FERIA QUINTA, Hebd. II

Ad Invitatorium

Dómine, lábia mea apéries.

Et os meum annuntiábit laudem tuam.

Ant. Introíte in conspéctu Dómini in exsultatióne.

Ad Laudes matutinas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

Quæ omnia omittuntur, quando Invitatorium immediate præcedit.

HYMNUS

Iam lucis orto sídere

Deum precémur súpplices,

ut in diúrnis áctibus

nos servet a nocéntibus.

Linguam refrénans témperet,

ne litis horror ínsonet;

visum fovéndo cóntegat,

ne vanitátes háuriat.

Sint pura cordis íntima,

absístat et vecórdia;

carnis terat supérbiam

potus cibíque párcitas;

Ut, cum dies abscésserit

noctémque sors redúxerit,

mundi per abstinéntiam

ipsi canámus glóriam.

Deo Patri sit glória

eiúsque soli Fílio

cum Spíritu Paráclito,

in sempitérna sǽcula. Amen.

PSALMÓDIA

Ant. 1Excita, Dómine, poténtiam tuam, ut salvos fácias nos.

Tempore Paschali: Ego sum vitis, vos pálmites, allelúia.

Ant. 2Magnífice fecit Dóminus, annuntiáte hoc in univérsa terra.

Tempore Paschali: Hauriétis aquas in gáudio de fóntibus Salvatóris, allelúia.

Ant. 3Exsultáte Deo, adiutóri nostro.

Tempore Paschali: Cibávit nos Dóminus ex ádipe fruménti, allelúia.

Lectio brevis

Rom 14, 17-19

Non est regnum Dei esca et potus, sed iustítia et pax et gáudium in Spíritu Sancto; qui enim in hoc servit Christo, placet Deo et probátus est homínibus. Itaque, quæ pacis sunt, sectémur et quæ ædificatiónis sunt in ínvicem.

Responsorium breve

In matutínis, Dómine, {*} Meditábor de te.

In matutínis, Dómine, {*} Meditábor de te.

Quia factus es adiútor meus. {*}

Meditábor de te.

Glória Patri, et Fílio, et Spirítui Sancto.

In matutínis, Dómine, {*} Meditábor de te.

Ad Benedictus, ant. Da sciéntiam salútis plebi tuæ, Dómine, et dimítte nobis peccáta nostra.

Preces

Benedíctus Deus, Pater noster, qui fílios suos prótegit neque preces spernit eórum. Omnes humíliter eum implorémus orántes:

Illúmina óculos nostros, Dómine.

Grátias tibi, Dómine, quia per Fílium tuum nos illuminásti,

eius luce per longitúdinem diéi nos satiári concéde.

Illúmina óculos nostros, Dómine.

Sapiéntia tua, Dómine, dedúcat nos hódie,

ut in novitáte vitæ ambulémus.

Illúmina óculos nostros, Dómine.

Præsta nobis advérsa pro te fórtiter sustinére,

ut corde magno tibi iúgiter serviámus.

Illúmina óculos nostros, Dómine.

Dírige in nobis hódie cogitatiónes, sensus et ópera,

ut tibi providénti dóciles obsequámur.

Illúmina óculos nostros, Dómine.

Pater noster.

Oratio

Te lucem veram et lucis auctórem, Dómine, deprecámur, ut, quæ sancta sunt, fidéliter meditántes, in tua iúgiter claritáte vivámus.

Conclusio Horæ, ut in Ordinario.

PSALMÓDIA

Ant. 1 Bonum mihi lex oris tui, Dómine, super mília auri et argénti.

Ant. 2 In Deo sperávi, non timébo quid fáciat mihi homo.

Ant. 3 Magnificáta est usque ad cælos misericórdia tua, Dómine.

Lectio brevis

Gal 5, 13-14

Vos in libertátem vocáti estis, fratres; tantum ne libertátem in occasiónem detis carni, sed per caritátem servíte ínvicem. Omnis enim lex in uno sermóne implétur, in hoc: Díliges próximum tuum sicut teípsum.

Dómine, viam mandatórum tuórum cucúrri.

Cum dilatásti cor meum.

Oratio

Te, Dómine, supplíciter exorámus, ut qui hora tértia Spíritum Sanctum orántibus Apóstolis tribuísti, nobis eiúsdem grátiæ participatiónem concédas benígnus.

Lectio brevis

Gal 5, 16-17

Spíritu ambuláte et concupiscéntiam carnis ne perfecéritis. Caro enim concupíscit advérsus spíritum, spíritus autem advérsus carnem; hæc enim ínvicem adversántur, ut non, quæcúmque vultis, illa faciátis.

