábitur parcens vobis, quia Deus iudícii Dóminus; beáti omnes, qui exspéctant eum.

LECTIO BREVIS

{r}Deut 4, 29-31{/r}

Cum quæsíeris Dóminum Deum tuum, invénies eum; si tamen toto corde quæsíeris eum et tota ánima tua. Postquam in tribulatióne tua te invénerint ómnia, quæ prædícta sunt, novíssimo témpore revertéris ad Dóminum Deum tuum et áudies vocem eius; quia Deus miséricors Dóminus Deus tuus est; non dimíttet te, nec omníno delébit neque obliviscétur pacti, in quo iurávit pátribus tuis.

LECTIO BREVIS

{r}Sap 11, 23-24a{/r}

Miseréris ómnium, Dómine, quia ómnia potes; et dissímulas peccáta hóminum propter pæniténtiam. Díligis enim ómnia, quæ sunt, et nihil odísti eórum, quæ fecísti.

LECTIO BREVIS

{r}Ez 18, 23{/r}

Numquid voluntátis meæ est mors ímpii, dicit Dóminus Deus, et non ut convertátur a viis suis et vivat?

LECTIO BREVIS

{r}Is 58, 6a. 7{/r}

Nonne hoc est ieiúnium, quod elégi: frángere esuriénti panem tuum et egénos, vagos indúcere in domum? Cum víderis nudum, óperi eum et carnem tuam ne despéxeris.

LECTIO BREVIS

{r}Ioel 2, 17{/r}

Inter vestíbulum et altáre plorent sacerdótes minístri Dómini et dicant: «Parce, Dómine, pópulo tuo et ne des hereditátem tuam in oppróbrium, ut dominéntur eis natiónes».

LECTIO BREVIS

{r}Ier 3, 25b{/r}

Dómino Deo nostro peccávimus nos et patres nostri ab adulescéntia nostra usque ad hanc diem et non audívimus vocem Dómini Dei nostri.

LECTIO BREVIS

{r}Is 58, 1-2a{/r}

Clama fórtiter, ne cesses; quasi tuba exálta vocem tuam et annúntia pópulo meo scélera eórum et dómui Iacob peccáta eórum. Me étenim de die in diem quærunt et scire vias meas volunt, quasi gens, quæ iustítiam fécerit et iudícium Dei sui non derelíquerit.

LECTIO BREVIS

{r}Ez 18, 30b-32{/r}

Convertímini et ágite pæniténtiam ab ómnibus iniquitátibus vestris et non erit vobis in scándalum iniquitátis. Proícite a vobis omnes prævaricatiónes vestras, et fácite vobis cor novum et spíritum novum. Et quare moriémini, domus Israel? Quia nolo mortem moriéntis, dicit Dóminus Deus. Revertímini et vívite.

LECTIO BREVIS

{r}Zac 1, 3b-4b{/r}

Convertímini ad me, ait Dóminus exercítuum; et convértar ad vos. Ne sitis sicut patres vestri, ad quos clamábant prophétæ prióres dicéntes: Convertímini de viis vestris malis et de cogitatiónibus vestris malis; et non audiérunt.

LECTIO BREVIS

{r}Dan 4, 24b{/r}

Peccáta tua eleemósynis rédime et iniquitátes tuas misericórdiis páuperum: sic longitúdo erit prosperitáti tuæ.

LECTIO BREVIS

{r}Is 55, 6-7{/r}

Quǽrite Dóminum, dum inveníri potest; invocáte eum, dum prope est. Derelínquat ímpius viam suam, et vir iníquus cogitatiónes suas; et revertátur ad Dóminum, et miserébitur eius, et ad Deum nostrum, quóniam multus est ad ignoscéndum.

LECTIO BREVIS

{r}Deut 30, 2-3a{/r}

Cum revérsus fúeris ad Dóminum Deum tuum et obœdíeris eius impériis, secúndum ómnia quæ ego hódie præcípio tibi, cum fíliis tuis in toto corde tuo et in tota ánima tua, redúcet Dóminus Deus tuus captivitátem tuam ac miserébitur tui.

LECTIO BREVIS

{r}Hebr 10, 35-36{/r}

Nolíte abícere confidéntiam vestram, quæ magnam habet remuneratiónem; patiéntia enim vobis necessária est, ut voluntátem Dei faciéntes reportétis promissiónem.

LECTIO BREVIS

{r}Is 55, 3{/r}

Inclináte aurem vestram et veníte ad me; audíte, ut vivat ánima vestra, et fériam vobíscum pactum sempitérnum, misericórdias David fidéles.

LECTIO BREVIS

Cf. {r}Ier 3, 12. 14a{/r}

Revertímini, ait Dóminus, et non avértam fáciem meam a vobis, quia pius ego sum, et non iráscar in perpétuum. Convertímini, fílii, qui avérsi estis a me, dicit Dóminus.

LECTIO BREVIS

{r}Iac 1, 27{/r}

Relígio munda et immaculáta apud Deum et Patrem hæc est: visitáre pupíllos et víduas in tribulatióne eórum, immaculátum se custodíre ab hoc sǽculo.

LECTIO BREVIS

{r}Ap 3, 19-20{/r}

Ego, quos amo, árguo et castígo. Æmuláre ergo et pæniténtiam age. Ecce sto ad óstium et pulso. Si quis audíerit vocem meam et aperúerit iánuam, introíbo ad illum et cenábo cum illo et ipse mecum.

LECTIO BREVIS

{r}Is 44, 21-22{/r}

Meménto quóniam servus meus es tu; formávi te, servus meus es tu, Israel, non decípies me. Delévi ut nubem iniquitátes tuas et quasi nébulam peccáta tua; revértere ad me, quóniam redémi te.

LECTIO BREVIS

{r}Gal 6, 7b-8{/r}

Deus non irridétur. Quæ enim semináverit homo, hæc et metet; quóniam, qui séminat in carne sua, de carne metet corruptiónem, qui autem séminat in spíritu, de spíritu metet vitam ætérnam.

LECTIO BREVIS

Cf. {r}2 Cor 4, 10-11{/r}

Semper mortificatiónem Iesu in córpore circumférimus ut et vita Iesu in córpore nostro manifestétur. Semper enim nos, qui vívimus, in mortem trádimur propter Iesum, ut et vita Iesu manifestétur in carne nostra mortáli.

LECTIO BREVIS

{r}1 Petr 4, 13-14{/r}

Sed, quemádmodum communicátis Christi passiónibus, gaudéte, ut et in revelatióne glóriæ eius gaudeátis exsultántes. Si exprobrámini in nómine Christi, beáti, quóniam Spíritus glóriæ et Dei super vos requiéscit.

LECTIO BREVIS

{r}1 Petr 5, 10-11{/r}

Deus omnis grátiæ, qui vocávit vos in ætérnam suam glóriam in Christo Iesu, módicum passos ipse perfíciet, confirmábit, solidábit, fundábit. Ipsi impérium in sǽcula sæculórum. Amen.

LECTIO BREVIS

{r}Ez 33, 10b. 11a{/r}

Iniquitátes nostræ et peccáta nostra super nos sunt, et in ipsis nos tabéscimus; quómodo ergo vívere potérimus? Vivo ego, dicit Dóminus Deus; nolo mortem ímpii, sed ut revertátur ímpius a via sua et vivat.

LECTIO BREVIS

{r}Ier 18, 20b{/r}

Recordáre quod stéterim in conspéctu tuo, ut lóquerer pro eis bonum et avérterem indignatiónem tuam ab eis.

LECTIO BREVIS

{r}Ier 31, 2. 3b. 4a{/r}

Hæc dicit Dóminus: Invénit grátiam in desérto pópulus, qui remánserat a gládio; vadet ad réquiem suam Israel. In caritáte perpétua diléxi te; ídeo attráxi te in misericórdia. Rursúmque ædificábo te, et ædificáberis, virgo Israel.

LECTIO BREVIS

{r}1 Cor 1, 18-19{/r}

Verbum crucis pereúntibus quidem stultítia est, his autem, qui salvi fiunt, virtus Dei est. Scriptum est enim: Perdam sapiéntiam sapiéntium et prudéntiam prudéntium reprobábo.

LECTIO BREVIS

{r}1 Cor 1, 22-24{/r}

Iudǽi signa petunt, et Græci sapiéntiam quærunt, nos autem prædicámus Christum crucifíxum, Iudǽis quidem scándalum, géntibus autem stultítiam; ipsis autem vocátis, Iudǽis atque Græcis, Christum Dei virtútem et Dei sapiéntiam.

LECTIO BREVIS

{r}1 Cor 1, 25-27a{/r}

Quod stultum est Dei, sapiéntius est homínibus, et quod infírmum est Dei, fórtius est homínibus. Quæ stulta sunt mundi, elégit Deus, ut confúndat sapiéntes.

LECTIO BREVIS

{r}1 Tim 2, 4-6{/r}

Deus salvátor noster omnes hómines vult salvos fíeri et ad agnitiónem veritátis veníre. Unus enim Deus, unus et mediátor Dei et hóminum, homo Christus Iesus, qui dedit redemptiónem semetípsum pro ómnibus, testimónium tempóribus suis.

LECTIO BREVIS

{r}Rom 15, 3{/r}

Christus non sibi plácuit, sed sicut scriptum est: Impropéria improperántium tibi cecidérunt super me.

LECTIO BREVIS

{r}Hebr 9, 28{/r}

Christus, semel oblátus ad multórum auferénda peccáta, secúndo sine peccáto apparébit exspectántibus se in salútem.

LECTIO BREVIS

{r}Hebr 4, 14-15{/r}

Habéntes pontíficem magnum, qui penetrávit cælos, Iesum Fílium Dei, teneámus confessiónem; non enim habémus pontíficem, qui non possit cómpati infirmitátibus nostris, tentátum autem per ómnia secúndum similitúdinem absque peccáto.

LECTIO BREVIS

{r}Hebr 7, 26-27{/r}

Talis decébat, ut nobis esset póntifex, sanctus, ínnocens, impollútus, segregátus a peccatóribus et excélsior cælis factus, qui non habet necessitátem cotídie, quemádmodum pontífices, prius pro suis delíctis hóstias offérre, deínde pro pópuli; hoc enim fecit semel semetípsum offeréndo Iesus Christus Dóminus noster.

LECTIO BREVIS

{r}Hebr 9, 11-12{/r}

Christus cum advénit póntifex futurórum bonórum, per ámplius et perféctius tabernáculum, non manufáctum, id est non huius creatiónis, neque per sánguinem hircórum et vitulórum sed per próprium sánguinem introívit semel in Sancta, ætérna redemptióne invénta.

LECTIO BREVIS

{r}Is 53, 2-3{/r}

Ascéndit sicut virgúltum coram eo et sicut radix de terra sitiénti. Non erat spécies ei neque decor, ut aspicerémus eum, et non erat aspéctus, ut desiderarémus eum. Despéctus erat et novíssimus virórum, vir dolórum et sciens infirmitátem, et quasi abscondebámus vultum coram eo; despéctus, unde nec reputabámus eum.

LECTIO BREVIS

{r}Is 53, 4-5{/r}

Vere languóres nostros ipse tulit et dolóres nostros ipse portávit; et nos putávimus eum quasi plagátum, percússum a Deo et humiliátum. Ipse autem vulnerátus est propter iniquitátes nostras, attrítus est propter scélera nostra; disciplína pacis nostræ super eum, et livóre eius sanáti sumus.

