DOMINI NOSTRI IESU CHRISTI SUMMI ET ÆTERNI SACERDOTIS

Festum

Ad Officium lectionis

HYMNUS

PSALMODIA

Ant. 1 Postulávi Patrem meum; dedit mihi gentes in hereditátem. Psalmus 2

Ant. 2 Exhibéte córpora vestra hóstiam vivéntem, sanctam, Deo placéntem. Psalmus 39, 2-13

Ant. 3 Christus diléxit Ecclésiam et seípsum trádidit pro ea, ut illam sanctificáret. Psalmus 84

Christus unam pro peccátis óbtulit hóstiam.

Et consummávit in sempitérnum sanctificátos.

De Epístola ad Hebrǽos

{r:Hebr}4, 14 – 5, 10{/r}

Iesus, Pontifex magnus

Fratres: {v}4,14{/v}Habéntes pontíficem magnum, qui penetrávit cælos, Iesum Fílium Dei, teneámus confessiónem; {v}15{/v}non enim habémus pontíficem, qui non possit cómpati infirmitátibus nostris, tentátum autem per ómnia secúndum similitúdinem absque peccáto. {v}16{/v}Adeámus ergo cum fidúcia ad thronum grátiæ, ut misericórdiam consequámur et grátiam inveniámus in auxílium opportúnum.

{v}5,1{/v}Omnis namque póntifex ex homínibus assúmptus pro homínibus constitúitur in his, quæ sunt ad Deum, ut ófferat dona et sacrifícia pro peccátis, {v}2{/v}qui æque condolére possit his, qui ignórant et errant, quóniam et ipse circúmdatus est infirmitáte {v}3{/v}et propter eam debet, quemádmodum et pro pópulo ita étiam pro semetípso offérre pro peccátis.

{v}4{/v}Nec quisquam sumit sibi illum honórem, sed qui vocátur a Deo tamquam et Aaron. {v}5{/v}Sic et Christus non semetípsum glorificávit, ut póntifex fíeret sed qui locútus est ad eum: «Fílius meus es tu; ego hódie génui te»; {v}6{/v}quemádmodum et in álio dicit: «Tu es sacérdos in ætérnum secúndum órdinem Melchísedech».

{v}7{/v}Qui in diébus carnis suæ, preces supplicationésque ad eum, qui possit salvum illum a morte fácere, cum clamóre válido et lácrimis ófferens et exaudítus pro sua reveréntia; {v}8{/v}et quidem cum esset Fílius, dídicit ex his, quæ passus est, obœdiéntiam {v}9{/v}et, consummátus, factus est ómnibus obœdiéntibus sibi auctor salútis ætérnæ, {v}10{/v}appellátus a Deo póntifex iuxta órdinem Melchísedech.

RESPONSORIUM

{r}Phil 2, 8{/r}; {r}Is 53, 7{/r}

Christus humiliávit semetípsum, {*} Factus obœ́diens usque ad mortem.

Oblátus est quia ipse vóluit. {*} Factus obœ́diens usque ad mortem.

Ex Lítteris Encýclicis «Mediátor Dei» Pii Papæ Duodécimi.

(AAS 39, [1947], pp. 552-553)

Christus sacerdos et victima

Christus útique sacérdos est, sed nobis non sibi sacérdos, cum vota religionísque sensus totíus humáni géneris nómine ætérno Patri déferat; idem páriter víctima est, sed nobis, cum semetípsum in vicem hóminis culpis obnóxii repónat. Iamvéro illud Apóstoli «hoc … sentíte in vobis quod et in Christo Iesu» a christiánis ómnibus póstulat, ut eo modo ánimum in se réferant afféctum, quantum humána potest facúltas, quo divíni Redemptóris ánimus afféctus erat, cum sui ipsíus faciébat Sacrifícium; húmilem nempe réferant mentis demissiónem, summǽque Dei Maiestátis adoratiónem adhíbeant, honórem, laudem gratiarúmque actiónem. Póstulat prætérea ab iísdem ut víctimæ conditiónem quodámmodo sumant, ut semetípsos ad Evangélii præcépta abnégent, ut pæniténtiæ ultro libentérque dent óperam, utque admíssa quisque sua detesténtur et éxpient. Póstulat dénique ut omnes una cum Christo mýsticam in Cruce mortem obeámus, ita quidem ut Pauli senténtiam usurpáre possímus: «Christo confíxus sum Cruci» (Gal 2, 19).

