FERIA TERTIA, Hebd. I

Ad Invitatorium

Dómine, lábia mea apéries.

Et os meum annuntiábit laudem tuam.

Ant. Regem magnum Dóminum, veníte, adorémus.

Ad Laudes matutinas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

Quæ omnia omittuntur, quando Invitatorium immediate præcedit.

HYMNUS

Pergráta mundo núntiat

auróra solis spícula,

res et colóre véstiens

iam cuncta dat nitéscere.

Qui sol per ævum prǽnites,

o Christe, nobis vívidus,

ad te canéntes vértimur,

te gestiéntes pérfrui.

Tu Patris es sciéntia

Verbúmque per quod ómnia

miro refúlgent órdine

mentésque nostras áttrahunt.

Da lucis ut nos fílii

sic ambulémus ímpigri,

ut Patris usque grátiam

mores et actus éxprimant.

Sincéra præst{i}a{/i} ut prófluant

ex ore nostro iúgiter,

et veritátis dúlcibus

ut excitémur gáudiis.

Sit, Christe, rex piíssime,

tibi Patríque glória

cum Spíritu Paráclito,

in sempitérna sǽcula. Amen.

PSALMÓDIA

Ant. 1 Innocens mánibus et mundo corde ascéndet in montem Dómini.

Tempore Paschali: Qui descéndit, ipse est et qui ascéndit super omnes cælos, allelúia.

Ant. 2 Exaltáte Regem sæculórum in opéribus vestris.

Tempore Paschali: Agite dies lætítiæ et confitémini Dómino, allelúia.

Ant. 3 Rectos decet collaudátio.

Tempore Paschali: Misericórdia Dómini plena est terra, allelúia.

Lectio brevis

Rom 13, 11b. 12-13a

Hora est iam vos de somno súrgere. Nox procéssit, dies autem appropiávit. Abiciámus ergo ópera tenebrárum et induámur arma lucis. Sicut in die honéste ambulémus.

Responsorium breve

Deus meus, adiútor meus, {*} Et sperábo in eum.

Deus meus, adiútor meus, {*} Et sperábo in eum.

Refúgium meum et liberátor meus. {*}

Et sperábo in eum.

Glória Patri, et Fílio, et Spirítui Sancto.

Deus meus, adiútor meus, {*} Et sperábo in eum.

Ad Benedictus, ant. Eréxit nobis Dóminus cornu salútis, sicut locútus est per os prophetárum suórum.

Preces

Vocatiónis cæléstis partícipes facti, fratres caríssimi, Iesum, pontíficem confessiónis nostræ, benedicámus clamántes:

Dómine Deus noster et salvátor noster.

O Rex omnípotens, qui, per baptísmum, regále nobis sacerdótium contulísti,

fac ut laudis tibi semper sacrifícium offerámus.

Dómine Deus noster et salvátor noster.

Da nobis mandáta tua serváre,

ut per Sanctum Spíritum in te maneámus et tu in nobis.

Dómine Deus noster et salvátor noster.

Sapiéntiam tuam da nobis ætérnam,

ut nobíscum sit hódie et nobíscum operétur.

Dómine Deus noster et salvátor noster.

Concéde nobis hódie néminem umquam contristáre,

omnes autem, qui nobíscum sunt, lætificáre.

Dómine Deus noster et salvátor noster.

Pater noster.

Oratio

Matutína súpplicum vota, Dómine, propítius intuére, et occúlta cordis nostri remédio tuæ clarífica pietátis, ut desidéria tenebrósa non téneant, quos lux cæléstis grátiæ reparávit.

Conclusio Horæ, ut in Ordinario.

PSALMÓDIA

Ant. 1 Beáti qui ámbulant in lege Dómini.

Ant. 2 Exsultábit cor meum in salutári tuo.

Ant. 3 Conclúsit Deus ómnia sub peccáto, ut ómnium misereátur.

Lectio brevis

Ier 17, 7-8

Benedíctus vir, qui confídit in Dómino, et erit Dóminus fidúcia eius; et erit quasi lignum, quod transplantátur super aquas, quod ad humórem mittit radíces suas et non timébit, cum vénerit æstus: et erit fólium eius víride, et in anno siccitátis non erit sollícitum, nec aliquándo désinet fácere fructum.

Dóminus non privábit bonis eos qui ámbulant in innocéntia.

Dómine virtútum, beátus homo qui sperat in te.

Oratio

Omnípotens sempitérne Deus, qui Paráclitum Sanctum tuum hora tértia in Apóstolos effudísti, in nos quoque eúndem Spíritum caritátis emítte, ut fidéle tibi coram ómnibus homínibus testimónium præbeámus.

Lectio brevis

Prov 3, 13-15

Beátus homo, qui invénit sapiéntiam et qui áffluit prudéntia: mélior est acquisítio eius negotiatióne argénti, et auro primo fructus eius. Pretiósior est cunctis gemmis, et ómnia pretiósa tua huic non valent comparári.