LECTIO BREVIS

{r}Is 53, 6-7{/r}

Omnes nos quasi oves errávimus, unusquísque in viam suam declinávit; et pósuit Dóminus in eo iniquitátem ómnium nostrum. Afflíctus est et ipse subiécit se et non apéruit os suum; sicut agnus, qui ad occisiónem dúcitur, et quasi ovis, quæ coram tondéntibus se obmútuit et non apéruit os suum.

LECTIO BREVIS

{r}1 Io 1, 8-9{/r}

Si dixérimus quóniam peccátum non habémus, nosmetípsos sedúcimus, et véritas in nobis non est. Si confiteámur peccáta nostra, fidélis est et iustus, ut remíttat nobis peccáta et emúndet nos ab omni iniustítia.

LECTIO BREVIS

{r}1 Io 2, 1b-2{/r}

Advocátum habémus ad Patrem, Iesum Christum iustum; et ipse est propitiátio pro peccátis nostris, non pro nostris autem tantum sed étiam pro totíus mundi.

LECTIO BREVIS

{r}1 Io 2, 8b-10{/r}

Ténebræ tránseunt, et lumen verum iam lucet. Qui dicit se in luce esse et fratrem suum odit, in ténebris est usque adhuc. Qui díligit fratrem suum, in lúmine manet, et scándalum ei non est.

Ad Completorium

Per hebdomadas I, III, V: Hymnus Te lucis ante términum. Per ceteras hebdomadas: Hymnus Christe, qui, splendor.

Ad Invitatorium

In Officio dominicali et feriali:

Ant. Christum Dóminum, pro nobis tentátum et passum, veníte, adorémus.

Alebo: Utinam hódie vocem Dómini audiátis: Nolíte obduráre corda vestra.

Quando adhibetur et repetitur altera antiphona, quarta stropha psalmi 94 (95) incipit a verbis: Sicut in Meríba.

Ad Laudes matutinas

HYMNUS

In Officio dominicali:

In Officio feriali:

FERIA QUARTA CINERUM

Hebd. IV Psalterii

Ad Laudes matutinas

Psalmi et canticum, cum suis antiphonis, sumi possunt e feria VI hebd. III.

LECTIO BREVIS

{r}Deut 7, 6. 8-9{/r}

Te elégit Dóminus Deus tuus, ut sis ei pópulus peculiáris de cunctis pópulis, qui sunt super terram, quia diléxit vos Dóminus et custodívit iuraméntum, quod iurávit pátribus vestris, edúxit vos in manu forti et redémit te de domo servitútis, de manu pharaónis regis Ægýpti. Et scies quia Dóminus Deus tuus ipse est Deus, Deus fidélis, custódiens pactum et misericórdiam diligéntibus se et his, qui custódiunt mandáta eius, in mille generatiónes.

RESPONSORIUM BREVE

Ipse liberábit me {*} De láqueo venántium.

Ipse liberábit me {*} De láqueo venántium.

Et a verbo malígno. {*}

De láqueo venántium.

Glória Patri, et Fílio, et Spirítui Sancto.

Ipse liberábit me {*} De láqueo venántium.

Ad Benedictus, ant. Cum ieiunátis, nolíte fíeri, sicut hypócritæ, tristes.

PRECES

Grátias agámus Deo Patri, qui donum quadragesimális inítii hódie nobis impéndit. Súpplices eum rogémus, ut his salútis diébus, per infusiónem et operatiónem Spíritus Sancti, corda nostra puríficet et in caritáte confírmet. Ei súpplici prece dicámus:

Da nobis, Dómine, Spíritum Sanctum tuum.

Præsta ut in omni verbo satiémur,

quod procédit de ore tuo.

Da nobis, Dómine, Spíritum Sanctum tuum.

Concéde nobis non in magnis tantum rebus caritátem sectári,

sed étiam in sólitis vitæ adiúnctis prótenus exercére.

Da nobis, Dómine, Spíritum Sanctum tuum.

Tríbue nobis a supérfluis abstinére,

ut frátribus indigéntibus opem ferre valeámus.

Da nobis, Dómine, Spíritum Sanctum tuum.

Da nobis mortificatiónem Fílii tui in córpore nostro circumférre,

qui nos vivificásti in córpore eius.

Da nobis, Dómine, Spíritum Sanctum tuum.

ORATIO

Concéde nobis, Dómine, præsídia milítiæ christiánæ sanctis inchoáre ieiúniis, ut, contra spiritáles nequítias pugnatúri, continéntiæ muniámur auxíliis.

Ad Vesperas

LECTIO BREVIS

{r}Phil 2, 12b-15a{/r}

Cum metu et tremóre vestram salútem operámini; Deus est enim, qui operátur in vobis et velle et perfícere pro suo beneplácito. Omnia fácite sine murmuratiónibus et hæsitatiónibus, ut efficiámini sine queréla et símplices, fílii Dei.

RESPONSORIUM BREVE

Ego dixi: Dómine, {*} Miserére mei.

Ego dixi: Dómine, {*} Miserére mei.

Sana ánimam meam, quia peccávi tibi. {*}

Miserére mei.

Glória Patri, et Fílio, et Spirítui Sancto.

Ego dixi: Dómine, {*} Miserére mei.

Ad Magnificat, ant. Cum facis eleemósynam, nésciat sinístra tua quid fáciat déxtera tua.

PRECES

Glória et honor Deo, qui fœdus novum et ætérnum cum pópulo suo pépigit in sánguine Christi, et rénovat in sacraménto altáris. Sic eum rogémus:

Bénedic, Dómine, pópulum tuum.

Dírige, Dómine, in voluntáte tua, mentes populórum atque regéntium,

ut sincére ad commúne ómnium bonum annitántur.

Bénedic, Dómine, pópulum tuum.

Auge devotiónem eórum, qui, relíctis ómnibus, secúti sunt Christum,

ut præclárum homínibus sanctitátis Ecclésiæ testimónium prǽbeant et exémplum.

Bénedic, Dómine, pópulum tuum.

Qui cunctos hómines ad imáginem tuam fecísti,

fac ut ab iniústa inæqualitáte abhórreant.

Bénedic, Dómine, pópulum tuum.

Omnes errántes ad tuam reduc amicítiam et veritátem,

et doce nos illis adiuméntum impéndere.

Bénedic, Dómine, pópulum tuum.

Da defúnctis in tuam glóriam introíre,

teque in ætérnum collaudáre.

Bénedic, Dómine, pópulum tuum.

FERIA QUINTA POST CINERES

Ad Laudes matutinas

LECTIO BREVIS

Cf. {r}1 Reg 8, 51-53a{/r}

Pópulus tuus, Dómine, et heréditas tua sumus. Sint óculi tui apérti ad deprecatiónem servi tui et pópuli tui Israel, et exáudias nos in univérsis, pro quibus invocavérimus te. Tu enim separásti nos tibi in hereditátem de univérsis pópulis terræ.

Ad Benedictus, ant. Qui vult veníre post me, dicit Dóminus, ábneget semetípsum, et tollat crucem suam, et sequátur me.

PRECES

Pietátem Dei celebrémus, qui in Christo sese revelávit. Ex corde ei supplicémus:

Meménto nostri, Dómine, quia fílii tui sumus.

Da nos mystérium Ecclésiæ áltius percípere,

ut éadem sit nobis et ómnibus efficácius salútis sacraméntum.

Meménto nostri, Dómine, quia fílii tui sumus.

Fac nos, hóminis amátor, humánæ civitátis increménta fovére,

atque in ómnibus regnum tuum inténdere.

Meménto nostri, Dómine, quia fílii tui sumus.

Præsta nobis, ut ad Christum sitiéntes currámus,

qui fontem aquæ vivæ nobis se prǽbuit.

Meménto nostri, Dómine, quia fílii tui sumus.

Dimítte nobis iniquitátes nostras,

et gressus nostros dírige in viam iustítiæ et sinceritátis.

Meménto nostri, Dómine, quia fílii tui sumus.

ORATIO

Actiónes nostras, quǽsumus, Dómine, aspirándo prǽveni et adiuvándo proséquere, ut cuncta nostra operátio a te semper incípiat, et per te cœpta finiátur.

Ad Vesperas

LECTIO BREVIS

{r}Iac 4, 7-8. 10{/r}

Subicímini Deo; resístite Diábolo, et fúgiet a vobis. Appropiáte Deo, et appropinquábit vobis. Emundáte manus, peccatóres, et purificáte corda, dúplices ánimo. Humiliámini in conspéctu Dómini, et exaltábit vos.

Ad Magnificat, ant. Qui perdíderit ánimam suam propter me, dicit Dóminus, invéniet eam in ætérnum.

PRECES

Dei misericórdiam celebrémus, qui nos illúminat grátia Spíritus Sancti, ut opéribus iustítiæ ac fídei luceámus. Orémus, dicéntes:

Vivífica, Dómine, pópulum a Christo redémptum.

Dómine, fons et auctor omnis sanctitátis, epíscopos, presbýteros et diáconos árctius per mystérium eucharísticum Christo coniúnge,

ut grátiam, per impositiónem mánuum accéptam, magis in dies resúscitent.

Vivífica, Dómine, pópulum a Christo redémptum.

Doce fidéles tuos digne et actuóse mensam verbi et córporis Christi frequentáre,

ut, quod fide et sacraménto percepérunt, vita et móribus téneant.

Vivífica, Dómine, pópulum a Christo redémptum.

Dignitátem cuiúsque hóminis, Fílii tui sánguine redémpti, te donánte, agnoscámus,

ut libertátem et consciéntiam fratrum nostrórum observémus.

Vivífica, Dómine, pópulum a Christo redémptum.

Da, ut hómines immódicam terréstrium bonórum cupídinem moderéntur,

et aliórum inópiæ cónsulant.

Vivífica, Dómine, pópulum a Christo redémptum.

Miserére fidélium, quos de hac vita ad te hódie vocásti,

eísque donum beatitúdinis ætérnæ concéde.

Vivífica, Dómine, pópulum a Christo redémptum.

FERIA SEXTA POST CINERES

Ad Laudes matutinas

LECTIO BREVIS

{r}Is 53, 11b-12{/r}

Iustificábit iustus servus meus multos et iniquitátes eórum ipse portábit. Ideo dispértiam ei multos, et cum fórtibus dívidet spólia, pro eo quod trádidit in mortem ánimam suam et cum scelerátis reputátus est; et ipse peccátum multórum tulit et pro transgressóribus rogat.

Ad Benedictus, ant. Cum víderis nudum, óperi eum, et carnem tuam ne despéxeris; tunc erúmpet quasi mane lumen tuum, et anteíbit fáciem tuam iustítia tua.

PRECES

Christum salvatórem, qui per mortem et resurrectiónem suam nos redémit, implorémus:

Dómine, miserére nostri.

Qui Ierúsalem ascendísti ad passiónem subeúndam, ut intráres in glóriam,

perduc Ecclésiam tuam in Pascha æternitátis.

Dómine, miserére nostri.

Qui, in cruce exaltátus, láncea mílitis transfígi voluísti,

sana vúlnera nostra.

Dómine, miserére nostri.