RESPONSORIUM

Cf. {r}Gal 2, 20{/r}

In fide vivo Fílii Dei {*} Qui diléxit me et trádidit semetípsum pro me.

Vivo, autem iam non ego, vivit vero in me Christus. {*} Qui diléxit me et trádidit semetípsum pro me.

Léctio sancti Evangélii secúndum Matthǽum

{r:Mt}26, 36-42{/r}

Tristis est anima mea usque ad mortem.

{v}36{/v}Venit Iesus cum discípulis in prǽdium, quod dícitur Gethsémani. Et dicit discípulis: «Sedéte hic, donec vadam illuc et orem». {v}37{/v}Et assúmpto Petro et duóbus fíliis Zebedǽi, cœpit contristári et mæstus esse. {v}38{/v}Tunc ait illis: «Tristis est ánima mea usque ad mortem; sustinéte hic et vigiláte mecum».

{v}39{/v}Et progréssus pusíllum, prócidit in fáciem suam orans et dicens: «Pater mi, si possíbile est, tránseat a me calix iste; verúmtamen non sicut ego volo, sed sicut tu».

{v}40{/v}Et venit ad discípulos et invénit eos dormiéntes; et dicit Petro: «Sic non potuístis una hora vigiláre mecum? {v}41{/v}Vigiláte et oráte, ut non intrétis in tentatiónem; spíritus quidem promptus est, caro autem infírma».

{v}42{/v}Iterum secúndo ábiit et orávit dicens: «Pater mi, si non potest hoc transíre, nisi bibam illud, fiat volúntas tua».

Léctio sancti Evangélii secúndum Marcum

{r:Mc}14, 22-25{/r}

Hoc est corpus meum. Hic est sanguis meus.

Primo die Azymórum, quando Pascha immolábant: {v}22{/v}manducántibus illis, accépit Iesus panem et benedícens fregit et dedit eis et ait: «Súmite: hoc est corpus meum». {v}23{/v}Et accépto cálice, grátias agens dedit eis; et bibérunt ex illo omnes. {v}24{/v}Et ait illis: «Hic est sanguis meus novi testaménti, qui pro multis effúnditur. {v}25{/v}Amen dico vobis: Iam non bibam de genímine vitis usque in diem illum, cum illud bibam novum in regno Dei».

Léctio sancti Evangélii secúndum Ioánnem

{r:Io}17, 1-2. 9. 14-26{/r}

Pro eis ego sanctifico meipsum, ut sint et ipsi sanctificati in veritate.

In illo témpore:

{v}1{/v}Sublevátis óculis suis in cælum, dixit Iesus:

«Pater, venit hora: clarífica Fílium tuum, ut Fílius claríficet te, {v}2{/v}sicut dedísti ei potestátem omnis carnis, ut omne, quod dedísti ei, det eis vitam ætérnam. {v}9{/v}Ego pro eis rogo; non pro mundo rogo, sed pro his, quos dedísti mihi, quia tui sunt.

{v}14{/v}Ego dedi eis sermónem tuum et mundus ódio eos hábuit, quia non sunt de mundo, sicut ego non sum de mundo.

{v}15{/v}Non rogo, ut tollas eos de mundo, sed ut serves eos ex Malo. {v}16{/v}De mundo non sunt, sicut ego non sum de mundo. {v}17{/v}Sanctífica eos in veritáte; sermo tuus véritas est. {v}18{/v}Sicut me misísti in mundum, et ego misi eos in mundum; {v}19{/v}et pro eis ego sanctífico meípsum, ut sint et ipsi sanctificáti in veritáte.

{v}20{/v}Non pro his autem rogo tantum, sed et pro eis, qui creditúri sunt per verbum eórum in me, {v}21{/v}ut omnes unum sint, sicut tu, Pater, in me et ego in te, ut et ipsi in nobis unum sint; ut mundus credat quia tu me misísti. {v}22{/v}Et ego claritátem, quam dedísti mihi, dedi illis, ut sint unum, sicut nos unum sumus; {v}23{/v}ego in eis, et tu in me, ut sint consummáti in unum; ut cognóscat mundus, quia tu me misísti et dilexísti eos, sicut me dilexísti.

