FERIA QUARTA, Hebd. II

Ad Invitatorium

Dómine, lábia mea apéries.

Et os meum annuntiábit laudem tuam.

Ant. Iubiláte Deo, omnis terra, servíte Dómino in lætítia.

Ad Laudes matutinas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

Quæ omnia omittuntur, quando Invitatorium immediate præcedit.

HYMNUS

Fulgéntis auctor ǽtheris,

qui lunam lumen nóctibus,

solem diérum cúrsibus

certo fundásti trámite,

Nox atra iam depéllitur,

mundi nitor renáscitur,

novúsque iam mentis vigor

dulces in actus érigit.

Laudes sonáre iam tuas

dies relátus ádmonet,

vultúsque cæli blándior

nostra serénat péctora.

Vitémus omne lúbricum,

declínet prava spíritus,

vitam facta non ínquinent,

linguam culpa non ímplicet;

Sed, sol diem dum cónficit,

fides profúnda férveat,

spes ad promíssa próvocet,

Christo coniúngat cáritas.

Præsta, Pater piíssime,

Patríque compar Unice,

cum Spíritu Paráclito

regnans per omne sǽculum. Amen.

PSALMÓDIA

Ant. 1Deus, in sancto via tua: quis deus magnus sicut Deus noster?

Tempore Paschali: Vidérunt te aquæ, Deus; per mare deduxísti pópulum tuum, allelúia.

Ant. 2Exsultávit cor meum in Dómino, qui humíliat et súblevat.

Tempore Paschali: Dóminus mortíficat et vivíficat, allelúia.

Ant. 3Dóminus regnávit, exsúltet terra.

Tempore Paschali: Lux orta est iusto, et rectis corde lætítia, allelúia.

Lectio brevis

Rom 8, 35. 37

Quis nos separábit a caritáte Christi? Tribulátio an angústia an persecútio an fames an núditas an perículum an gládius? Sed in his ómnibus supervíncimus per eum, qui diléxit nos.

Responsorium breve

Benedícam Dóminum. {*} In omni témpore.

Benedícam Dóminum. {*} In omni témpore.

Semper laus eius in ore meo. {*}

In omni témpore.

Glória Patri, et Fílio, et Spirítui Sancto.

Benedícam Dóminum. {*} In omni témpore.

Ad Benedictus, ant. In sanctitáte serviámus Dómino ómnibus diébus nostris.

Preces

Benedíctus Deus salvátor noster, qui usque ad consummatiónem sǽculi se ómnibus diébus cum Ecclésia sua mansúrum promísit. Ideo ei grátias agéntes clamémus:

Mane nobíscum, Dómine.

Mane nobíscum, Dómine, toto die,

numquam declínet a nobis sol grátiæ tuæ.

Mane nobíscum, Dómine.

Hunc diem tibi tamquam oblatiónem consecrámus,

dum nos nihil pravi factúros aut probatúros pollicémur.

Mane nobíscum, Dómine.

Fac, Dómine, ut donum lucis hic totus dies evádat,

ut simus sal terræ et lux mundi.

Mane nobíscum, Dómine.

Spíritus Sancti tui cáritas dírigat corda et lábia nostra,

ut in tua iustítia semper et laude maneámus.

Mane nobíscum, Dómine.

Pater noster.

Oratio

Emítte, quǽsumus, Dómine, in corda nostra tui lúminis claritátem, ut in via mandatórum tuórum iúgiter ambulántes, nihil umquam patiámur erróris.

Conclusio Horæ, ut in Ordinario.

PSALMÓDIA

Ant. 1 Cogitávi vias meas et convérti pedes meos in testimónia tua.

Ant. 2 Timor et tremor venérunt super me; inténde mihi et exáudi me, Dómine.

Ant. 3 Ad Deum clamábo, et Dóminus salvábit me.

Lectio brevis

Deut 1, 16-17a

Iudícibus vestris præcépi in témpore illo: Audíte causam fratrum vestrórum et, quod iustum est, iudicáte, sive civis sit ille sive peregrínus. Non accipiétis persónam in iudício; ita parvum audiétis ut magnum, nec timébitis cuiúsquam persónam, quia Dei iudícium est.

Iustus Dóminus et iustítias diléxit.

Recti vidébunt vultum eius.

Oratio

Dómine, Pater sancte, Deus fidélis, qui promíssum Spíritum misísti, ut hómines per peccátum dispérsos congregáres, fac nos in mundo unitátis pacísque múnera confovére.

Lectio brevis

Is 55, 8-9

Cogitatiónes meæ non sunt cogitatiónes vestræ, neque viæ vestræ viæ meæ, dicit Dóminus. Quia sicut exaltántur cæli a terra, sic exaltátæ sunt viæ meæ a viis vestris et cogitatiónes meæ a cogitatiónibus vestris.