Qui crucem tuam árborem vitæ constituísti,

fructus eiúsdem baptísmate renátis largíre.

Dómine, miserére nostri.

Qui, in ligno pendens, latróni pæniténti pepercísti,

nobis peccatóribus ignósce.

Dómine, miserére nostri.

ORATIO

Inchoáta pæniténtiæ ópera, quǽsumus, Dómine, benígno favóre proséquere, ut observántiam, quam corporáliter exercémus, méntibus étiam valeámus implére sincéris.

Ad Vesperas

LECTIO BREVIS

{r}Iac 5, 16. 19-20{/r}

Confitémini altérutrum peccáta et oráte pro ínvicem, ut sanémini. Multum enim valet deprecátio iusti óperans. Fratres mei, si quis ex vobis erráverit a veritáte et convérterit quis eum, scire debet quóniam, qui convérti fécerit peccatórem ab erróre viæ eius, salvábit ánimam suam a morte et opériet multitúdinem peccatórum.

Ad Magnificat, ant. Cum auferétur ab eis sponsus, convívæ nuptiárum ieiunábunt in diébus illis.

PRECES

Salvatórem humáni géneris adorémus, qui mortem moriéndo destrúxit et vitam resurgéndo reparávit. Humíliter postulémus:

Sanctífica pópulum, quem sánguine tuo redemísti.

Redémptor noster, da nos passióni tuæ per pæniténtiam plénius adhærére,

ut resurrectiónis glóriam consequámur.

Sanctífica pópulum, quem sánguine tuo redemísti.

Præsta, ut Matris tuæ, solatrícis afflictórum, protectiónem assequámur,

mærentésque confortémus ea consolatióne, qua et ipsi a te recreámur.

Sanctífica pópulum, quem sánguine tuo redemísti.

Fidélibus concéde passiónis tuæ in ærúmnis suis esse partícipes,

ut salutáre tuum in seípsis maniféstent.

Sanctífica pópulum, quem sánguine tuo redemísti.

Qui humiliásti teípsum, factus obœ́diens usque ad mortem, mortem autem crucis,

da servis tuis obœdiéntiam et patiéntiam.

Sanctífica pópulum, quem sánguine tuo redemísti.

Córpori claritátis tuæ defúnctos configuráre dignéris,

nosque aliquándo eórum redde consórtes.

Sanctífica pópulum, quem sánguine tuo redemísti.

SABBATUM POST CINERES

Ad Laudes matutinas

LECTIO BREVIS

{r}Is 1, 16-18{/r}

Lavámini, mundi estóte, auférte malum cogitatiónum vestrárum ab óculis meis; quiéscite ágere pervérse, díscite benefácere: quǽrite iudícium, subveníte opprésso, iudicáte pupíllo, deféndite víduam. Et veníte et iudício contendámus, dicit Dóminus. Si fúerint peccáta vestra ut cóccinum, quasi nix dealbabúntur; et si fúerint rubra quasi vermículus, velut lana erunt.

Ad Benedictus, ant. Thesaurizáte vobis thesáuros in cælo, ubi nec ærúgo nec tínea demolítur.

PRECES

Semper et ubíque grátias Christo agámus, qui salvat nos, eíque fidénter supplicémus:

Súbveni nobis, Dómine, grátia tua.

Tríbue nos córpora nostra incontamináta serváre,

ut possit Spíritus Sanctus illic habitáre.

Súbveni nobis, Dómine, grátia tua.

Doce nos iam mane pro frátribus nosmetípsos impéndere,

et tota die in ómnibus tuam implére voluntátem.

Súbveni nobis, Dómine, grátia tua.

Da nobis quǽrere panem, qui permáneat in vitam ætérnam,

quem tu præstas nobis.

Súbveni nobis, Dómine, grátia tua.

Mater tua, refúgium peccatórum, pro nobis intercédat,

ut peccátis nostris benígnus ignóscas.

Súbveni nobis, Dómine, grátia tua.

ORATIO

Omnípotens sempitérne Deus, infirmitátem nostram propítius réspice, atque ad protegéndum nos déxteram tuæ maiestátis exténde.

DOMINICA I QUADRAGESIMÆ

Hebd. I Psalterii

Ad I Vesperas

Ant. 1In spíritu humilitátis et in ánimo contríto suscipiámur, Dómine, a te; et sic fiat sacrifícium nostrum, ut suscipiátur a te hódie et pláceat tibi, Dómine Deus.

Psalmi et canticum de dominica hebd. I.

Ant. 2Tunc invocábis, et Dóminus exáudiet; clamábis, et dicet: Ecce adsum.

Ant. 3Christus pro peccátis nostris mórtuus est, iustus pro iniústis, ut nos offérret Deo, mortificátus quidem carne, vivificátus autem Spíritu.

LECTIO BREVIS

{r}2 Cor 6, 1-4a{/r}

Exhortámur vos ne in vácuum grátiam Dei recipiátis — ait enim: «Témpore accépto exaudívi te et in die salútis adiúvi te». Ecce nunc tempus acceptábile, ecce nunc dies salútis —, némini dantes ullam offensiónem, ut non vituperétur ministérium, sed in ómnibus exhibéntes nosmetípsos sicut Dei minístros.

RESPONSORIUM BREVE

Atténde, Dómine, et miserére, {*} Quia peccávimus tibi.

Atténde, Dómine, et miserére, {*} Quia peccávimus tibi.

Exáudi, Christe, supplicántum preces. {*}

Quia peccávimus tibi.

Glória Patri, et Fílio, et Spirítui Sancto.

Atténde, Dómine, et miserére, {*} Quia peccávimus tibi.

Ad Magnificat, ant.

Anno ADuctus est Iesus in desértum a Spíritu, ut tentarétur a diábolo; et cum ieiunásset quadragínta diébus et quadragínta nóctibus, póstea esúriit.

Anno BIesus erat in desérto quadragínta diébus et tentabátur a Sátana; erátque cum béstiis, et ángeli ministrábant illi.

Anno CIesus plenus Spíritu Sancto regréssus est ab Iordáne et agebátur in Spíritu in desértum diébus quadragínta et tentabátur a diábolo.

PRECES

Christum Dóminum glorificémus, qui magíster, exémplar et frater factus est noster. Ei supplicémus, dicéntes:

Pópulum tuum vivífica, Dómine.

Christe, qui per ómnia nobis assimilátus es absque peccáto, da ut sciámus cum gaudéntibus gaudére et cum fléntibus flere,

ut cáritas nostra magis in dies abúndet.

Pópulum tuum vivífica, Dómine.

Concéde nobis tibi esuriénti ministráre in esuriéntibus,

et tibi sitiénti in sitiéntibus.

Pópulum tuum vivífica, Dómine.

Qui Lázarum a somno mortis excitásti,

fac ut, qui ex peccáto mórtui sunt, per fidem et pæniténtiam rédeant ad vitam.

Pópulum tuum vivífica, Dómine.

Fac ut multi vestígia tua impénsius atque perféctius sequántur,

exémplo beátæ Maríæ Vírginis atque sanctórum.

Pópulum tuum vivífica, Dómine.

Præsta, ut in glória tua defúncti resúrgant,

ac tuo in ætérnum fruántur amóre.

Pópulum tuum vivífica, Dómine.

ORATIO

Concéde nobis, omnípotens Deus, ut, per ánnua quadragesimális exercítia sacraménti, et ad intellegéndum Christi proficiámus arcánum, et efféctus eius digna conversatióne sectémur.

Ad Laudes matutinas

Ant. 1Benedícam te in vita mea, Dómine, et in nómine tuo levábo manus meas.

Psalmi et canticum de dominica hebd. I.

Ant. 2Hymnum dícite, et superexaltáte Deum in sǽcula.

Ant. 3Beneplácitum est Dómino in pópulo suo, et honorábit mansuétos in salútem.

LECTIO BREVIS

{r}Neh 8, 9b. 10b{/r}

Dies iste sanctificátus est Dómino Deo nostro! Nolíte lugére et nolíte flere. Quia sanctus dies Dómini nostri est; et nolíte contristári, gáudium étenim Dómini est fortitúdo vestra.

RESPONSORIUM BREVE

Christe, Fili Dei vivi, {*} Miserére nobis.

Christe, Fili Dei vivi, {*} Miserére nobis.

Qui attrítus es propter scélera nostra. {*}

Miserére nobis.

Glória Patri, et Fílio, et Spirítui Sancto.

Christe, Fili Dei vivi, {*} Miserére nobis.

Ad Benedictus, ant.

Anno ANon in solo pane vivit homo, sed in omni verbo quod procédit de ore Dei.

Anno BVenit Iesus in Galilǽam prǽdicans evangélium Dei et dicens: Implétum est tempus, et appropinquávit regnum Dei. Pænitémini et crédite evangélio.

Anno CNihil manducávit Iesus in diébus illis et, consummátis illis, esúriit.

PRECES

Redemptórem nostrum, qui hoc tempus salútis nobis benígne méruit, benedicámus, eúmque súpplices exorémus:

Spíritum novum crea in nobis, Dómine.

Christe, vita nostra, qui per baptísmum nos mýstice tecum sepelíri donásti ac per eúndem tecum resuscitári voluísti,

tríbue nos hódie in novitáte vitæ ambuláre.

Spíritum novum crea in nobis, Dómine.

Dómine, qui ómnibus benefecísti,

fac nos étiam de commúni ómnium bono esse sollícitos.

Spíritum novum crea in nobis, Dómine.

Tríbue nobis ad terrénam civitátem ædificándam concórditer operári,

et simul cæléstem inquírere.

Spíritum novum crea in nobis, Dómine.

Médice córporum et animárum, sana nostri vúlnera cordis,

ut contínua capiámus subsídia sanctitátis.

Spíritum novum crea in nobis, Dómine.

Oratio, ut ad I Vesperas.

Ad II Vesperas

Ant. 1Dóminum Deum tuum adorábis et illi soli sérvies.

Psalmi et canticum de dominica hebd. I.

Ant. 2Ecce nunc tempus acceptábile, ecce nunc dies salútis.

Ant. 3Ecce ascéndimus Ierosólymam, et consummabúntur ómnia quæ scripta sunt de Fílio hóminis.

LECTIO BREVIS

Cf. {r}1 Cor 9, 24-25{/r}

Hi, qui in stádio currunt, omnes quidem currunt, sed unus áccipit bravíum. Sic cúrrite, ut comprehendátis. Omnis autem, qui in agóne conténdit, ab ómnibus se ábstinet, et illi quidem, ut corruptíbilem corónam accípiant, nos autem incorrúptam.

RESPONSORIUM BREVE

Atténde, Dómine, et miserére, {*} Quia peccávimus tibi.

Atténde, Dómine, et miserére, {*} Quia peccávimus tibi.

Exáudi, Christe, supplicántum preces. {*}

Quia peccávimus tibi.

Glória Patri, et Fílio, et Spirítui Sancto.

Atténde, Dómine, et miserére, {*} Quia peccávimus tibi.

Ad Magnificat, ant.

Anno ADicit Iesus: Vade, Sátanas! Scriptum est enim: Dóminum Deum tuum adorábis et illi soli sérvies. Et ángeli accessérunt et ministrábant ei.

Anno BEvígila super nos, ætérne Salvátor, ne nos apprehéndat cállidus tentátor, quia tu nobis factus es sempitérnus adiútor.

