Dominica post diem 6 ianuarii occurrente
IN BAPTISMATE DOMINI
Festum
Quando festum Baptismatis Domini celebratur feria secunda post dominicam die 7 vel 8 ianuarii occurrentem, ad quam sollemnitas Epiphaniæ Domini transfertur, I Vesperæ festi Baptismatis Domini omittuntur.
Ad Officium lectionis Ant. 1 Vox Dómini super aquas, Deus maiestátis intónuit. Ant. 2 Omnis terra adóret te, Dómine, et lætétur, quia nova lux prodísti ómnium sæculórum. Ant. 3 Benedíctus Deus, qui pósuit ánimam meam ad vitam, et edúxit me in refrigérium.Hic est Fílius meus caríssimus.
Audíte illum.
De libro Isaíæ prophétæ
{r:Is}42, 1-9; 49, 1-9{/r}
{p}Servus Domini mansuetus, lux gentium
{v}42,1{/v}Ecce servus meus, suscípiam eum;
eléctus meus, cómplacet sibi in illo ánima mea;
dedi spíritum meum super eum,
iudícium géntibus próferet.
{v}2{/v}Non clamábit neque vociferábitur,
nec audiétur vox eius foris.
{v}3{/v}Cálamum quassátum non cónteret
et linum fúmigans non exstínguet;
in veritátem próferet iudícium.
{v}4{/v}Non languébit nec frangétur,
donec ponat in terra iudícium;
et legem eius ínsulæ exspéctant.
{v}5{/v}Hæc dicit Dóminus Deus,
creans cælos et exténdens eos,
firmans terram et quæ gérminant ex ea,
dans flatum pópulo, qui est super eam,
et spíritum calcántibus eam.
{v}6{/v}«Ego, Dóminus, vocávi te in iustítia
et apprehéndi manum tuam;
et formávi te et dedi te
in fœdus pópuli, in lucem géntium,
{v}7{/v}ut aperíres óculos cæcórum
et edúceres de conclusióne vinctum,
de domo cárceris sedéntes in ténebris.
{v}8{/v}Ego Dóminus: hoc est nomen meum;
et glóriam meam álteri non dabo
et laudem meam sculptílibus.
{v}9{/v}Quæ prima fuérunt, ecce venérunt;
nova quoque ego annúntio:
ántequam oriántur, audíta vobis fáciam».
{v}49,1{/v}Audíte me, ínsulæ, et atténdite pópuli de longe:
Dóminus ab útero vocávit me,
de ventre matris meæ recordátus est nóminis mei;
{v}2{/v}et pósuit os meum quasi gládium acútum,
in umbra manus suæ protéxit me
et pósuit me sicut sagíttam eléctam,
in pháretra sua abscóndit me,
{v}3{/v}et dixit mihi: «Servus meus es tu,
Israel, in quo gloriábor».
{v}4{/v}Et ego dixi: «In vácuum laborávi,
sine causa et vane fortitúdinem meam consúmpsi;
verúmtamen iudícium meum cum Dómino
et merces mea cum Deo meo».
{v}5{/v}Et nunc dicit Dóminus,
qui formávit me ex útero servum sibi,
ut redúcerem Iacob ad eum,
et Israel ei congregarétur;
et glorificátus sum in óculis Dómini,
et Deus meus factus est fortitúdo mea.
{v}6{/v}Et dixit: «Parum est ut sis mihi servus
ad suscitándas tribus Iacob
et relíquias Israel reducéndas:
dabo te in lucem géntium,
ut sit salus mea usque ad extrémum terræ».
{v}7{/v}Hæc dicit Dóminus,
redémptor Israel, Sanctus eius,
ad contémptum in ánima,
ad abominátum in gente,
ad servum dominórum:
«Reges vidébunt et consúrgent,
príncipes quoque et adorábunt
propter Dóminum, quia fidélis est,
Sanctum Israel, qui elégit te».