{v}24{/v}Pater, quod dedísti mihi, volo, ut, ubi ego sum, et lili sint mecum, ut vídeant claritátem meam, quam dedísti mihi, quia dilexísti me ante constitutiónem mundi.

{v}25{/v}Pater iuste, et mundus te non cognóvit; ego autem te cognóvi et hi cognovérunt quia tu me misísti; {v}26{/v}et notum feci eis nomen tuum et notum fáciam, ut diléctio, qua dilexísti me, in ipsis sit et ego in ipsis».

Ad Invitatorium

Ant. Christo qui sempitérnum habet sacerdótium, glóriam reddámus.

Ad Laudes matutinas

HYMNUS

Ant. 1 Pater per sánguinem crucis Christi, pacificávit sive quæ in terris, sive quæ in cælis sunt.

Psalmi et canticum de dominica hebd. I.

Ant. 2 Omnia per Christum et in Christo creáta sunt.

Ant. 3 Omnia subiécit sub pédibus eius et ipsum dedit Caput supra omnem Ecclésiam, quæ est Corpus ipsíus.

LECTIO BREVIS

{r}Hebr 10, 5-10{/r}

Ideo ingrédiens mundum dicit: Hóstiam et oblatiónem noluísti; corpus autem aptásti mihi; holocautómata pro peccáto non tibi placuérunt. Tunc dixi: Ecce vénio: in cápite libri scriptum est de me: Ut fáciam, Deus, voluntátem tuam. Supérius dicens: Quia hóstias, et oblatiónes, et holocautómata pro peccáto noluísti, nec plácita sunt tibi, quæ secúndum legem offerúntur, tunc dixi: Ecce vénio, ut fáciam, Deus, voluntátem tuam; aufert primum, ut sequens státuat. In qua voluntáte sanctificáti sumus per oblatiónem córporis Iesu Christi semel.

RESPONSORIUM BREVE

Ecce vénio {*} Ut fáciam voluntátem tuam.

Ecce vénio {*} Ut fáciam voluntátem tuam.

Lex tua est in præcórdiis meis. {*}

Ut fáciam voluntátem tuam.

Glória Patri, et Fílio, et Spirítui Sancto.

Ecce vénio {*} Ut fáciam voluntátem tuam.

Ad Benedictus, ant. Omnes unum sint, Pater, ut credat mundus, quia tu me misísti.

PRECES

Pater misericordiárum et Deus totíus consolatiónis, qui reples benefíciis tuis omnes accedéntes ad te: nos fílii tui, hanc diem inchoántes, per Christum cum Ipso et in Ipso te deprecámur:

Dómine, exáudi nos.

Iesu Christe, Fili Dei vivi,

duc nos in lumen tuæ Veritátis.

Dómine, exáudi nos.

Christe, Verbum Dei, qui es apud Patrem usque in sǽculum,

súscita in fidélibus tuis voluntátem Evangélii nuntiándi.

Dómine, exáudi nos.

Iesu, Uncte a Patre in Spíritu Sancto,

cónsecra Ecclésiam tuam in sanctitáte.

Dómine, exáudi nos.

Christe, Póntifex Novi Testaménti,

índue sacerdótes tua sanctitáte ad glóriam Patris.

Dómine, exáudi nos.

Christe, Sapiéntia Dei, pax et reconciliátio nostra,

fac ut omnes efficiámur concórdes et unánimes in Ecclésia tua.

Dómine, exáudi nos.

Christe, Sacérdos Ætérne, Patris glorificátor,

fac ut oblátio nostra in te reddátur laus ætérnæ glóriæ.

Dómine, exáudi nos.

ORATIO

Deus, qui ad maiestátis tuæ glóriam et géneris humáni salútem, Unigénitum tuum Summum atque Ætérnum constituísti Sacerdótem, præsta, ut, Spíritu Sancto largiénte, quos minístros et mysteriórum suórum dispensatóres elégit, in accépto ministério adimpléndo fidéles inveniántur.