Anno CConsummáta omni tentatióne, diábolus recéssit ab illo, usque ad tempus.

PRECES

Laus Deo Patri, qui pópulum electiónis e sémine incorruptíbili renásci vóluit per Verbum suum, quod manet in ætérnum. Ei pie supplicémus:

Propítius esto, Dómine, pópulo tuo.

Audi, miséricors Deus, supplicatiónes, quas pro cuncto pópulo tuo deférimus,

ut desíderet se tuo pótius verbo quam cibo satiáre corpóreo.

Propítius esto, Dómine, pópulo tuo.

Doce nos gentem nostram et cunctos hómines sine discrímine vere et efficáciter amáre,

eósque in pace et bono semper ædificáre.

Propítius esto, Dómine, pópulo tuo.

Réspice omnes per baptísmum regenerándos,

ut domum spiritálem, tamquam lápides vivi, tibi constítuant.

Propítius esto, Dómine, pópulo tuo.

Qui, per Ionam prædicántem, Ninivítas ad pæniténtiam excitásti,

verbo tuo peccatórum corda convérte propítius.

Propítius esto, Dómine, pópulo tuo.

Tríbue moriéntibus in spe Christo iúdici occúrrere,

tuíque aspéctu in ætérnum gaudére.

Propítius esto, Dómine, pópulo tuo.

FERIA SECUNDA

Ad Laudes matutinas

LECTIO BREVIS

{r}Ex 19, 4-6a{/r}

Vos ipsi vidístis quómodo portáverim vos super alas aquilárum et addúxerim ad me. Si ergo audiéritis vocem meam et custodiéritis pactum meum, éritis mihi in pecúlium de cunctis pópulis, mea est enim omnis terra. Et vos éritis mihi regnum sacerdótum et gens sancta.

Ad Benedictus, ant. Veníte, benedícti Patris mei, percípite regnum, quod vobis parátum est ab orígine mundi.

PRECES

Benedíctus Iesus, salvátor noster, qui per mortem suam salútis nobis sémitam reserávit. Orémus:

Dírige, Dómine, pópulum tuum in viam rectam.

Miséricors Deus, qui per baptísmum novitátem vitæ nobis dedísti,

fac ut magis in dies tuæ conformémur imágini.

Dírige, Dómine, pópulum tuum in viam rectam.

Præsta, ut indigéntes benevoléntia nostra hódie lætificémus,

eísque subveniéntes teípsum inveniámus.

Dírige, Dómine, pópulum tuum in viam rectam.

Tríbue nobis bonum, rectum et verum coram te operári,

teque semper toto corde requírere.

Dírige, Dómine, pópulum tuum in viam rectam.

Quæ contra unitátem famíliæ tuæ commísimus, benígnus indúlge,

atque cor unum et ánimam unam nos esse concéde.

Dírige, Dómine, pópulum tuum in viam rectam.

ORATIO

Convérte nos, Deus, salutáris noster, et, ut nobis opus quadragesimále profíciat, mentes nostras cæléstibus ínstrue disciplínis.

Ad Vesperas

LECTIO BREVIS

{r}Rom 12, 1-2{/r}

Obsecro vos, fratres, per misericórdiam Dei, ut exhibeátis córpora vestra hóstiam vivéntem, sanctam, Deo placéntem, rationábile obséquium vestrum; et nolíte conformári huic sæculo, sed transformámini renovatióne mentis, ut probétis quid sit volúntas Dei, quid bonum et bene placens et perféctum.

Ad Magnificat, ant. Quod uni ex mínimis meis fecístis, mihi fecístis, dicit Dóminus.

PRECES

Dóminum Iesum Christum, qui nos pópulum suum a peccátis salvos fecit, humíliter invocémus:

Iesu, Fili David, miserére nostri.

Orámus te, Christe, pro sancta Ecclésia tua, pro qua teípsum tradidísti ut eam sanctificáres, mundans lavácro aquæ in verbo vitæ;

continénter rénova eam et purífica pæniténtia.

Iesu, Fili David, miserére nostri.

Magíster bone, notam fac iuvénibus viam, quam unicuíque eórum mandásti,

ut ámbulent in ea et bene sit eis.

Iesu, Fili David, miserére nostri.

Qui misértus es ómnium languórum, érige spem ægrotántium et sana eos,

nosque fac de iis sublevándis sollícitos.

Iesu, Fili David, miserére nostri.

Redde nos mémores dignitátis, quam per baptísmum nobis dedísti,

ut tibi semper vivámus.

Iesu, Fili David, miserére nostri.

Pacem et glóriam largíre defúnctis,

nobísque cum illis aliquándo tecum regnáre concéde.

Iesu, Fili David, miserére nostri.

FERIA TERTIA

Ad Laudes matutinas

LECTIO BREVIS

{r}Ioel 2, 12-13{/r}

Convertímini ad me in toto corde vestro, in ieiúnio et in fletu et in planctu; et scíndite corda vestra et non vestiménta vestra, et convertímini ad Dóminum Deum vestrum, quia benígnus et miséricors est, pátiens et multæ misericórdiæ, et placábilis super malítia.

Ad Benedictus, ant. Dómine, doce nos oráre, sicut dócuit Ioánnes discípulos suos.

PRECES

Benedicámus Christo, qui se nobis dedit ut panem de cælo descendéntem, atque ad eum oratiónem nostram dirigámus:

Christe, panis et medéla animárum, róbora nos.

Dómine, fac ut, eucharístico satiáti convívio,

dona sacrifícii paschális plene participémus.

Christe, panis et medéla animárum, róbora nos.

Tríbue nobis verbum tuum in corde bono et óptimo retinére,

ut fructum afferámus in patiéntia.

Christe, panis et medéla animárum, róbora nos.

Fac ut in perficiéndo órdine mundi tibi álacres cooperémur,

ut per Ecclésiam tuam præcónium pacis facílius diffundátur.

Christe, panis et medéla animárum, róbora nos.

Peccávimus, Dómine, peccávimus,

dele iniquitátes nostras grátia tua salutári.

Christe, panis et medéla animárum, róbora nos.

ORATIO

Réspice, Dómine, famíliam tuam, et præsta, ut apud te mens nostra tuo desidério fúlgeat, quæ se corporálium moderatióne castígat.

Ad Vesperas

LECTIO BREVIS

{r}Iac 2, 14. 17. 18b{/r}

Quid próderit, fratres mei, si fidem quis dicat se habére, ópera autem non hábeat? Numquid póterit fides salváre eum? Fides, si non hábeat ópera, mórtua est in semetípsa. Osténde mihi fidem tuam sine opéribus, et ego tibi osténdam ex opéribus meis fidem.

Ad Magnificat, ant. Tu autem, cum oráveris, intra in cubículum tuum, et, clauso óstio, ora Patrem tuum.

PRECES

Christum Dóminum, a quo iubémur ut vigilántiam et oratiónem advérsus tentatiónes adhibeámus, eníxe deprecémur:

Atténde, Dómine, et miserére.

Christe Iesu, qui congregátis ad orándum in nómine tuo te affutúrum promisísti,

nos tecum Patrem in Spíritu Sancto semper oráre concéde.

Atténde, Dómine, et miserére.

Cæléstis Sponse, máculas ab Ecclésia tua dilécta exclúde,

eámque ambuláre concéde in spe et virtúte Spíritus Sancti.

Atténde, Dómine, et miserére.

Hóminis amátor, redde nos sollícitos de próximo nostro, sicut unicuíque mandásti,

ut salutáre lumen tuum vivídius ómnibus effúlgeat.

Atténde, Dómine, et miserére.

Rex pacífice, da pacem tuam in mundo vigére,

ut præséntia tua salutáris ubíque magis percipiátur.

Atténde, Dómine, et miserére.

Omnibus defúnctis beátæ æternitátis intróitum résera,

eísque incorruptiónis áperi limen et glóriæ.

Atténde, Dómine, et miserére.

FERIA QUARTA

Ad Laudes matutinas

Ad Benedictus, ant. Generátio hæc prava et pervérsa signum quærit, et signum non dábitur ei, nisi signum Ionæ prophétæ.

PRECES

Benedicátur Auctor salútis nostræ, qui vult hómines fíeri in se novam creatúram, ut vétera tránseant et ómnia renovéntur. Quaprópter viva spe fulti eum rogémus:

Rénova nos, Dómine, in Spíritu tuo.

Dómine, qui cælum novum terrámque novam promisísti, semper nos rénova per Spíritum tuum,

ut in cælésti Ierúsalem te iúgiter perfruámur.

Rénova nos, Dómine, in Spíritu tuo.

Da nos tecum operári ut hunc mundum Spíritu tuo imbuámus,

atque in iustítia, caritáte et pace cívitas terréna finem suum efficácius assequátur.

Rénova nos, Dómine, in Spíritu tuo.

Tríbue nos omnes desídias et neglegéntias castigáre,

et supérnis delectári munéribus.

Rénova nos, Dómine, in Spíritu tuo.

Líbera nos a malo,

nosque a fascinatióne nugacitátis, quæ bona obscúrat, defénde.

Rénova nos, Dómine, in Spíritu tuo.

ORATIO

Devotiónem pópuli tui, quæsumus, Dómine, benígnus inténde, ut, qui per abstinéntiam temperántur in córpore, per fructum boni óperis reficiántur in mente.

Ad Vesperas

Ad Magnificat, ant. Sicut fuit Ionas in ventre ceti tribus diébus et tribus nóctibus, ita erit Fílius hóminis in corde terræ.

PRECES

Deum omnipoténtem et providéntem exaltémus. Ipse scit ómnia, quibus índiget pópulus suus, sed vult nos primum de regno suo sollícitos. Ideo acclamémus:

Advéniat regnum tuum et iustítia eius.

Pater sancte, qui Christum ut pastórem animárum nostrárum dedísti, adésto pastóribus et pópulis eórum diligéntiæ créditis, ne gregi desit cura pastóris,

neque pastóribus obœdiéntia gregis.

Advéniat regnum tuum et iustítia eius.

Induc christiános, ut fratérna pietáte infírmis auxiliéntur,

et ipsi Fílio tuo in iis subvéniant.

Advéniat regnum tuum et iustítia eius.

Fac ut nondum Evangélio credéntes Ecclésiam tuam ingrediántur,

eámque bonis opéribus semper ædíficent in caritáte.

Advéniat regnum tuum et iustítia eius.

Da nobis peccatóribus véniam a te impetráre,

et simul reconciliári cum Ecclésia tua.

Advéniat regnum tuum et iustítia eius.

Præsta, ut defúncti ad vitam tránseant ætérnam,

et semper tecum commoréntur.

Advéniat regnum tuum et iustítia eius.

FERIA QUINTA

Ad Laudes matutinas

Ad Benedictus, ant. Si vos, cum sitis mali, nostis bona data dare fíliis vestris, quanto magis Pater vester de cælo dabit bona peténtibus se!

PRECES

Christum Dóminum nostrum laudántes, qui ut lux mundi appáruit, ne ambularémus in ténebris sed lumen vitæ haberémus, ei supplicémus:

Verbum tuum sit lucérna pédibus nostris.

Benigníssime Deus, concéde nobis hódie in tui imitatióne profícere,

ut, quod in primo cécidit Adam, dénuo in te erigátur.

Verbum tuum sit lucérna pédibus nostris.