{v}8{/v}Hæc dicit Dóminus:
«In témpore benepláciti exaudívi te
et in die salútis auxiliátus sum tui;
et servávi te et dedi te in fœdus pópuli,
ut suscitáres terram
et distribúeres hereditátes dissipátas;
{v}9{/v}ut díceres his, qui vincti sunt: “Exíte”,
et his, qui in ténebris: “Revelámini”.
Super vias pascéntur,
et in ómnibus cóllibus decalvátis páscua eórum».
{p}RESPONSORIUM
Cf. {r}Mt 3, 16. 17{/r}; {r}Lc 3, 22{/r}
Hódie in Iordáne, baptizáto Dómino, apérti sunt cæli, et sicut colúmba super eum Spíritus mansit, et vox Patris intónuit: {*} Hic est Fílius meus diléctus, in quo mihi bene complácui.
Descéndit Spíritus Sanctus corporáli spécie sicut colúmba super ipsum, et vox de cælo facta est: {*} Hic est Fílius meus diléctus, in quo mihi bene complácui.
Ex Oratiónibus sancti Gregórii Nazianzéni epíscopi
(Oratio 39 in sancta Lumina, 14-16. 20: PG 36, 350-351. 354. 358-359)
{p}Baptismus Christi
Christus illuminátur, simul illustrémur; Christus baptizátur, simul descendámus, ut simul étiam ascendámus.
Baptízat Ioánnes, Iesus accédit; forsan quidem ut ipsum quoque, a quo baptizátur, sanctitáte affíciat; proculdúbio autem, ut totum véterem Adámum in aquis sepéliat: ante nos vero, et propter nos, Iordánem sanctíficans; ut, quemádmodum spíritus et caro erat, sic étiam per Spíritum et aquam initiáret.
Baptísta non admíttit: Iesus certat. Tum: Ego a te baptizári débeo, inquit lucérna Soli, vox Verbo, amícus Sponso, maior inter omnes natos mulíerum omnis creatúræ Primogénito, is, qui a matérno ventre præsultárat, ei qui in ventre adorátus fúerat, præcúrsor et præcursúrus, ei qui apparúerat atque apparébit. Ego a te baptizári débeo: adde, et pro te. Explorátum enim habébat fore ut martýrio baptizarétur; aut, ut Petrus, non pédibus dumtáxat purgarétur.
At étiam Iesus ex aquis ascéndit; mundum enim secum in altum effert, ac cælos, quos Adámus et sibi et pósteris, quemádmodum et flámmeo gládio paradísum, cláuserat, findi atque aperíri cernit.
Ac Spíritus deitátem testátur, nimírum ad parem accúrrens; et vox cǽlitus míttitur; illinc enim is erat, cui testimónium dicebátur; et ut colúmba, corpus enim honóre áfficit, quandóquidem hoc étiam per deificatiónem Deus est, corpóreo modo conspécta. Ac simul multis retro sǽculis colúmba dilúvii finem nuntiáre consuévit.
Nos autem hódie Christi baptísmum honóre complectámur, ac festum honéste celebrémus.
Omníno autem purgáti sitis, ac purgémini. Nulla enim re Deus perínde delectátur, ut hóminis, pro quo omnis sermo et ómnia mystéria, resipiscéntia et salúte; ut efficiámini, sicut luminária in mundo, vis quædam vitális réliquis homínibus, quo perfécta lúmina magno illi lúmini astántes, eius ipsíus, quæ in cælo est, lucis splendóribus imbuámini, púrius et clárius a Trinitáte illumináti, cuius nunc rádium unum ex una Deitáte manántem minus plene accepístis, in Christo Iesu Dómino nostro, cui glória et impérium in sǽcula sæculórum. Amen.
{p}RESPONSORIUM
Ps 113 A (114), 5
Hódie cæli apérti sunt et mare dulce factum est, terra exsúltat, montes et colles lætántur: {*} Quia a Ioánne in Iordáne Christus baptizátus est.
