Tempus per annum

TEMPUS PER ANNUM

COMPLETORIUM

HYMNUS

Deinde, tempore Quadragesimæ, per hebdomadas I, III et V dicitur hymnus sequens:

Te lucis ante términum,

rerum creátor, póscimus,

ut sólita cleméntia

sis præsul ad custódiam.

Te corda nostra sómnient,

te per sopórem séntiant,

tuámque semper glóriam

vicína luce cóncinant.

Vitam salúbrem tríbue,

nostrum calórem réfice

tætram noctis calíginem

tua collústret cláritas.

Præsta, Pater omnípotens,

per Iesum Christum Dóminum,

qui tecum in perpétuum

regnat cum Sancto Spíritu. Amen.

Eodem tempore, per ceteras hebdomadas:

Christe, qui, splendor et dies,

noctis tenébras détegis,

lucísque lumen créderis,

lumen beátis prǽdicans,

Precámur, sancte Dómine,

hac nocte nos custódias;

sit nobis in te réquies,

quiétas horas tríbue.

Somno si dantur óculi,

cor semper ad te vígilet;

tuáque dextra prótegas

fidéles, qui te díligunt.

Defénsor noster, áspice,

insidiántes réprime,

gubérna tuos fámulos,

quos sánguine mercátus es.

Sit, Christe, rex piíssime,

tibi Patríque glória,

cum Spíritu Paráclito,

in sempitérna sǽcula. Amen.

Miserére mei, Dómine, et exáudi oratiónem meam. In nóctibus benedícite Dóminum. Alis suis obumbrábit tibi; non timébis a timóre noctúrno. Tu, Dómine Deus, pátiens et multæ misericórdiæ. Non abscóndas fáciem tuam a me, quia in te sperávi. Esto mihi in Deum protectórem et in domum refúgii. De profúndis clamávi ad te, Dómine. Caro mea requiéscet in spe. In die clamávi et nocte coram te, Dómine.

Responsorium breve

In manus tuas, Dómine, {*} Comméndo spíritum meum.

Redemísti nos, Dómine Deus veritátis. {*}

Comméndo spíritum meum.

Glória Patri, et Fílio, et Spirítui Sancto.

In manus tuas, Dómine, {*} Comméndo spíritum meum.

CANTICUM EVANGELICUM

Ant. Salva nos, Dómine, vigilántes, custódi nos dormiéntes, ut vigilémus cum Christo et requiescámus in pace, allelúia.

POST I VESPERAS DOMINICÆ ET SOLLEMNITATUM

Lectio brevis

Deut 6, 4-7

Audi Israel: Dóminus Deus noster Dóminus unus est. Díliges Dóminum Deum tuum ex toto corde tuo et ex tota ánima tua et ex tota fortitúdine tua. Erúntque verba hæc, quæ ego præcípio tibi hódie, in corde tuo, et inculcábis ea fíliis tuis et loquéris ea sedens in domo tua et ámbulans in itínere, decúmbens atque consúrgens.

Oratio

Dominicis et per octavam Paschæ:

Vísita nos, quǽsumus, Dómine, hac nocte præsénti, ut, dilúculo tua virtúte surgéntes, de resurrectióne Christi tui gaudére valeámus.

Vel, in sollemnitatibus extra dominicam occurrentibus:

Vísita, quǽsumus, Dómine, habitatiónem istam, et omnes insídias inimíci ab ea longe repélle; ángeli tui sancti hábitent in ea, qui nos in pace custódiant; et benedíctio tua sit super nos semper.

POST II VESPERAS DOMINICÆ ET SOLLEMNITATUM

Lectio brevis

Ap 22, 4-5

Vidébunt fáciem Dómini, et nomen eius in fróntibus eórum. Et nox ultra non erit, et non egent lúmine lucérnæ neque lúmine solis, quóniam Dóminus Deus illuminábit super illos, et regnábunt in sǽcula sæculórum.

Oratio

Dominicis et per octavam Paschæ:

Vox nostra te, Dómine, humíliter deprecétur, ut, domínicæ resurrectiónis hac die mystério celebráto, in pace tua secúri a malis ómnibus quiescámus, et in tua resurgámus laude gaudéntes.

FERIA SECUNDA

Lectio brevis

Cf. 1 Th 5, 9-10

Pósuit nos Deus in acquisitiónem salútis per Dóminum nostrum Iesum Christum, qui mórtuus est pro nobis, ut sive vigilémus sive dormiámus, simul cum illo vivámus.

Oratio

Quiétem, Dómine, corpóribus nostris tríbue salutárem, et quæ fúdimus hódie sémina per labórem, fac ut messem gérminent sempitérnam.

FERIA TERTIA

Lectio brevis

1 Petr 5, 8-9a

Sóbrii estóte, vigiláte. Adversárius vester Diábolus tamquam leo rúgiens círcuit quærens quem dévoret. Cui resístite fortes fide.

Oratio

Noctem istam, quǽsumus, Dómine, benígnus illúmina, et ita fac in pace nos tuos fámulos obdormíre, ut læti ad novi diéi claritátem in tuo nómine suscitémur.

FERIA QUARTA

Lectio brevis

Eph 4, 26-27

Nolíte peccáre; sol non óccidat super iracúndiam vestram, et nolíte locum dare Diábolo.

Oratio

Dómine Iesu Christe, qui iugum suáve te sequéntibus onúsque leve pérhibes mitis et húmilis, dignáre huius diéi vota et ópera nostra suscípere, et quiétem tribúere, qua tuo nos fácias servítio promptióres.

FERIA QUINTA

Lectio brevis

1 Th 5, 23

Ipse Deus pacis sanctíficet vos per ómnia, et ínteger spíritus vester et ánima et corpus sine queréla in advéntu Dómini nostri Iesu Christi servétur.

Oratio

Dómine Deus noster, diúrno labóre fatigátos quiéto sopóre nos réfove, ut, tuo semper auxílio recreáti, tibi córpore simus et mente devóti.

FERIA SEXTA

Lectio brevis

Cf. Ier 14, 9

Tu autem in médio nostri es, Dómine, et nomen tuum invocátum est super nos; ne derelínquas nos, Dómine Deus noster.

Oratio

Concéde nos, omnípotens Deus, ita sepúlto Unigénito tuo fidéliter inhærére, ut cum ipso in novitáte vitæ resúrgere mereámur.