Præbe verbum tuum lucérnam pédibus nostris,

ut, veritátem faciéntes, caritáte in te crescámus per ómnia.

Verbum tuum sit lucérna pédibus nostris.

Doce nos ad ómnium bonum propter nomen tuum fidéliter ágere,

ut humána família magis per Ecclésiam illuminétur.

Verbum tuum sit lucérna pédibus nostris.

Fac nos per sincéram conversiónem amicítiam tuam magis magísque fovére,

et offénsas sapiéntiæ atque bonitáti tuæ illátas expiáre.

Verbum tuum sit lucérna pédibus nostris.

ORATIO

Largíre nobis, quǽsumus, Dómine, semper spíritum cogitándi quæ recta sunt, prómptius et agéndi, ut, qui sine te esse non póssumus, secúndum te vívere valeámus.

Ad Vesperas

Ad Magnificat, ant. Pétite, et dábitur vobis; quǽrite, et inveniétis; pulsáte, et aperiétur vobis.

PRECES

A Christo Dómino, qui nobis dedit mandátum novum mútuæ dilectiónis, flagitémus:

Caritátem plebis tuæ, Dómine, adáuge.

Magíster bone, doce nos in frátribus temetípsum dilígere,

atque in iis benefácere tibi.

Caritátem plebis tuæ, Dómine, adáuge.

Qui in cruce pro carnifícibus tuis véniam a Patre impetrásti,

da nobis inimícos dilígere et pro persequéntibus nos oráre.

Caritátem plebis tuæ, Dómine, adáuge.

Per mystérium córporis et sánguinis tui, amórem, virtútem et fidúciam nostram adáuge;

débiles corróbora, mæstos consoláre, spem agonizántibus infúnde.

Caritátem plebis tuæ, Dómine, adáuge.

Lux mundi, qui cæco nato post ablutiónem lumen vidére tribuísti,

catechúmenos per lavácrum aquæ et verbo vitæ illúmina.

Caritátem plebis tuæ, Dómine, adáuge.

Defúnctos sátia dilectióne tua ætérna,

nosque inter eléctos tuos connúmera.

Caritátem plebis tuæ, Dómine, adáuge.

FERIA SEXTA

Ad Laudes matutinas

Ad Benedictus, ant. Nisi abundáverit iustítia vestra plus quam scribárum et pharisæórum, non intrábitis in regnum cælórum.

PRECES

Grátias agámus Christo Dómino, qui in cruce móriens nobis vitam cóntulit, eúmque ex corde deprecémur:

Per mortem tuam vivífica nos.

Magíster et Salvátor noster, qui fídei tuæ documénta nobis contulísti, nosque innovásti glória passiónis,

fac ne veterascámus in áctibus pravitátis.

Per mortem tuam vivífica nos.

Præsta nobis, ut hódie cibórum saturitátem córpori nostro subtráhere sciámus,

ut frátribus nostris indigéntibus succurrámus.

Per mortem tuam vivífica nos.

Da hunc sanctum quadragesimálem diem a te nos devóte suscípere,

et per ópera misericórdiæ tibi consecráre.

Per mortem tuam vivífica nos.

Córrige mentes nostras rebélles,

nosque magnánimos éffice.

Per mortem tuam vivífica nos.

ORATIO

Da, quǽsumus, Dómine, fidélibus tuis observatióni pascháli conveniénter aptári, ut suscépta sollémniter castigátio corporális cunctis ad fructum profíciat animárum.

Ad Vesperas

Ad Magnificat, ant. Si offers munus tuum ante altáre et recordátus fúeris quia frater tuus habet áliquid advérsum te, relínque ibi munus tuum ante altáre, et vade prius reconciliári fratri tuo, et tunc véniens ófferes munus tuum.

PRECES

Dóminum Iesum, qui per próprium sánguinem pópulum sanctificávit, deprecémur:

Miserére, Dómine, pópulo tuo.

Redémptor noster, per passiónem tuam tríbue fidélibus membra sua mortificáre, in certamínibus contra mala et advérsa sústine eos, spe róbora firmióre,

quo expeditióres ad resurrectiónem tuam celebrándam occúrrant.

Miserére, Dómine, pópulo tuo.

Fac ut christiáni, ob prophéticum munus, notítiam tui ubíque diffúndant,

atque ardéntis fídei, spei et caritátis testimónio eam confírment.

Miserére, Dómine, pópulo tuo.

Confórta virtúte tua omnes afflíctos,

eísque consolándis fratérnas fac nos curas impéndere.

Miserére, Dómine, pópulo tuo.

Doce fidéles passiónem tuam in ærúmnis suis participáre,

ut salutáre tuum in seípsis maniféstent.

Miserére, Dómine, pópulo tuo.

Auctor vitæ, meménto eórum, qui de hac vita transiérunt,

eísque resurrectiónis glóriam largíre.

Miserére, Dómine, pópulo tuo.

SABBATO

Ad Laudes matutinas

Ad Benedictus, ant. Oráte pro persequéntibus et calumniántibus vos, ut sitis fílii Patris vestri, qui in cælis est, dicit Dóminus.

PRECES

Christum Dóminum glorificémus, qui, ut nova creatúra hómines fíerent, lavácrum regeneratiónis instítuit eísque córporis et verbi sui mensam appósuit. Eum deprecémur, dicéntes:

Rénova nos, Dómine, grátia tua.

Iesu, mitis et húmilis corde, índue nos víscera misericórdiæ, benignitátem et humilitátem concéde,

ac patiéntiam cum ómnibus fac nos sectári.

Rénova nos, Dómine, grátia tua.

Doce nos vere próximos esse míseris atque afflíctis,

ut te bonum Samaritánum imitémur.

Rénova nos, Dómine, grátia tua.

Beáta Virgo, mater tua, intercédat pro sacris virgínibus,

ut consecratiónem, qua tibi sunt devótæ, in Ecclésia impénsius colant.

Rénova nos, Dómine, grátia tua.

Donum tuæ misericórdiæ nobis largíre,

ac peccáta et pœnas nobis dimítte.

Rénova nos, Dómine, grátia tua.

ORATIO

Ad te corda nostra, Pater ætérne, convérte, ut nos, unum necessárium semper quæréntes et ópera caritátis exercéntes, tuo cúltui præstes esse dicátos.

DOMINICA II QUADRAGESIMÆ

Hebd. II Psalterii

Ad I Vesperas

Ant. 1Assúmpsit Iesus Petrum et Iacóbum et Ioánnem fratrem eius, et duxit eos in montem excélsum seórsum, et transfigurátus est ante eos.

Psalmi et canticum de dominica hebd. II.

Ant. 2Resplénduit fácies eius sicut sol, vestiménta autem eius facta sunt alba sicut nix.

Ant. 3Móyses et Elías dicébant excéssum eius, quem completúrus erat in Ierúsalem.

Ad Magnificat, ant.

Anno ADixit Petrus ad Iesum: Dómine, bonum est nos hic esse. Si vis, fáciam hic tria tabernácula: tibi unum et Móysi unum et Elíæ unum.

Anno BTransfigurátus est Iesus coram ipsis; et vestiménta eius facta sunt splendéntia, cándida nimis. Et appáruit illis Elías cum Móyse, et erant loquéntes cum Iesu.

Anno CFacta est, dum oráret Iesus, spécies vultus eius áltera et vestítus eius albus refúlgens. Et ecce duo viri loquebántur cum illo, et erant Móyses et Elías.

PRECES

Magnificémus Deum, cui cura est de ómnibus. Eum invocémus, dicéntes:

Da, Dómine, salútem redémptis.

Deus, dator múnerum et fons veritátis, reple donis tuis collégium episcopórum,

et fidéles, iis concréditos, serva in Apostolórum doctrína.

Da, Dómine, salútem redémptis.

Caritátem tuam infúnde ómnibus, qui de uno pane vitæ commúnicant,

quo arctióre unitáte fruántur in córpore Fílii tui.

Da, Dómine, salútem redémptis.

Véterem hóminem cum áctibus suis nos exspoliáre concéde,

et Christum Fílium tuum novum indúere hóminem.

Da, Dómine, salútem redémptis.

Concéde, ut omnes per pæniténtiam peccatórum suórum véniam obtíneant,

et supérnæ fiant Christi tui satisfactiónis partícipes.

Da, Dómine, salútem redémptis.

Fac ut in pace tua defúncti te sine fine laudent in cælo,

ubi et nos te in ævum celebratúros sperámus.

Da, Dómine, salútem redémptis.

ORATIO

Deus, qui nobis diléctum Fílium tuum audíre præcepísti, verbo tuo intérius nos páscere dignéris, ut, spiritáli purificáto intúitu, glóriæ tuæ lætémur aspéctu.

Ad Laudes matutinas

Ant. 1Déxtera Dómini fecit virtútem, déxtera Dómini exaltávit me.

Psalmi et canticum de dominica hebd. II.

Ant. 2Trium puerórum cantémus hymnum, quem cantábant in camíno ignis, benedicéntes Dóminum.

Ant. 3Laudáte Dóminum in firmaménto virtútis eius.

Ad Benedictus, ant.

Anno AEcce vox de nube dicens: Hic est Fílius meus diléctus, in quo mihi bene complácui: ipsum audíte.

Anno BPetrus dixit Iesu: Rabbi, bonum est nos hic esse; et faciámus tria tabernácula: tibi unum, et Móysi unum et Elíæ unum.

Anno CDóminus noster Iesus Christus destrúxit mortem et illuminávit vitam et incorruptiónem per Evangélium.

PRECES

Deum glorificémus, cuius bonitátis infinítus est thesáurus, et per Iesum Christum, qui est semper vivens ad interpellándum pro nobis, eum deprecémur, dicéntes:

Accénde in nobis ignem tui amóris.

Deus misericórdiæ, fac ut hódie abundémus in opéribus pietátis,

atque omnes nostram experiántur humanitátem.

Accénde in nobis ignem tui amóris.

Qui in dilúvio Noe per arcam salvásti,

salva catechúmenos in aqua baptísmatis.

Accénde in nobis ignem tui amóris.

Præsta nos non solo pane satiári,

sed omni verbo, quod procédit de ore tuo.

Accénde in nobis ignem tui amóris.

Fac ut omnes dissensiónes componámus,

ut pace et caritáte, te donánte, gaudeámus.

Accénde in nobis ignem tui amóris.

Ad II Vesperas

Ant. 1Virgam virtútis tuæ emíttet Dóminus in splendóribus sanctórum.

Psalmi et canticum de dominica hebd. II.

Ant. 2Deus unus est, quem cólimus, qui fecit cælum et terram.

Ant. 3Próprio Fílio suo non pepércit Deus, sed pro nobis ómnibus trádidit illum.

Ad Magnificat, ant.

V_roku A Visiónem, quam vidístis, némini dixéritis, donec a mórtuis resúrgat Fílius hóminis.

Anno BFacta est nubes obúmbrans eos, et venit vox de nube: Hic est Fílius meus diléctus: audíte illum.

Anno CVox facta est de nube dicens: Hic est Fílius meus diléctus; ipsum audíte. Et dum fíeret vox, invéntus est Iesus solus.

PRECES

Grátias Christo, cápiti et magístro nostro, semper agámus, qui venit ministráre et ómnibus benefácere. Ideo humíliter fidentérque ab eo petámus:

Vísita, Dómine, famíliam tuam.