Quid est tibi, mare, quod fugísti, et tu, Iordánis, quia convérsus es retrórsum? {*} Quia a Ioánne in Iordáne Christus baptizátus est.
AD VIGILIAM: Ant. Iordánis flúvius se retínuit, intránte Dómino, aqua contrémuit, nova creátio surgit de flúmine, quæ illúminat omne sǽculum.Ad I Vesperas
HYMNUS
A Patre Unigénite,
ad nos venis per Vírginem,
baptísmi rore cónsecrans
cunctos, fide regénerans.
De cælo celsus pródiens
éxcipis formam hóminis,
factúram morte rédimens,
gáudia vitæ lárgiens.
Hoc te, Redémptor, quǽsumus:
illábere propítius,
clarúmque nostris córdibus
lumen præbe deíficum.
Mane nobíscum, Dómine,
noctem obscúram rémove,
omne delíctum áblue,
pie medélam tríbue.
O Christe, vita, véritas,
tibi sit omnis glória,
quem Patris atque Spíritus
splendor revélat cǽlitus. Amen.
Ant. 1 Fuit Ioánnes in desérto, baptízans et prǽdicans baptísmum pæniténtiæ in remissiónem peccatórum.
Psalmi et canticum, ut in I Vesperas Epiphaniæ.
Ant. 2 Ego quidem aqua baptízo vos; ipse vos baptizábit Spíritu Sancto et igne.
Ant. 3 Baptizátus Iesus conféstim ascéndit de aqua, et ecce apérti sunt ei cæli.
LECTIO BREVIS
{r}Act 10, 37-38{/r}
Vos scitis quod factum est verbum per univérsam Iudǽam incípiens a Galilǽa post baptísmum, quod prædicávit Ioánnes: Iesum a Názareth, quómodo unxit eum Deus Spíritu Sancto et virtúte, qui pertransívit benefaciéndo et sanándo omnes oppréssos a Diábolo, quóniam Deus erat cum illo.
RESPONSORIUM BREVE
Dómine Deus, {*} Audi clamórem pópuli.
Dómine Deus, {*} Audi clamórem pópuli.
Et áperi eis fontem aquæ vivæ. {*}
Audi clamórem pópuli.
Glória Patri, et Fílio, et Spirítui Sancto.
Dómine Deus, {*} Audi clamórem pópuli.
Ad Magnificat, ant. Véterem hóminem rénovans, Salvátor venit ad baptísmum, ut natúram, quæ corrúpta est, per aquam recuperáret, incorruptíbili veste circumíciens nos.
PRECES
Redemptórem nostrum, qui baptísmum in Iordáne dignátus est a Ioánne suscípere, exorémus, dicéntes:
Mitte, Dómine, Spíritum tuum super nos.
Christe, serve Dei, quem Pater suscépit et in quo sibi complácuit,
mitte super nos, Dómine, Spíritum tuum.
Mitte, Dómine, Spíritum tuum super nos.
Christe, elécte Dei, qui cálamum quassátum non contrivísti et linum fúmigans non exstinxísti,
miserére ómnium quæréntium te in veritáte.
Mitte, Dómine, Spíritum tuum super nos.
Christe, Fili Dei, quem Pater fœ́dere novo vocávit in lucem géntium,
áperi óculos cæcórum in aqua baptísmatis.
Mitte, Dómine, Spíritum tuum super nos.
Christe, hóminum salvátor, quem Pater Spíritu Sancto unxit ad ministérium salútis,
duc omnes ad te vidéndum et credéndum, ut vitam ætérnam hábeant.
Mitte, Dómine, Spíritum tuum super nos.
Christe, spes nostra, qui ducis sedéntes in ténebris ad lucem salútis,
fratres nostros defúnctos in regnum tuum súscipe.
Mitte, Dómine, Spíritum tuum super nos.
Pater noster.