Ad Vesperas

HYMNUS

PSALMODIA

Ant. 1 Iurávit Dóminus et non pænitébit eum: Tu es Sacérdos in ætérnum Psalmus 109, 1-5, 7

Ant. 2 Deus, qui dives est in misericórdia, convivificávit nos in Christo. Psalmus 110

Ant. 3 Christus est imágo Dei invisíbilis primogénitus omnis creatúræ. Canticum Col 1, 12-20

LECTIO BREVIS

{r}Hebr 10, 19-23{/r}

Habéntes ítaque fratres fidúciam in intróitu sanctórum in sánguine Christi, quam initiávit nobis viam novam, et vivéntem per velámen, id est, carnem suam, et sacerdótem magnum super domum Dei; accedámus cum vero corde in plenitúdine fídei, aspérsi corda a consciéntia mala, et ablúti corpus aqua munda, teneámus spei nostræ confessiónem indeclinábilem fidélis enim est qui repromísit.

RESPONSORIUM BREVE

Pacem habeámus ad Deum {*} Per Dóminum nostrum Iesum Christum.

Pacem habeámus ad Deum {*} Per Dóminum nostrum Iesum Christum.

Et gloriámur in spe glóriæ filiórum Dei. {*}

Per Dóminum nostrum Iesum Christum.

Glória Patri, et Fílio, et Spirítui Sancto.

Pacem habeámus ad Deum {*} Per Dóminum nostrum Iesum Christum.

Ad Magnificat, ant. Pater, ego pro eis rogo, quia tui sunt et pro eis sanctífico meípsum: ut sint et ipsi sanctificáti in veritáte.

PRECES

Per Christum, vota nostra effundámus Deo Patri, qui ómnia voluntáte sua dírigit et benedícit omnes in Ipso confidéntes:

Exáudi nos, fidénter te rogámus.

Christe, qui es Verbum Patris,

súggere lábiis nostris quod sumus oratúri.

Exáudi nos, fidénter te rogámus.

Christe Sacérdos, qui es Panis Vitæ,

fac ut elécti donum vivant próprii Sacerdótii, in te consummántes oblatiónem ipsórum.

Exáudi nos, fidénter te rogámus.

Christe glorióse, qui intercédis semper apud Patrem pro nobis,

fac nos fidéles in oratióne, ne defíciant operárii in messe tua.

Exáudi nos, fidénter te rogámus.

Christe Dómine, qui es a Patre missus,

da ut omnes invéniant in te vitam et viam Regni.

Exáudi nos, fidénter te rogámus.

Christe, Fili Dei vivéntis, qui morte tua mortem devicísti,

da ut oblátio extréma nostrórum defunctórum tríbuat ipsis in glória gáudium

Exáudi nos, fidénter te rogámus.

PSALMODIA

Ant. ad Tertiam Per Christum habémus accéssum omnes in uno Spíritu ad Patrem.

Ant. ad Sextam Superædificáti estis super fundaméntum Apostolórum et Prophetárum, ipso summo angulári lápide Christo Iesu.

Ant. ad Nonam Unicuíque nostrum data est grátia secúndum mensúram donatiónis Christi, in ædificatiónem Córporis eius, quod est Ecclésia.

LECTIO BREVIS

{r}Hebr 7, 26-27{/r}

Talis enim decébat ut nobis esset póntifex, sanctus, ínnocens, impollútus, segregátus a peccatóribus, et excélsior cælis factus: qui non habet necessitátem quotídie, quemádmodum sacerdótes, prius pro suis delíctis hóstias offérre, deínde pro pópuli: hoc enim fecit semel, seípsum offeréndo.

Communicántes Christi passiónibus gaudéte.

Ut et in revelatióne glóriæ eius gaudeátis exsultántes.

LECTIO BREVIS

{r}1 Petr 2, 4-5{/r}

Accedéntes vos ad Christum, lápidem vivum, ab homínibus quidem reprobátum, a Deo autem eléctum et honorificátum: et ipsi tamquam lápides vivi superædificámini, domus spirituális, sacerdótium sanctum, offérre spirituáles hóstias, acceptábiles Deo per Iesum Christum.

Sicut ergo accepístis Iesum Christum, Dóminum, in ipso ambuláte.

Radicáti, et superædificáti in ipso, et confirmáti fide.

LECTIO BREVIS

{r}1 Petr 2, 9-10{/r}

Vos autem genus eléctum, regále sacerdótium, gens sancta, pópulus acquisitiónis: ut virtútes annuntiétis eius qui de ténebris vos vocávit in admirábile lumen suum. Qui aliquándo non pópulus, nunc autem pópulus Dei; qui non consecúti misericórdiam, nunc autem misericórdiam consecúti.

Pax Christi exsúltet in córdibus vestris.

In qua et vocáti estis in uno córpore.