Adésto, Dómine, epíscopis et presbýteris Ecclésiæ tuæ, qui munus tuum cápitis et pastóris partícipant,

ut per te ad Patrem omnes addúcant.

Vísita, Dómine, famíliam tuam.

Angelus tuus iter agéntes comitétur,

ut omnes ánimæ corporísque insídias devítent.

Vísita, Dómine, famíliam tuam.

Doce nos homínibus ministráre,

ut te imitémur, qui venísti ministráre, non ministrári.

Vísita, Dómine, famíliam tuam.

Fac ut in omni humána communitáte frater adiuvétur a fratre,

ut sint, te astánte, quasi cívitas firma.

Vísita, Dómine, famíliam tuam.

Miséricors esto univérsis defúnctis,

eósque in lumen vultus tui admítte.

Vísita, Dómine, famíliam tuam.

FERIA SECUNDA

Ad Laudes matutinas

Ad Benedictus, ant. Estóte misericórdes, sicut et Pater vester miséricors est, dicit Dóminus.

PRECES

Benedicámus Deo Patri, qui nobis largítur ut hoc quadragesimáli die sacrifícium laudis ei offerámus. Eum deprecémur, invocántes:

Cæléstibus, Dómine, nos ínstrue disciplínis.

Omnípotens et miséricors Deus, concéde nobis spíritum oratiónis et pæniténtiæ,

ut caritáte tui et hóminum ardeámus.

Cæléstibus, Dómine, nos ínstrue disciplínis.

Da nos tibi cooperári, ut ómnia instauréntur in Christo,

atque iustítia et pax in terris abúndent.

Cæléstibus, Dómine, nos ínstrue disciplínis.

Intimam totíus creatúræ natúram et prétium áperi nobis,

ut, te celebrántes, eam in cármine laudis nobis consociémus.

Cæléstibus, Dómine, nos ínstrue disciplínis.

Ignósce nobis, qui Christi tui præséntiam in paupéribus, míseris et moléstis ignorávimus,

nec vériti sumus Fílium tuum in his frátribus nostris.

Cæléstibus, Dómine, nos ínstrue disciplínis.

ORATIO

Deus, qui ob animárum medélam castigáre córpora præcepísti, concéde, ut ab ómnibus possímus abstinére peccátis, et corda nostra pietátis tuæ váleant exercére mandáta.

Ad Vesperas

Ad Magnificat, ant. Nolíte iudicáre, et non iudicabímini; in quo enim iudício iudicavéritis, iudicabímini, dicit Dóminus.

PRECES

Magnificétur Deus Pater, qui, ex ore Fílii sui, simul orántibus quodcúmque petíssent se datúrum promísit. Qua promissióne freti eum implorémus:

Propítius esto, Dómine, pópulo tuo.

Dómine, qui legem, in monte Sínai Móysi datam, per Christum tuum perfecísti,

da ut omnes eam in córdibus inscríptam agnóscant et fœ́deris instar custódiant.

Propítius esto, Dómine, pópulo tuo.

Sollicitúdinem de frátribus sibi commíssis, præpósitis tríbue,

et subditórum corda ad illos induc adiuvándos.

Propítius esto, Dómine, pópulo tuo.

Mentem et cor missionariórum tua virtúte corróbora,

et plúrimos óperis sócios ubíque éxcita illis.

Propítius esto, Dómine, pópulo tuo.

Grátiam tuam in púeris da cum annis aduléscere,

et in iuvénibus amórem tuum cum probitáte morum profícere.

Propítius esto, Dómine, pópulo tuo.

Meménto ómnium fratrum nostrórum, qui in te obdormiérunt,

atque ætérnæ vitæ eos redde consórtes.

Propítius esto, Dómine, pópulo tuo.

FERIA TERTIA

Ad Laudes matutinas

Ad Benedictus, ant. Unus est magíster vester, qui in cælis est, Christus Dóminus.

PRECES

Grátias Deo Patri, qui Unigénitum suum, Verbum carnem factum, nobis dedit, ut sit noster cibus et vita. Eum deprecémur:

Verbum Christi hábitet abundánter in nobis.

Frequentióre verbi tui auditióne nos dúcere tempus hoc quadragesimále concéde,

ut Christum, Pascha nostrum, in magna sollemnitáte religiósius honorémus.

Verbum Christi hábitet abundánter in nobis.

Spíritus Sanctus tuus nos dóceat,

ut ad verum et bonum sequéndum dúbios et errántes hortémur.

Verbum Christi hábitet abundánter in nobis.

Præsta nobis, ut Christi tui áltius percipiámus mystérium,

et vita nostra id clárius exprimámus.

Verbum Christi hábitet abundánter in nobis.

Purífica et rénova Ecclésiam tuam his diébus salútis,

ut magis ac magis testimónium tibi éadem reddat.

Verbum Christi hábitet abundánter in nobis.

ORATIO

Custódi, Dómine, quǽsumus, Ecclésiam tuam propitiatióne perpétua, et quia sine te lábitur humána mortálitas, tuis semper auxíliis et abstrahátur a nóxiis, et ad salutária dirigátur.

Ad Vesperas

Ad Magnificat, ant. Omnes vos fratres estis; et patrem nolíte vocáre vobis super terram; unus est enim Pater vester, qui in cælis est; nec vocémini magístri, quia magíster vester unus est Christus.

PRECES

Dóminum Iesum, qui exaltátus in cruce ómnia ad se traxit, magnificémus et mente pia exorémus:

Trahe ad te univérsa, Dómine.

Dómine, lux, quæ e mystério crucis tuæ emánat, áttrahat omnes,

ut te viam, veritátem et vitam agnóscant.

Trahe ad te univérsa, Dómine.

Da cunctis te sitiéntibus aquam vivam,

ne sítiant in ætérnum.

Trahe ad te univérsa, Dómine.

Doctrinárum et ártium cultóres illúmina,

ut hómines regno tuo effíciant aptióres.

Trahe ad te univérsa, Dómine.

Move omnes, qui ob peccáta et scándala a te discessérunt,

ut rédeant ad te et in dilectióne tua permáneant.

Trahe ad te univérsa, Dómine.

Omnes defúnctos nostros in cæléstes sedes admítte,

ut cum beáta María Vírgine sanctísque ómnibus collæténtur.

Trahe ad te univérsa, Dómine.

FERIA QUARTA

Ad Laudes matutinas

Ad Benedictus, ant. Fílius hóminis non venit ministrári, sed ministráre et dare ánimam suam redemptiónem pro multis.

PRECES

Grátias agámus Deo Patri, qui per infusiónem et operatiónem Spíritus Sancti corda nostra puríficat et in caritáte confírmat. Ei súpplici prece dicámus:

Da nobis, Dómine, Spíritum Sanctum tuum.

Præsta nobis, ut bona de manu tua semper grati suscipiámus,

et mala quoque cum patiéntia accipiámus.

Da nobis, Dómine, Spíritum Sanctum tuum.

Concéde nobis non in magnis tantum rebus caritátem sectári,

sed étiam in sólitis vitæ adiúnctis prótenus exercére.

Da nobis, Dómine, Spíritum Sanctum tuum.

Tríbue nobis a supérfluis abstinére,

ut frátribus indigéntibus opem ferre valeámus.

Da nobis, Dómine, Spíritum Sanctum tuum.

Da nobis mortificatiónem Fílii tui in córpore nostro circumférre,

qui nos vivificásti in córpore eius.

Da nobis, Dómine, Spíritum Sanctum tuum.

ORATIO

Consérva, Dómine, famíliam tuam, bonis semper opéribus erudítam, et sic præséntibus consoláre præsídiis, ut propítius ad supérna dona perdúcas.

Ad Vesperas

Ad Magnificat, ant. Fílius hóminis tradétur géntibus ad illudéndum et flagellándum et crucifigéndum, et tértia die resúrget.

FERIA QUINTA

Ad Laudes matutinas

Ad Benedictus, ant. Fili, recordáre quia recepísti bona in vita tua, et Lázarus simíliter mala.

ORATIO

Deus, innocéntiæ restitútor et amátor, dírige ad te tuórum corda servórum, ut, Spíritus tui fervóre concépto, et in fide inveniántur stábiles et in ópere efficáces.

Ad Vesperas

Ad Magnificat, ant. Dives ille guttam aquæ pétiit, qui micas panis Lázaro negávit.

FERIA SEXTA

Ad Laudes matutinas

Ad Benedictus, ant. Malos male perdet, et víneam suam locábit áliis agrícolis, qui reddant ei fructum tempóribus suis.

ORATIO

Da, quǽsumus, omnípotens Deus, ut, sacro nos purificánte pæniténtiæ stúdio, sincéris méntibus ad sancta ventúra fácias perveníre.

Ad Vesperas

Ad Magnificat, ant. Quæréntes Iesum tenére, timuérunt turbam, quia sicut prophétam eum habébant.

SABBATO

Ad Laudes matutinas

Ad Benedictus, ant. Pater, peccávi in cælum et coram te, iam non sum dignus vocári fílius tuus, fac me sicut unum ex mercenáriis tuis.

ORATIO

Deus, qui nos gloriósis remédiis in terris adhuc pósitos iam cæléstium rerum facis esse consórtes, tu, quǽsumus, in ista qua vívimus nos vita gubérna ut ad illam, in qua ipse es, lucem perdúcas.

DOMINICA III QUADRAGESIMÆ

Hebd. III Psalterii

Ad I Vesperas

Ant. 1 Pænitémini et crédite Evangélio, dicit Dóminus.

Psalmi et canticum de dominica hebd. III.

Ant. 2Sacrificábo hóstiam laudis, et nomen Dómini invocábo.

Ant. 3Nemo tollit a me ánimam meam, sed ego pono eam et íterum sumo eam.

Ad Magnificat, ant.

Anno ADicit Dóminus: Si quis bíberit aquam, quam ego dabo ei, non sítiet in ætérnum.

Anno BDixit Iesus: Auférte ista hinc: Nolíte fácere domum Patris mei domum negotiatiónis.

Anno CDico vobis: Nisi pæniténtiam egéritis, omnes simíliter períbitis.

ORATIO

Deus, ómnium misericordiárum et totíus bonitátis auctor, qui peccatórum remédia in ieiúniis, oratiónibus et eleemósynis demonstrásti, hanc humilitátis nostræ confessiónem propítius intuére, ut, qui inclinámur consciéntia nostra, tua semper misericórdia sublevémur.

Ad Laudes matutinas

Ant. 1Super voces aquárum multárum, testimónia tua, Dómine, credibília facta sunt nimis.

Psalmi et canticum de dominica hebd. III.

Ant. 2Benedícite, fontes, Dómino; laudáte et superexaltáte eum in sǽcula.

Ant. 3Reges terræ et omnes pópuli, laudáte Deum.

Ad Benedictus, ant.

Anno AVenit hora et nunc est, quando veri adoratóres adorábunt Patrem in Spíritu et veritáte: nam et Pater tales quærit, qui adórent eum.

Anno BSólvite templum hoc, dicit Dóminus, et post tríduum reædificábo illud. Hoc autem dicébat de templo córporis sui.

Anno CIustificáti ex fide, pacem habeámus ad Deum, per Dóminum nostrum Iesum Christum.