Dómine, veritátem in corde dilexísti.

Et in occúlto sapiéntiam manifestásti mihi.

Oratio

Deus, qui Petro salvíficum tuum super gentes consílium revelásti, éffice benígnus, ut ópera nostra tibi grata reddántur, ac tuo dilectiónis salutísque propósito te donánte desérviant.

Lectio brevis

Iob 5, 17-18

Beátus homo, qui corrípitur a Deo; increpatiónem ergo Omnipoténtis ne réprobes. Quia ipse vúlnerat et medétur, pércutit, et manus eius sanábunt.

Fac cum servo tuo secúndum misericórdiam tuam, Dómine.

Iustificatiónes tuas doce me.

Oratio

Deus, qui Cornélio centurióni ángelum tuum misísti, ut viam ei salútis osténderet, da nobis, quǽsumus, in salvatiónem ómnium libéntius operári, ut una cum eis, in Ecclésia tua, ad te perveníre possímus.

Ad Vesperas

Deus, in adiutórium meum inténde.

Dómine, ad adiuvándum me festína.

Glória Patri. Sicut erat. (Allelúia.)

HYMNUS

Tellúris ingens cónditor,

mundi solum qui éruens,

pulsis aquæ moléstiis,

terram dedíst{i}i{/i} immóbilem.

Ut germen aptum próferens,

fulvis decóra flóribus,

fecúnda fructu sísteret

pastúmque gratum rédderet:

Mentis perústæ vúlnera

munda viróre grátiæ,

ut facta fletu díluat

motúsque pravos átterat.

Iussis tuis obtémperet,

nullis malis appróximet,

bonis repléri gáudeat

et mortis actum nésciat.

Præsta, Pater piíssime,

Patríque compar Unice,

cum Spíritu Paráclito

regnans per omne sǽculum. Amen.

PSALMÓDIA

Ant. 1Tríbuit Dóminus victóriam Christo suo.

Tempore Paschali: Nunc factum est regnum Dei nostri, et potéstas Christi eius, allelúia.

Ant. 2Cantábimus et psallémus virtútes tuas.

Tempore Paschali: Accepísti virtútem tuam et regnásti, allelúia.

Ant. 3Fecísti nos, Dómine, regnum et sacerdótes Deo nostro.

Tempore Paschali: Tibi sérviat omnis creatúra tua, quia dixísti et facta sunt, allelúia.

Lectio brevis

1 Io 3, 1a. 2

Vidéte qualem caritátem dedit nobis Pater, ut fílii Dei nominémur, et sumus! Caríssimi, nunc fílii Dei sumus, et nondum manifestátum est quid érimus; scimus quóniam, cum ipse apparúerit, símiles ei érimus, quóniam vidébimus eum, sícuti est.

Responsorium breve

In ætérnum, Dómine, {*} Pérmanet verbum tuum.

In ætérnum, Dómine, {*} Pérmanet verbum tuum.

In sǽculum sǽculi véritas tua. {*}

Pérmanet verbum tuum.

Glória Patri, et Fílio, et Spirítui Sancto.

In ætérnum, Dómine, {*} Pérmanet verbum tuum.

Ad Magnificat, ant. Exsúltet spíritus meus in Dómino Deo, salutári meo.

Preces

Christo Dómino, in médio nostri vivénti, nos, pópulus eius acquisitiónis, laudes persolvámus et supplicémus dicéntes:

Ad laudem tuam exáudi nos, Dómine.

Dómine, rex et dominátor géntium, adésto pópulis et ómnibus potestátem habéntibus,

ut commúne bonum iuxta legem tuam concórditer persequántur.

Ad laudem tuam exáudi nos, Dómine.

Tu, qui captívam duxísti nostram captivitátem,

restítue ad filiórum libertátem fratres, qui córpore vel spíritu captivitátem patiúntur.

Ad laudem tuam exáudi nos, Dómine.

Semper irreprehensíbiles iúvenes nostri tibi sátagant inveníri,

et tibi vocánti magnanímiter obsecúndent.

Ad laudem tuam exáudi nos, Dómine.

Fac ut exémplum tuum púeri imiténtur,

atque sapiéntia et grátia semper profíciant.

Ad laudem tuam exáudi nos, Dómine.

Defúncti in regnum suscipiántur ætérnum,

ubi nos tecum conregnatúros sperámus.

Ad laudem tuam exáudi nos, Dómine.

Pater noster.

Oratio

Grátias tibi ágimus, Dómine Deus omnípotens, qui nos ad hanc horam vespertínam perveníre tribuísti, te supplíciter deprecántes, ut elevátio mánuum nostrárum sit in conspéctu tuo acceptábile sacrifícium.

Conclusio Horæ, ut in Ordinario.