Dómine Deus virtútum, quis símilis tibi?

Potens es, Dómine, et véritas tua in circúitu tuo.

Oratio

Omnípotens et miséricors Deus, qui nos die média respiráre concédis, quos cœ́pimus propítius intuére labóres, et, sanans quæ delíquimus, fac eos ad finem tibi plácitum perveníre.

Lectio brevis

1 Sam 16, 7b

Non iuxta intúitum hóminis ego iúdico: homo enim videt ea, quæ parent, Dóminus autem intuétur cor.

Proba me, Deus, et scito cor meum.

Deduc me in via ætérna.

Oratio

Dómine Iesu Christe, qui manus tuas in cruce ad salvándos hómines extendísti, concéde, ut actus nostri tibi reddántur accépti, et opus tuæ redemptiónis in mundo váleant declaráre.

Ad Vesperas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

HYMNUS

Sol, ecce, lentus óccidens

montes et arv{i}a{/i} et ǽquora

mæstus relínquit, ínnovat

sed lucis omen crástinæ,

Mirántibus mortálibus

sic te, Creátor próvide,

leges vicésque témporum

umbris dedíss{i}e{/i} et lúmini.

Ac dum, tenébris ǽthera

siléntio preméntibus,

vigor labórum déficit,

quies cupíta quǽritur,

Spe nos fidéque dívites

tui beámur lúmine

Verbi, quod est a sǽculis

splendor patérnæ glóriæ.

Est ille sol qui nésciat

ortum vel umquam vésperum;

quo terra gestit cóntegi,

quo cæl{i}i{/i} in avum iúbilant.

Hac nos seréna pérpetim

da luce tandem pérfrui,

cum Nat{i}o{/i} et almo Spíritu

tibi novántes cántica. Amen.

PSALMÓDIA

Ant. 1Exspectémus beátam spem et advéntum glóriæ Salvatóris nostri.

Tempore Paschali: Non turbétur cor vestrum; tantum in me crédite, allelúia.

Ant. 2Illúminet vultum suum super nos Deus, et benedícat nobis.

Tempore Paschali: Confiteántur tibi pópuli, Deus, exsúltent in salutári tuo, allelúia.

Ant. 3In ipso cóndita sunt univérsa, et ómnia in ipso constant.

Tempore Paschali: Opéruit cælos glória eius, et laudis eius plena est terra, allelúia.

Lectio brevis

1 Petr 5, 5b-7

Omnes ínvicem humilitátem indúite, quia Deus supérbis resístit, humílibus autem dat grátiam. Humiliámini ígitur sub poténti manu Dei, ut vos exáltet in témpore, omnem sollicitúdinem vestram proiciéntes in eum, quóniam ipsi cura est de vobis.

Responsorium breve

Custódi nos, Dómine, {*} Ut pupíllam óculi.

Custódi nos, Dómine, {*} Ut pupíllam óculi.

Sub umbra alárum tuárum prótege nos. {*}

Ut pupíllam óculi.

Glória Patri, et Fílio, et Spirítui Sancto.

Custódi nos, Dómine, {*} Ut pupíllam óculi.

Ad Magnificat, ant. Fac, Deus, poténtiam in brácchio tuo, dispérde supérbos et exálta húmiles.

Preces

Iubilémus Deo nostro, fratres caríssimi, qui máxime in benefíciis pópulo suo elargiéndis congáudet, et cum ánimi fervóre precémur:

Grátiam et pacem multíplica, Dómine.

Ætérne Deus, cui mille anni sunt tamquam dies hestérna, quæ prætériit,

esse vitam quasi florem mane germinántem, véspere autem arescéntem nos memoráre concéde.

Grátiam et pacem multíplica, Dómine.

Manna tuum pópulo largíre, ne esúriat,

et aquam vivam, ne sítiat in ætérnum.

Grátiam et pacem multíplica, Dómine.

Fac ut fidéles tui quæ sursum sunt quærant et sápiant,

étiam témpora óperis et ótii in tuam glóriam vertant.

Grátiam et pacem multíplica, Dómine.

Aerem nobis, Dómine, largíre propítium,

quo uberióres percipiámus fructus terræ.

Grátiam et pacem multíplica, Dómine.

(Vel:
Ab ómnibus noxis líbera nos, Dómine,

et copiósam benedictiónem super domus nostras effúnde.)

Grátiam et pacem multíplica, Dómine.

Visiónem vultus tui largíre defúnctis,

et eius contemplatióne nos redde beátos.

Grátiam et pacem multíplica, Dómine.

Pater noster.

Oratio

Deus, cuius sanctum est nomen et misericórdia a progénie in progénies celebrátur, pópulum tuum súscipe supplicántem, eíque tríbue perpétuo te magnificáre præcónio.

Conclusio Horæ, ut in Ordinario.