Ad II Vesperas

Ant. 1Dómine, rex omnípotens, líbera nos propter nomen tuum, et da nobis locum pæniténtiæ.

Psalmi et canticum de dominica hebd. III.

Ant. 2Redémpti sumus pretióso sánguine agni immaculáti Christi.

Ant. 3Vere languóres nostros ipse tulit, et dolóres nostros ipse portávit.

Ad Magnificat, ant.

Anno AMulto plures credidérunt et mulíeri dicébant: Iam non propter tuam loquélam crédimus; ipsi enim audívimus et scimus quia hic est vere Salvátor mundi!

Anno BCum esset Iesus Hierosólymis in Pascha, in die festo, multi credidérunt in nómine Iesu, vidéntes signa eius, quæ faciébat.

Anno CDómine, dimítte illam et hoc anno, usque dum fódiam circa illam, et síquidem fécerit fructum in futúrum.

FERIA SECUNDA

Ad Laudes matutinas

Ad Benedictus, ant. Amen dico vobis, quia nemo prophéta accéptus est in pátria sua.

ORATIO

Ecclésiam tuam, Dómine, miserátio continuáta mundet et múniat, et, quia sine te non potest salva consístere, tuo semper múnere gubernétur.

Ad Vesperas

Ad Magnificat, ant. Iesus, tránsiens per médium illórum, ibat.

FERIA TERTIA

Ad Laudes matutinas

Ad Benedictus, ant. Non dico tibi, Petre, ut dimíttas sépties, sed usque septuágies sépties, dicit Dóminus.

ORATIO

Grátia tua ne nos, quǽsumus, Dómine, derelínquat, quæ et sacræ nos déditos fáciat servitúti, et tuam nobis opem semper acquírat.

Ad Vesperas

Ad Magnificat, ant. Sic et Pater meus cæléstis fáciet vobis, si non remiséritis unusquísque fratri suo de córdibus vestris.

FERIA QUARTA

Ad Laudes matutinas

Ad Benedictus, ant. Nolíte putáre quóniam veni sólvere legem aut prophétas; non veni sólvere, sed adimplére, dicit Dóminus.

ORATIO

Præsta, quǽsumus, Dómine, ut, per quadragesimálem observántiam erudíti et tuo verbo nutríti, sancta continéntia tibi simus toto corde devóti, et in oratióne tua semper efficiámur concórdes.

Ad Vesperas

Ad Magnificat, ant. Qui fécerit et docúerit mandáta Dómini, hic magnus vocábitur in regno cælórum.

FERIA QUINTA

Ad Laudes matutinas

Ad Benedictus, ant. Si in dígito Dei eício dæmónia, profécto pervénit in vos regnum Dei, dicit Dóminus.

ORATIO

Maiestátem tuam, Dómine, supplíciter implorámus, ut, quanto magis dies salutíferæ festivitátis accédit, tanto devótius ad eius celebrándum proficiámus paschále mystérium.

Ad Vesperas

Ad Magnificat, ant. Extóllens vocem quædam múlier de turba, dixit: Beátus venter qui te portávit et úbera quæ suxísti. At Iesus ait illi: Quinímmo beáti, qui áudiunt verbum Dei et custódiunt illud.

FERIA SEXTA

Ad Laudes matutinas

Ad Benedictus, ant. Magíster, quod est mandátum magnum in lege? Ait illi Iesus: Díliges Dóminum Deum tuum ex toto corde tuo.

ORATIO

Córdibus nostris, quǽsumus, Dómine, grátiam tuam benígnus infúnde, ut ab humánis semper retrahámur excéssibus, et mónitis inhærére valeámus, te largiénte, cæléstibus.

Ad Vesperas

Ad Magnificat, ant. Dilígere próximum suum tamquam seípsum, magis est ómnibus sacrifíciis.

SABBATO

Ad Laudes matutinas

Ad Benedictus, ant. Stans a longe publicánus, nolébat óculos ad cælum leváre, sed percutiébat pectus suum dicens: Deus, propítius esto mihi peccatóri.

ORATIO

Observatiónis huius ánnua celebritáte lætántes, quǽsumus, Dómine, ut, paschálibus sacraméntis inhæréntes, plenis eórum efféctibus gaudeámus.

DOMINICA IV QUADRAGESIMÆ

Hebd. IV Psalterii

Ad I Vesperas

Ant. 1In domum Dómini lætántes íbimus.

Psalmi et canticum de dominica hebd. IV.

Ant. 2Surge, qui dormis, et exsúrge a mórtuis, et illuminábit te Christus.

Ant. 3Propter nímiam caritátem suam, qua diléxit nos Deus, cum essémus mórtui peccátis, convivificávit nos in Christo.

Ad Magnificat, ant.

Anno ARabbi, quis peccávit, hic aut paréntes eius, ut cæcus nascerétur? Respóndit Iesus: Neque hic peccávit neque paréntes eius, sed ut manifesténtur ópera Dei in illo.

Anno BSicut Móyses exaltávit serpéntem in desérto, ita exaltári opórtet Fílium hóminis, ut omnis qui credit, in ipso hábeat vitam ætérnam.

Anno CSurgam et ibo ad patrem meum, et dicam illi: Pater, peccávi in cælum et coram te, et iam non sum dignus vocári fílius tuus.

ORATIO

Deus, qui per Verbum tuum humáni géneris reconciliatiónem mirabíliter operáris, præsta, quǽsumus, ut pópulus christiánus prompta devotióne et álacri fide ad ventúra sollémnia váleat festináre.

Ad Laudes matutinas

Ant. 1Deus meus es tu, et confitébor tibi; Deus meus es tu, et exaltábo te.

Psalmi et canticum de dominica hebd. IV.

Ant. 2Potens es, Dómine, erípere nos de manu forti; líbera nos, Deus noster.

Ant. 3Laudáte Dóminum in magnálibus eius.

Ad Benedictus, ant.

Anno AHomo, qui dícitur Iesus, lutum fecit et unxit óculos meos: ábii et lavi et modo vídeo.

Anno BSic Deus diléxit mundum, ut Fílium suum unigénitum daret; ut omnis, qui credit in ipsum, non péreat, sed hábeat vitam ætérnam.

Anno CCito proférte stolam primam et indúite illum et date ánulum in manum eius et calceaménta in pedes: quia hic fílius meus mórtuus erat et revíxit, períerat et invéntus est.

Ad II Vesperas

Ant. 1Ipse est qui constitútus est a Deo iudex vivórum et mortuórum.

Psalmi et canticum de dominica hebd. IV.

Ant. 2Iucúndus homo, qui miserétur in Dómino: non commovébitur in ætérnum.

Ant. 3Quæ prænuntiávit Deus per os ómnium prophetárum, pati Christum suum, sic implévit.

Ad Magnificat, ant.

Anno A A sǽculo non est audítum quia quis apéruit óculos cæci nati, nisi Christus Fílius Dei.

Anno B Qui facit veritátem venit ad lucem, ut manifesténtur eius ópera, quia in Deo sunt facta.

Anno C Fili, tu semper mecum es, et ómnia mea tua sunt; epulári autem et gaudére oportébat, quia frater tuus mórtuus fúerat et revíxit, períerat et invéntus est.

FERIA SECUNDA

Ad Laudes matutinas

Ad Benedictus, ant. Erat quidam régulus, cuius fílius infirmabátur Caphárnaum. Hic cum audísset quia Iesus veníret in Galilǽam, rogábat eum ut sanáret fílium eius.

ORATIO

Deus, qui ineffabílibus mundum rénovas sacraméntis, præsta, quǽsumus, ut Ecclésia tua et ætérnis profíciat institútis, et temporálibus non destituátur auxíliis.

Ad Vesperas

Ad Magnificat, ant. Cognóvit pater quia illa hora erat in qua dixit Iesus: Fílius tuus vivit; et crédidit ipse et domus eius tota.

FERIA TERTIA

Ad Laudes matutinas

Ad Benedictus, ant. Qui me sanum fecit, ille mihi præcépit: Tolle grabátum tuum et ámbula in pace.

ORATIO

Exercitátio veneránda sanctæ devotiónis, Dómine, tuórum fidélium corda dispónat, ut et dignis méntibus suscípiant paschále mystérium, et salvatiónis tuæ núntient præcónium.

Ad Vesperas

Ad Magnificat, ant. Ecce sanus factus es; iam noli peccáre, ne detérius tibi áliquid contíngat.

FERIA QUARTA

Ad Laudes matutinas

Ad Benedictus, ant. Qui verbum meum audit, et credit ei qui misit me, habet vitam ætérnam, dicit Dóminus.

ORATIO

Deus, qui et iustis prǽmia meritórum et peccatóribus véniam per pæniténtiam præbes, tuis supplícibus miserére, ut reátus nostri conféssio indulgéntiam váleat percípere delictórum.

Ad Vesperas

Ad Magnificat, ant. Non possum ego a meípso fácere quidquam, sed sicut áudio et iúdico; et iudícium meum iustum est, dicit Dóminus.

FERIA QUINTA

Ad Laudes matutinas

Ad Benedictus, ant. Ego non ab hómine testimónium accípio; sed hæc dico, ut vos salvi sitis, dicit Dóminus.

ORATIO

Cleméntiam tuam, Dómine, súpplici voto depóscimus, ut nos fámulos tuos, pæniténtia emendátos et bonis opéribus erudítos, in mandátis tuis fácias perseveráre sincéros, et ad paschália festa perveníre illǽsos.

Ad Vesperas

Ad Magnificat, ant. Opera quæ ego fácio testimónium pérhibent de me, quia Pater me misit, dicit Dóminus.

FERIA SEXTA

Ad Laudes matutinas

Ad Benedictus, ant. Et me scitis, et unde sim, scitis; et a meípso non veni, sed Pater meus misit me, dicit Dóminus.

ORATIO

Deus, qui fragilitáti nostræ cóngrua subsídia præparásti, concéde, quǽsumus, ut suæ reparatiónis efféctum et cum exsultatióne suscípiat, et pia conversatióne recénseat.

Ad Vesperas

Ad Magnificat, ant. Nemo in Iesum misit manum, quia nondum vénerat hora eius.

SABBATO

Ad Laudes matutinas

Ad Benedictus, ant. Numquam sic locútus est homo, sicut hic homo.

ORATIO

Dírigat corda nostra, quǽsumus, Dómine, tuæ miseratiónis operátio, quia tibi sine te placére non póssumus.

DOMINICA V QUADRAGESIMÆ

Hebd. I Psalterii

Ad I Vesperas

Ant. 1Dabo legem meam in corde eórum, et ego ero eis in Deum, et ipsi erunt mihi in pópulum.

Psalmi et canticum de dominica hebd. I.

Ant. 2Exístimo ómnia detriméntum esse, propter eminéntem sciéntiam Iesu Christi Dómini mei.

Ant. 3Cum esset Fílius Dei, dídicit ex iis quæ passus est obœdiéntiam.

LECTIO BREVIS

{r}1 Petr 1, 18-21{/r}

Scitóte quod non corruptibílibus argénto vel auro redémpti estis de vana vestra conversatióne a pátribus trádita, sed pretióso sánguine quasi Agni incontamináti et immaculáti Christi, præcógniti quidem ante constitutiónem mundi, manifestáti autem novíssimis tempóribus propter vos, qui per ipsum fidéles estis in Deum, qui suscitávit eum a mórtuis et dedit ei glóriam, ut fides vestra et spes esset in Deum.