ORATIO
Omnípotens sempitérne Deus, qui Christum, in Iordáne flúmine baptizátum, Spíritu Sancto super eum descendénte, diléctum Fílium tuum sollémniter declarásti, concéde fíliis adoptiónis tuæ, ex aqua et Spíritu Sancto renátis, ut in beneplácito tuo iúgiter persevérent.
Ad Invitatorium
Ant. Christum, Fílium diléctum, in quo Pater sibi complácuit, veníte, adorémus.
Ad Laudes matutinas
HYMNUS
Iesus refúlsit ómnium
pius redémptor géntium;
totum genus fidélium
laudis celébret cánticum.
Denis ter ævi círculis
iam parte vivens córporis,
lympham petit baptísmatis
cunctis carens contágiis.
Felix Ioánnes mérgere
illum treméscit flúmine,
potest suo qui sánguine
peccáta mundi térgere.
Vox ergo Prolem de polis
testátur excélsi Patris,
fluítque virtus Spíritus
sancti datrix charísmatis.
Nos, Christe, voce súpplici
precámur, omnes prótege,
ac mente fac nitéscere
tibíque mundos vívere.
O Christe, vita, véritas,
tibi sit omnis glória,
quem Patris atque Spíritus
splendor revélat cǽlitus. Amen.
Ant. 1 Baptízat miles Regem, servus Dóminum, Ioánnes Salvatórem; aqua Iordánis stúpuit, colúmba protestátur, patérna vox audíta est: Hic est Fílius meus.
Psalmi et canticum de dominica hebd. I.
Ant. 2 Fontes aquárum sanctificáti sunt, Christo apparénte in glória orbi terrárum. Hauríte aquas de fóntibus Salvatóris; sanctificávit enim nunc omnem creatúram Christus Deus noster.
Ant. 3 Te, qui in Spíritu et igne puríficas humána contágia, Deum et redemptórem omnes glorificámus.
LECTIO BREVIS
{r}Is 61, 1-2a{/r}
Spíritus Dómini Dei super me, eo quod únxerit Dóminus me; ad annuntiándum læta mansuétis misit me, ut medérer contrítis corde et prædicárem captívis liberatiónem et clausis apertiónem; ut prædicárem annum placábilem Dómino.
RESPONSORIUM BREVE
Christe, Fili Dei vivi, {*} Miserére nobis.
Christe, Fili Dei vivi, {*} Miserére nobis.
Qui apparuísti hódie. {*}
Miserére nobis.
Glória Patri, et Fílio, et Spirítui Sancto.
Christe, Fili Dei vivi, {*} Miserére nobis.
Ad Benedictus, ant. Baptizátur Christus, et sanctificátur omnis mundus; et tríbuit nobis remissiónem peccatórum; aqua et Spíritu omnes purificémur.
PRECES
Redemptórem nostrum, qui baptísmum in Iordáne dignátus est a Ioánne suscípere, exorémus dicéntes:
Kýrie, eléison.
Christe, qui per manifestatiónem tuam lumen super nos fecísti claréscere,
lumen tuum concéde iis, quibus occurrémus hódie.
Kýrie, eléison.
Qui te humiliásti ut baptísmum accíperes a servo tuo, ad viam humilitátis nobis demonstrándam,
spíritum nobis concéde, quo homínibus humíliter ministrémus.
Kýrie, eléison.
Qui per baptísmum tuum abluísti nos ab omni labe, et nos Patris fílios effecísti,
concéde spíritum adoptiónis ómnibus te quæréntibus.
Kýrie, eléison.
Qui per baptísmum creatiónem tuam sanctificásti, et conversiónis iánuam baptizándis reserásti,
nos Evangélii tui éffice minístros in mundo.
Kýrie, eléison.
Qui nobis sanctíssimam revelásti in tuo baptísmate Trinitátem,
rénova spíritum adoptiónis in regáli baptizatórum sacerdótio.