Bonus es tu, Dómine, et benefáciens.

Doce me iustificatiónes tuas.

Oratio

Omnípotens sempitérne Deus, apud quem nihil est tenebrósum, nihil obscúrum, lucis tuæ in nos emítte splendórem, ut mandatórum tuórum lege percépta, in via tua dilatáto corde fidéliter ambulémus.

Lectio brevis

Gal 5, 22. 23a. 25

Fructus autem Spíritus est cáritas, gáudium, pax, longanímitas, benígnitas, bónitas, fides, mansuetúdo, continéntia. Si vívimus Spíritu, Spíritu et ambulémus.

Notam fac mihi, Dómine, viam in qua ámbulem.

Spíritus tuus bonus dedúcat me in terram rectam.

Oratio

Da nobis orántibus, quǽsumus, Dómine, ut patiéntiæ Unigéniti tui sequámur exémpla, et advérsa patiéndi constántiam habeámus.

Ad Vesperas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

HYMNUS

Deus, qui claro lúmine

diem fecísti, Dómine,

tuam rogámus glóriam

dum pronus dies vólvitur.

Iam sol urgénte véspero

occásum suum gráditur,

mundum conclúdens ténebris,

suum obsérvans órdinem.

Tu ver{i}o{/i}, excélse Dómine,

precántes tuos fámulos

diúrno lassos ópere

ne sinas umbris ópprimi,

Ut non fuscátis méntibus

dies abscédat sǽculi,

sed tua tecti grátia

cernámus lucem prósperam.

Præsta, Pater piíssime,

Patríque compar Unice,

cum Spíritu Paráclito

regnans per omne sǽculum. Amen.

PSALMÓDIA

Ant. 1 Pósui te in lucem géntium, ut sis salus mea usque ad extrémum terræ.

Tempore Paschali: Ipse constitútus est a Deo iudex vivórum et mortuórum, allelúia.

Ant. 2 Salvos fáciet Dóminus fílios páuperum; ex oppressióne rédimet ánimas eórum.

Tempore Paschali: Benedicéntur in ipso omnes tribus terræ, allelúia.

Ant. 3 Nunc facta est salus et regnum Dei nostri.

Tempore Paschali: Iesus Christus heri et hódie, ipse et in sǽcula, allelúia.

Lectio brevis

1 Petr 1, 22-23

Animas vestras castificántes in obœdiéntia veritátis ad fraternitátis amórem non fictum, ex corde ínvicem dilígite atténtius, renáti non ex sémine corruptíbili sed incorruptíbili per verbum Dei vivum et pérmanens.

Responsorium breve

Dóminus pascit me, {*} Et nihil mihi déerit.

Dóminus pascit me, {*} Et nihil mihi déerit.

In páscuis viréntibus me collocávit. {*}

Et nihil mihi déerit.

Glória Patri, et Fílio, et Spirítui Sancto.

Dóminus pascit me, {*} Et nihil mihi déerit.

Ad Magnificat, ant. Esuriéntes iustítiam Dóminus saturávit et implévit bonis.

Preces

Animas nostras ad Dóminum et Salvatórem nostrum pergráti levémus, qui benedícit pópulum suum in omni benedictióne spiritáli, et cum devotióne rogémus:

Bénedic pópulum tuum, Dómine.

Miséricors Deus, consérva Papam nostrum N. et Epíscopum nostrum N.,

incólumes custódi eos Ecclésiæ tuæ.

Bénedic pópulum tuum, Dómine.

Regiónem nostram, Dómine, tuére benígnus,

a malis nos líbera univérsis.

Bénedic pópulum tuum, Dómine.

Voca fílios in circúitum mensæ tuæ,

qui préssius te vírginem, páuperem et obœdiéntem sequántur.

Bénedic pópulum tuum, Dómine.

Ancíllas tuas custódi, propósitum virginitátis proféssas,

ut te, Agnum divínum, quocúmque íeris, sequántur.

Bénedic pópulum tuum, Dómine.

Defúncti in tua pace requiéscant ætérna,

et eórum nobíscum coniúnctio, spiritálium bonórum communicatióne, roborétur.

Bénedic pópulum tuum, Dómine.

Pater noster.

Oratio

Vespertínæ laudis offícia persolvéntes, cleméntiam tuam, Dómine, deprecámur, ut a meditatióne legis tuæ cor nostrum recédere non permíttas, et nobis lumen ætérnæ vitæ dones et prǽmium.

Conclusio Horæ, ut in Ordinario.