Ad Magnificat, ant.

Anno ALázarus, amícus noster, dormit; eámus, et a somno excitémus eum.

Anno BNisi granum fruménti cadens in terram mórtuum fúerit, ipsum solum manet; si autem mórtuum fúerit, multum fructum áffert.

Anno CIesus inclínans se deórsum dígito scribébat in terra. Qui sine peccáto est vestrum, primus in illam lápidem mittat.

ORATIO

Quǽsumus, Dómine Deus noster, ut in illa caritáte, qua Fílius tuus díligens mundum morti se trádidit, inveniámur ipsi, te opitulánte, alácriter ambulántes.

Ad Laudes matutinas

Ant. 1Factus es adiútor meus, Deus meus.

Psalmi et canticum de dominica hebd. I.

Ant. 2Erue nos in mirabílibus tuis, et salvos nos fac de manu mortis.

Ant. 3Venit hora ut clarificétur Fílius hóminis.

LECTIO BREVIS

{r}Lev 23, 4-7{/r}

Hæ sunt ergo fériæ Dómini, convéntus sancti, quas celebráre debétis tempóribus suis. Mense primo, quarta décima die mensis ad vésperum Pascha Dómini est. Et quinta décima die mensis huius sollémnitas Azymórum Dómini est. Septem diébus ázyma comedétis. Die primo erit vobis convéntus sanctus; omne opus servíle non faciétis in eo.

Ad Benedictus, ant.

Anno AEgo sum resurréctio et vita. Qui credit in me, etsi mórtuus fúerit, vivet; et omnis qui vivit et credit in me, non moriétur in ætérnum.

Anno BSi quis mihi minístrat, me sequátur, et ubi sum ego, illic et miníster meus erit.

Anno CAudiéntes unus post unum exíbant, incipiéntes a senióribus, et remánsit solus, et múlier in médio stans.

Ad II Vesperas

Ant. 1Sicut exaltátus est serpens in erémo, ita exaltári opórtet Fílium hóminis.

Psalmi et canticum de dominica hebd. I.

Ant. 2Dóminus exercítuum, prótegens et líberans, tránsiens et salvans.

Ant. 3Ipse vulnerátus est propter iniquitátes nostras, attrítus est propter scélera nostra, et livóre eius sanáti sumus.

LECTIO BREVIS

{r}Act 13, 26-30a{/r}

Viri fratres, nobis verbum salútis huius missum est. Qui habitábant Ierúsalem et príncipes eórum, Iesum ignorántes et voces Prophetárum, quæ per omne sábbatum legúntur, iudicántes implevérunt, et nullam causam mortis inveniéntes petiérunt a Piláto, ut interficerétur; cumque consummássent ómnia, quæ de eo scripta erant, deponéntes eum de ligno posuérunt in monuménto. Deus vero suscitávit eum a mórtuis.

Ad Magnificat, ant.

Anno AEgo crédidi quia tu es Christus Fílius Dei, qui in mundum venísti.

Anno BEgo, si exaltátus fúero a terra, ómnia traham ad meípsum.

Anno CMúlier, ubi sunt? Nemo te condemnávit? Nemo, Dómine. Dixit autem Iesus: Nec ego te condémno. Vade, et iam noli peccáre.

In feriis huius hebdomadæ V, ad Officium lectionis, Laudes matutinas et Vesperas, dici possunt hymni Hebdomadæ sanctæ.

FERIA SECUNDA

Ad Laudes matutinas

LECTIO BREVIS

{r}Ier 11, 19-20{/r}

Ego quasi agnus mansuétus, qui portátur ad víctimam; et non cognóvi quia super me cogitavérunt consília: «Cædámus lignum in vigóre eius et eradámus eum de terra vivéntium, et nomen eius non memorétur ámplius». Tu autem, Dómine exercítuum, qui iúdicas iuste et probas renes et corda: vídeam ultiónem tuam ex eis; tibi enim revelávi causam meam.

Ad Benedictus, ant. Qui séquitur me, non ámbulat in ténebris, sed habébit lumen vitæ, dicit Dóminus.

ORATIO

Deus, per cuius ineffábilem grátiam omni benedictióne ditámur, præsta nobis ita in novitátem a vetustáte transíre, ut regni cæléstis glóriæ præparémur.

Ad Vesperas

LECTIO BREVIS

{r}Rom 5, 8-9{/r}

Comméndat suam caritátem Deus in nos, quóniam, cum adhuc peccatóres essémus, Christus pro nobis mórtuus est. Multo ígitur magis iustificáti nunc in sánguine ipsíus, salvi érimus ab ira per ipsum!

Ad Magnificat, ant. Ego sum qui testimónium perhíbeo de meípso, dicit Dóminus; et testimónium pérhibet de me, qui misit me, Pater.

FERIA TERTIA

Ad Laudes matutinas

LECTIO BREVIS

{r}Zac 12, 10-11a{/r}

Effúndam super domum David et super habitatóres Ierúsalem spíritum grátiæ et precum; et aspícient ad me. Quem confixérunt, plangent quasi planctu super unigénitum et dolébunt super eum, ut doléri solet super primogénitum. In die illa magnus erit planctus in Ierúsalem.

Ad Benedictus, ant. Cum exaltavéritis Fílium hóminis, tunc cognoscétis quia ego sum, dicit Dóminus.

ORATIO

Da nobis, quǽsumus, Dómine, perseverántem in tua voluntáte famulátum, ut in diébus nostris et mérito et número pópulus tibi sérviens augeátur.

Ad Vesperas

LECTIO BREVIS

{r}1 Cor 1, 27b-30{/r}

Infírma mundi elégit Deus, ut confúndat fórtia, et ignobília mundi et contemptibília elégit Deus, quæ non sunt, ut ea, quæ sunt, destrúeret, ut non gloriétur omnis caro in conspéctu Dei. Ex ipso autem vos estis in Christo Iesu, qui factus est sapiéntia nobis a Deo et iustítia et sanctificátio et redémptio.

Ad Magnificat, ant. Qui me misit, mecum est, et non relíquit me solum; quia quæ plácita sunt ei fácio semper.

FERIA QUARTA

Ad Laudes matutinas

LECTIO BREVIS

{r}Is 50, 5-7{/r}

Dóminus Deus apéruit mihi aurem; ego autem non rebellávi, retrórsum non ábii. Dorsum meum dedi percutiéntibus et genas meas velléntibus: fáciem meam non avérti ab increpatiónibus et sputis. Dóminus Deus auxiliátor meus; ídeo non sum confúsus, ídeo pósui fáciem meam ut petram duríssimam, et scio quóniam non confúndar.

Ad Benedictus, ant. Si vos manséritis in sermóne meo, vere discípuli mei éritis, dicit Dóminus, et cognoscétis veritátem, et véritas liberábit vos.

ORATIO

Sanctificáta per pæniténtiam tuórum corda filiórum, Deus miserátor, illústra, et, quibus præstas devotiónis afféctum, præbe supplicántibus pium benígnus audítum.

Ad Vesperas

LECTIO BREVIS

{r}Eph 4, 32 — 5, 2{/r}

Estóte ínvicem benígni, misericórdes, donántes ínvicem, sicut et Deus in Christo donávit vobis. Estóte ergo imitatóres Dei sicut fílii caríssimi et ambuláte in dilectióne, sicut et Christus diléxit nos et trádidit seípsum pro nobis oblatiónem et hóstiam Deo in odórem suavitátis.

Ad Magnificat, ant. Quid me quǽritis interfícere, hóminem qui vera locútus sum vobis?

FERIA QUINTA

Ad Laudes matutinas

LECTIO BREVIS

Hebr 2, 9b-10

Vidémus Iesum propter passiónem mortis glória et honóre coronátum, ut grátia Dei pro ómnibus gustáverit mortem. Decébat enim eum, propter quem ómnia et per quem ómnia, qui multos fílios in glóriam addúxit, auctórem salútis eórum per passiónes consummáre.

Ad Benedictus, ant. Dicébat Iesus turbis Iudæórum, et princípibus sacerdótum: Qui ex Deo est, verba Dei audit; proptérea vos non audítis, quia ex Deo non estis.

ORATIO

Adésto, Dómine, supplícibus tuis, et spem suam in tua misericórdia collocántes tuére propítius, ut, a peccatórum labe mundáti, in sancta conversatióne permáneant, et promissiónis tuæ perficiántur herédes.

Ad Vesperas

LECTIO BREVIS

{r}Hebr 13, 12-15{/r}

Iesus, ut sanctificáret per suum sánguinem pópulum, extra portam passus est. Exeámus ígitur ad eum extra castra, impropérium eius portántes; non enim habémus hic manéntem civitátem, sed futúram inquírimus. Per ipsum ergo offerámus hóstiam laudis semper Deo, id est fructum labiórum confiténtium nómini eius.

Ad Magnificat, ant. Quinquagínta annos nondum habes et Abraham vidísti? Amen dico vobis, ántequam Abraham fíeret, ego sum.

FERIA SEXTA

Ad Laudes matutinas

LECTIO BREVIS

{r}Is 52, 13-15{/r}

Ecce próspere aget servus meus; exaltábitur et elevábitur et sublímis erit valde. Sicut obstupuérunt super eum multi, sic defórmis erat, quasi non esset hóminis spécies eius, filiórum hóminis aspéctus eius, sic dispérget gentes multas. Super ipsum continébunt reges os suum, quia, quæ non sunt narráta eis, vidérunt et, quæ non audiérunt, contempláti sunt.

Ad Benedictus, ant. Multa bona ópera operátus sum vobis, dicit Dóminus; propter quod opus vultis me occídere?

ORATIO

Absólve, quǽsumus, Dómine, tuórum delícta populórum, ut a peccatórum néxibus, quæ pro nostra fragilitáte contráximus, tua benignitáte liberémur.

Ad Vesperas

LECTIO BREVIS

{r}1 Petr 2, 21b-24{/r}

Christus passus est pro vobis vobis relínquens exémplum, ut sequámini vestígia eius: qui peccátum non fecit, nec invéntus est dolus in ore ipsíus; qui cum maledicerétur, non remaledicébat, cum paterétur, non comminabátur, commendábat autem iuste iudicánti; qui peccáta nostra ipse pértulit in córpore suo super lignum, ut peccátis mórtui iustítiæ viverémus; cuius livóre sanáti estis.

Ad Magnificat, ant. Si mihi non créditis, opéribus crédite, quæ ego fácio in nómine Dei.

SABBATO

Ad Laudes matutinas

LECTIO BREVIS

{r}Is 65, 1b-3a{/r}

Dixi: «Ecce ego, ecce ego!» ad gentem, quæ non invocábat nomen meum. Expándi manus meas tota die ad pópulum rebéllem, qui gráditur in via non bona post cogitatiónes suas; pópulus, qui ad iracúndiam próvocat me ante fáciem meam semper.

Ad Benedictus, ant. Iesus mórtuus est, ut fílios Dei qui erant dispérsi congregáret in unum.

ORATIO

Deus, qui, licet salútem hóminum semper operáris, nunc tamen pópulum tuum grátia abundantióre lætíficas, réspice propítius ad electiónem tuam, ut piæ protectiónis auxílium et regenerándos múniat et renátos.