Kýrie, eléison.
Ad II Vesperas
HYMNUS
Implénte munus débitum
Ioánne, rerum cónditor
Iordáne mersus hac die
aquam lavándo díluit,
Non ipse mundári volens
de ventre natus Vírginis,
peccáta sed mortálium
suo lavácro tóllere.
Dicénte Patre quod «meus
diléctus hic est Fílius»,
suménte Sancto Spíritu
formam colúmbæ cǽlitus,
Hoc mýstico sub nómine
micat salus Ecclésiæ;
Persóna trina cómmanet
unus Deus per ómnia.
O Christe, vita, véritas,
tibi sit omnis glória,
quem Patris atque Spíritus
splendor revélat cǽlitus. Amen.
PSALMODIA
Ant. 1 Vox de cælis sónuit et vox Patris audíta est: Hic est Fílius meus, in quo mihi complácui, ipsum audíte.
Ant. 2 Caput dracónis Salvátor contéruit in Iordáne flúmine, ab eius potestáte omnes erípuit.
Ant. 3 Magnum mystérium declarátur hódie, quia Creátor ómnium in Iordáne expúrgat nostra facínora.
LECTIO BREVIS
{r}Act 10, 37-38{/r}
Vos scitis quod factum est verbum per univérsam Iudǽam incípiens a Galilǽa post baptísmum, quod prædicávit Ioánnes: Iesum a Názareth, quómodo unxit eum Deus Spíritu Sancto et virtúte, qui pertransívit benefaciéndo et sanándo omnes oppréssos a Diábolo, quóniam Deus erat cum illo.
RESPONSORIUM BREVE
Hic est qui venit {*} Per aquam et sánguinem.
Hic est qui venit {*} Per aquam et sánguinem.
Iesus Christus, Dóminus noster. {*}
Per aquam et sánguinem.
Glória Patri, et Fílio, et Spirítui Sancto.
Hic est qui venit {*} Per aquam et sánguinem.
Ad Magnificat, ant. Christus Iesus diléxit nos, et lavit nos a peccátis nostris in sánguine suo, et fecit nos regnum et sacerdótes Deo et Patri suo. Ipsi glória et impérium in sǽcula.
AD HORAM MEDIAM
PSALMODIA
Ant. ad Tertiam Ioánnes prohibébat Iesum dicens: Ego a te débeo baptizári, et tu venis ad me?
Ant. ad Sextam Respóndens autem Iesus dixit ei: Sine me modo; sic enim decet nos implére omnem iustítiam.
Ant. ad Nonam Testimónium perhíbuit Ioánnes dicens: Quia vidi Spíritum descendéntem quasi colúmbam de cælo, et mansit super eum.
Illum opórtet créscere.
Me autem mínui.
Ecce servus meus, suscípiam eum.
Eléctus meus, complácuit sibi in illo ánima mea.
Ponam spíritum meum super eum.
Et iudícium géntibus nuntiábit.
AD TERTIAMLECTIO BREVIS
{r}Is 11, 1-3a{/r}
Egrediétur virga de stirpe Iesse, et flos de radíce eius ascéndet; et requiéscet super eum spíritus Dómini: spíritus sapiéntiæ et intelléctus, spíritus consílii et fortitúdinis, spíritus sciéntiæ et timóris Dómini; et delíciæ eius in timóre Dómini.
AD SEXTAMLECTIO BREVIS
{r}Is 42, 1{/r}
Ecce servus meus, suscípiam eum; eléctus meus, cómplacet sibi in illo ánima mea; dedi spíritum meum super eum, iudícium géntibus próferet.
AD NONAMLECTIO BREVIS
{r}Is 49, 6{/r}
Dixit mihi Dóminus: «Parum est ut sis mihi servus ad suscitándas tribus Iacob et relíquias Israel reducéndas: dabo te in lucem géntium, ut sit salus mea usque ad extrémum terræ».